ރަސްމާލެ ހިއްކަންކުރި ހަރަދުން ގުޅީފަޅާއި ގިރާވަރުފަޅު ތަރައްގީކުރި ނަމަ، މިދިޔަ ސަރުކާރުން އަޅަން ފެށި ތިލަމާލެ ބްރިޖުގެ ވެސް ފައިދާ ކުރީސް ކަމަށް ކުރީގެ ނައިބުރައީސް ފައިސަލް ނަސީމް ވިދާޅުވެއްޖެ އެވެ.
އެމްޑީޕީގެ ހަރުގޭގައި މިރޭ ބޭއްވި ޖަލްސާގައި ވާހަކަދައްކަވަމުން ފައިސަލް ވިދާޅުވީ އެމްޑީޕީގެ ދެ ވެރިކަމުގައި ވެސް ދިވެހިރައްޔިތުންނަށް ބޯހިޔާވަހިކަން ކަށަވަރުކޮށްދިން ކަމަށެވެ.
ނަމަވެސް، މި ސަރުކާރު ވެރިކަމާ ހަވާލުވުމަށްފަހު، ގުޅީފަޅާއި ގިރާވަރުފަޅު ތަރައްގީނުކޮށް ރަސްމާލެ ހިއްކުމުގެ މަސައްކަތް ކުރަމުން ދާތީ އެކަމަށް ފައިސަލް ފާޑުވިދާޅުވި އެވެ.
"އެ ފައިސާއަކީ އެމްޑީޕީގެ ނިމިގެންދިޔަ ސަރުކާރުން މާލޭ ސަރަހައްދުގައި ދިރިއުޅޭ ފަރާތްތަކަށް ދިވެހިރައްޔިތުންނަށް ދީފައި ހުރި ފްލެޓުތަކާއި އަދި ގޯތިތަކާއި އެ ގޯތިތަކުގައި ދިރިއުޅެވޭނެ ގޮތެއް ހެދުމަށްޓަކައި އަޅުގަނޑުމެންނަށް ހަރަދުކުރިނަމަ، މިއަދު މި އަޅާ ބްރިޖު، އެތައް 100 މިލިއަން ޑޮލަރެއް ހަރަދުކޮށްގެން ތިލަމާލެ ބްރިޖު، އޭގެ ވެސް ފައިދާ ނުކުތީސް،" ފައިސަލް ވިދާޅުވި އެވެ.
ގުޅީފަޅާއި ގިރާވަރުފަޅުގައި އަސާސީ ހިދުމަތްތައް އަދި ގާއިމުކޮށްފައި ނުވާތީ އެ ތަންތަނުގައި މީހުންނަށް ވަޒަންވެރިވެ ދިރިއުޅެވޭނެ ގޮތެއް އަދި ނެތުމުން ބްރިޖުގެ ބޭނުމެއް ނުހިފޭނެކަން ފައިސަލް ފާހަގަކުރެއްވި އެވެ.
ނަމަވެސް، އެމްޑީޕީގެ ވިސްނުމަކަށްވީ އުތުރު ތިލަފަޅާ ހިސާބަށް ހިއްކައި މާލެ ސަރަހައްދުގައި އޮތް ބޯހިޔާވަހިކަމުގެ މައްސަލައަށް ހައްލެއް ހޯދަދިނުމަށް ކަމަށެވެ.
"މިހާރު ބްރިޖެއް އަޅާފައި އެ ބްރިޖު އޮންނަންވީ ހަމައެކަނި ލޮރީ ދުއްވަން އެތައް ދުވަހެއް ވަންދެން، ނޫނީ ގާޑިޔާ ދަމަން ބާއްވަންވީ،" ފައިސަލް ވިދާޅުވި އެވެ.
ފައިސަލް ވަނީ ރަސްމާލެ މަޝްރޫއުއަށް ވެސް ފާޑުވިދާޅުވެފަ އެވެ. އޭނާ ވިދާޅުވީ އެފަދަ މަޝްރޫއުއެއް ހިންގަން އެއްބަސްވާން ޖެހޭނީ އެންމެ ކުޑަމިނުން ރައްޔިތުންގެ މަޖިލީހުގެ މެންބަރުންނާ މަޝްވަރާ ކޮށްލާފައި ކަމަށެވެ.
