ސައުދީ އަރަބިއްޔާގެ ތެޔޮ ކުންފުނި، އަރަމްކޯގެ ހެޑްކުއާޓަރަށް އަމާޒުކޮށް ހޫތީން ދިން ހަމަލާތަކެއްގައި އެ ކުންފުނީގެ އިސްވެރިންގެ އޮފީސްތަކަށް ބޮޑެތި ގެއްލުންތަކެއް ލިބިފައިވާ ކަމަށް ސަރަހައްދީ ދެ އޮފިޝަލަކު ވިދާޅުވެއްޖެ އެވެ.
އީރާނުގެ މަދަދުލިބޭ ހޫތީ ހަނގުރާމަވެރިން މި ހަމަލާ ދީފައިވަނީ، ސައުދީގެ މުހިންމު ތަންތަނަށް ހަމަލާދޭނެ ކަމުގެ އިންޒާރު ކުރިން ދިނުމަށްފަހު އެވެ. މިއީ އެ ޖަމާއަތުން ބޭނުންވެއްޖެ ހިނދެއްގައި ސައުދީގެ މުހިންމު އަމާޒުތަކަށް ހަމަލާދިނުމުގެ ގާބިލުކަން ހުރިކަން ހާމަކޮށްދޭ ކަމެކެވެ.
އޮފިޝަލުން ބުނި ގޮތުގައި، އަރަމްކޯގެ އިސްވެރިން ބޭނުންކުރައްވާ އިމާރާތުގެ އެންމެ މަތީ ތިން ފަންގިފިލާއަށް ވަނީ ގެއްލުން ލިބިފަ އެވެ. މީގެ ތެރޭގައި އަރަމްކޯގެ ޗީފް އެގްޒެކެޓިވް އޮފިސަރު (ސީއީއޯ) ގެ އޮފީސް ވެސް ހިމެނޭ ކަމަށްވެ އެވެ. ނަމަވެސް މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ.
ވޭތުވެދިޔަ ދުވަސްތަކުގައި ސައުދީ އަރަބިއްޔާގެ އެންމެ މުހިންމު އަދި ރައްކާތެރިކަން ވަރުގަދަ ތަންތަނުން ދުން އަރަމުންދާ މަންޒަރު ފެނުމާއެކު، މުޅި ސަރަހައްދަށާއި ދުނިޔޭގެ ބާޒާރުތަކަށް ވަނީ ސިހުން ލިބިފަ އެވެ.
މީގެ އިތުރުން، އީރާނާ ދެކޮޅަށް ކުރަމުންދާ ހަނގުރާމައިގެ އާ ފިޔަވަޅެއްގެ ގޮތުން، ހޫތީންނާ ދެކޮޅަށް ސައުދީން ދޭ ހަމަލާތަކުގައި އެމެރިކާ ބައިވެރިވާނެތޯ ނިންމުމުގެ މަރުހަލާގައި ހުންނެވި ރައީސް ޑޮނަލްޑް ޓްރަމްޕަށް ވެސް މިކަމުގެ ސަބަބުން ވަނީ ގިނަ ސުވާލުތަކެއް ކުރިމަތިވެފަ އެވެ.
ހޫތީން ކުރިން ބުނެފައިވާ ގޮތުގައި، އަރަމްކޯގެ ހެޑްކުއާޓަރު ހުންނަ ދަހްރާން ސިޓީއަށް އަމާޒުކޮށް އެ ޖަމާއަތުން ވަނީ ބެލިސްޓިކް މިސައިލް ހަމަލާތަކެއް ދީފަ އެވެ. ސައުދީގެ އެނާޖީ މިނިސްޓްރީން ރިޕޯޓްކޮށްފައިވާ ގޮތުގައި، އަރަމްކޯގެ އިދާރީ އިމާރާތެއްގައި ވަނީ "ކުޑަ އަލިފާނުގެ ހާދިސާއެއް" ހިނގާފަ އެވެ.
ބުދަ ދުވަހު ސައުދީ ސިވިލް ޑިފެންސުން ބުނި ގޮތުގައި، ވެރިރަށް ރިޔާދަށް އަމާޒުކޮށް ފޮނުވާލި ހަމަލާއެއް ދިފާއުކުރުމުގެ ތެރޭގައި ވެއްޓުނު ބައިތަކުން އަރަބި ގައުމަކަށް ނިސްބަތްވާ ބިދޭސީއަކަށް ވަނީ އަނިޔާވެފަ އެވެ. ސަރުކާރުގެ ރަސްމީ ނިއުސް އެޖެންސީ "އެސްޕީއޭ" އިން އާންމުކުރި ފޮޓޯތަކުން ފެންނަ ގޮތުގައި، އުޅަނދެއްގެ ކުރީކޮޅުގައި ބޮޑު ސިލިންޑަރެއް ކަހަލަ އެއްޗެއް ހަރުވެފައި ހުރިއިރު، އިމާރާތަކަށް ވެސް ވަނީ ގެއްލުން ލިބިފަ އެވެ.
ހޫތީންނާ ދެކޮޅަށް ހަނގުރާމަކުރާ ސައޫދީ އިސްވެ އޮންނަ އަސްކަރީ ކޯލިޝަނުން ބުނީ، ރިޔާދަށް އަމާޒުކޮށް ފޮނުވާލި ކްރޫޒް މިސައިލާއި ބެލިސްޓިކް މިސައިލް އަދި ޑްރޯންތައް ހުއްޓުވާފައިވާ ކަމަށެވެ. މީގެ އިތުރުން ދަހްރާނަށް އަމާޒުކުރި ބެލިސްޓިކް މިސައިލަކާއި، ޕްރިންސް ސުލްތާން އެއާ ބޭސް އަދި ސަރުކާރުގެ އަސްކަރީ ސިނާއަތްތަކާ ބެހޭ ކުންފުނި ހުންނަ އަލް-ޚަރްޖަށް އަމާޒުކޮށް ފޮނުވާލި ކްރޫޒް މިސައިލެއް ވެސް ކާމިޔާބުކަމާއެކު ވައްޓާލާފައިވާ ކަމަށް ކޯލިޝަނުން ބުންޏެވެ.
