ގެދޮރު އިމާރާތްކުރުމަށް ބޭންކުތަކުން ލޯނު ނެގުމަށް އެހީތެރިވުމުގެ ގޮތުން، އެފަދަ ގެތަކުގެ ކޮންމެ މީހަކަށް 200،000 އެއްހައި ރުފިޔާ ހިލޭ އެހީގެ ގޮތުގައި ދޭން ފެށުމަށް މަސައްކަތް ކުރަމުން އަންނަ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
މުއިއްޒު އެހެން ވިދާޅުވީ ސީދާ އެމަނިކުފާނުގެ އަރިހަށް އާންމު ރައްޔިތުން ގޮސް، ކަންމުގައި އެދެން ޖެހޭ ގޮތަށް ކުރިއަށް ގެންދާ ރައްޔިތުންގެ އަޑު ސިލްސިލާއަށް ދިޔަ ދެ މީހަކު ހިއްސާކުރި ޝަކުވާއަކާ ގުޅިގެންނެވެ.
މުއިއްޒު ވިދާޅުވީ ގެދޮރު އެޅުމަށް ބޭންކުތަކުން ދޫކުރާ ލޯނުގެ އިކުއިޓީގެ ގޮތުގައި ދައްކަންޖެހޭ ފައިސާ ހަމަޖައްސަން ސަރުކާރުން ސްކީމެއް ތައާރަފު ކުރުމުގެ މަސައްކަތް ކުރަމުންދާ ކަމަށެވެ.
"މިހާރު އަޅުގަނޑުމެން އެބައުޅެން އިކުއިޓީއަށް ދެއްތޯ މި ދައްކަންޖެހޭ ފައިސާ ކޮންމެވެސް ކަހަލަ ސަޕޯޓެއް ދެވޭކަހަލަ ސްކީމެއް އެބަ ހަދަން، އޭރުން މި ބޭންކަށް ދައްކަންޖެހޭ ފައިވް ޕަސެންޓް ދެއްތޯ؟ އޭގެ ތެރެއިން ކޮންމެވެސް ވަރެއް ދެއްކޭނެ،" މުއިއްޒު ވިދާޅުވި އެވެ.
އެމަނިކުފާނު ވިދާޅުވީ، އެ ސްކީމް އެކުލަވައިލާނީ ވަރަށް ލުއި ޝަރުތުތަކެއް ކަނޑައަޅައިގެން ކަމަށާއި އެ ސްކީމްގެ ދަށުން ސަރުކާރުން ދޭ ފައިސާއަކީ އަނބުރާ ދައްކަން ނުޖެހޭ ފައިސާ ކަމަށެވެ. އެކަން ކުރުމަށްޓަކައި ޓްރަސްޓު ފަންޑެއްގައި ފައިސާ ރައްކާ ކޮށްފައި ވެސް އެބަހުރި ކަމަށް މުއިއްޒު ވިދާޅުވި އެވެ.
"މިއީ ލޯނެއް ނޫން، މި ހިލޭ. ސަރުކާރުން ދެނީ އިކުއިޓީ ކޮމްޕޯނަންޓަށް ދޭ މިއީ ހަމަ، އަނބުރާ ދައްކަން ނުޖެހޭ އެއްޗެއް، ދެން 200،000ރ. ވަރު ކޮންމެ މީހަކަށް، ދެން ފައިވް ޕަސެންޓު، ދެން ގޭގެ ތިންހަތަރު މީހުން އެއްކޮށްލައިގެން ވެސް މިސާލަކަށް އެއް މިލިއަނެއްހައި ރުފިޔާ ވެސް ލިބިދާނެ ކަންނޭނގެ، ފަސް މީހުން ތިބެއްޖެއްޔާ ދެއްތޯ؟" މުއިއްޒު ވިދާޅުވި އެވެ.
"ނޫނިއްޔާމުން ދެތިންހަތަރު މީހުން ތިބެއްޖެއްޔާ ހައެއްކަލައްކަ ރުފިޔާ."
މި ސަރުކާރުން މީގެ ކުރިން ވަނީ ގެދޮރު ބިނާ ކުރުމަށްޓަކައި ބީއެމްއެލްއާ ގުޅިގެން ހިޔާވެހި ފައިނޭންޝިންގެ ނަމުގައި ސްކީމެއް ވެސް ހިންގައިފަ އެވެ.
ނަމަވެސް، އެ ސްކީމަށް ގިނަ ބައެއްގެ ޝަރުތު ހަމަނުވާ ގޮތަށް އޮތުމުން ގިނަ ބަޔަކު ވަނީ ފާޑުކިޔައިފަ އެވެ.
