ބާޒާރުގައި ދައުރުވަމުންދާ ފަސް ރުފިޔާގެ ނޫޓުތައް ބާވެ ހަލާކުވުމުގެ ސަބަބުން ކުދި ފައިސާގެ ދަތިކަން ކުރިމަތިވެފައިވާތީ، އެ މައްސަލަ ހައްލުކުރުމަށްޓަކައި ފަސް ރުފިޔާގެ އާ ނޫޓުތަކެއް ރާއްޖެ ގެނެސް މާދަމާއިން ފެށިގެން ދައުރުކުރަން ފަށާނެ ކަމަށް މޯލްޑިވްސް މަނިޓަރީ އޮތޯރިޓީން ހާމަކޮށްފި އެވެ.
މިއީ ރަންދިހަފަހެއް ނޫޓު ސީރީޒްގެ ފަސް ރުފިޔާގެ ނޫޓު ދެހާސް ސަތާރަ ވަނަ އަހަރު އަލަށް ތައާރަފުކުރި ފަހުން، އެ ނޫޓުގެ އާ ސްޓޮކެއް ރާއްޖެއަށް ގެނައި ފުރަތަމަ ފަހަރެވެ.
މަރުކަޒީ ބޭންކުން މައުލޫމާތު ދޭ ގޮތުގައި، އިގްތިސާދުގައި އުފެދޭ ނަގުދު ފައިސާގެ ޑިމާންޑާ އެއްވަރަށް ނޫޓު ފޯރުކޮށްދިނުމަކީ އެ އޮތޯރިޓީން އަބަދުވެސް ހާއްސަ އިސްކަމެއް ދީގެން ކުރަމުންދާ މަސައްކަތެކެވެ.
ފަސް ރުފިޔާގެ ނޫޓަކީ އާންމު ވިޔަފާރިތަކާއި ކޮންމެ ދުވަހެއްގެ މުއާމަލާތްތަކުގައި އެންމެ ގިނައިން ބޭނުންކުރާ އެއް ނޫޓަށް ވާއިރު، އެމްއެމްއޭ އިން ދަނީ ބޭންކުތަކާއި އާންމުންނަށް ބޭނުންވާ މިންވަރަށް މި ފައިސާ ފޯރުކޮށްދެމުންނެވެ.
ނަމަވެސް، ފަހަކަށް އައިސް ބާޒާރުގައި ފަސް ރުފިޔާގެ ނޫޓު ވަރަށް ބޮޑަށް މަދުވެފައިވާކަން ފާހަގަކުރެވިފައިވެ އެވެ. އެމްއެމްއޭ އިން ބުނި ގޮތުގައި މިކަން މިހެން ދިމާވީ ބާޒާރުގައި މިހާރު ދައުރުވަމުންދާ ނޫޓުތައް ބާވެ ހަލާކުވުމުގެ އިތުރުން، ވިޔަފާރި ބޭންކުތައް މެދުވެރިކޮށް މަރުކަޒީ ބޭންކަށް ފަސް ރުފިޔާގެ ނޫޓު ޖަމާކުރާ މިންވަރު ދަށްވުމުގެ ސަބަބުންނެވެ. އޭގެ ސަބަބުން އެ އޮތޯރިޓީގައި ހުރި ފަސް ރުފިޔާގެ ސްޓޮކް ވަނީ ވަރަށް ބޮޑަށް މަދުވެފަ އެވެ.
އަލަށް ދައުރުކުރުމަށް ނެރޭ ފަސް ރުފިޔާގެ ނޫޓުތަކުގައި ބައެއް ބަދަލުތައް ހިމަނާފައިވެ އެވެ. އެގޮތުން މި ނޫޓުގައި ދިވެހި ރުފިޔާގެ ރަސްމީ ނިޝާން ހިމަނާފައިވެ އެވެ. އޭގެ އިތުރުން، މި ނޫޓުތަކުގައި ސޮއިކުރައްވާފައިވަނީ އެމްއެމްއޭގެ މިހާރުގެ ގަވަރުނަރު އަހްމަދު މުނައްވަރު އެވެ.
އާ ސްޓޮކެއް ދައުރުކުރަން ފެށި ނަމަވެސް، މިހާރު ބާޒާރުގައި ބޭނުންކުރަމުންދާ ފަސް ރުފިޔާގެ ނޫޓުތައް ވެސް ސައްހަ އެއްޗެއްގެ ގޮތުގައި ދެމިއޮންނާނެ ކަމަށް އެމްއެމްއޭ އިން ބުނެ އެވެ. އެހެންކަމުން އާ ނޫޓާއެކު ކުރީގެ ނޫޓުތައް ވެސް ވިޔަފާރީގެ މުއާމަލާތްތަކުގައި ބޭނުންކުރެވޭނެ އެވެ.
