ފައިސާގެ މުއާމަލާތްތައް ކުރުމުގެ މަގުފަހިކޮށްދޭ ފަރާތްތަކުން އަމަލުކުރަންޖެހޭ "ޕޭމަންޓް ޚިދުމަތްތަކާބެހޭ ގަވާއިދު" އަށް އިސްލާހުތަކެއް ގެނެސް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ސަރުކާރުގެ ގެޒެޓްގައި ޝާއިއުކޮށްފިއެވެ.ޕޭމަންޓް ސާވިސް ޕްރޮވައިޑަރުން (ޕީއެސްޕީ) ގެ ގަވާއިދަށް ގެނެސްފައިވާ އިސްލާހުތަކުގެ ތެރޭގައި ޕޭމަންޓް އެކުއަޔަރ ކުރުމުގެ ހިދުމަތްދޭ ފަރާތްތަކުން، މުއާމަލާތަކާ ގުޅޭ ފައިސާ މަސައްކަތު ދެ ދުވަހުގެ ތެރޭގައި ބެނެފިޝިއަރީގެ ދިވެހިރާއްޖޭގެ ބޭންކު އެކައުންޓަށް ލިބޭނެ އިންތިޒާމު ހަމަޖައްސަންޖެހޭނެ އެވެ.
ޕޭމަންޓް ހިދުމަތް ދިނުމުގެ ލައިސަންސް އޮންނަ ފަރާތްތަކުން ހުރިހާ ވަގުތެއްގައިވެސް ރައުސްމާލުގެ ގޮތުގައި މަދުވެގެން ބަހައްޓަންޖެހޭ އަދަދުތަކަށް ބަދަލުތަކެއް ވަނީ ގެނެސްފަ އެވެ. އެގޮތުން، އިލެކްޓްރޯނިކް މަނީ އިޝޫކުރުމާއި، ޕޭމަންޓް މުއާމަލާތްތައް އެކުއަޔަރ ކުރުން އަދި ރެމިޓެންސްގެ ޚިދުމަތް ދިނުމަށް ލައިސަންސް ލިބިފައިވާ ފަރާތްތަކުގެ މިނިމަމް އަންއިމްޕެއަރޑް ކެޕިޓަލްގެ އަދަދު ވަނީ ދެ މިލިއަން ރުފިޔާއަށް އިތުރުކޮށްފަ އެވެ.
ޕޭމަންޓް އިނީޝިއޭޝަން ހިދުމަތާއި އެކައުންޓް އިންފޮމޭޝަން ފޯރުކޮށްދިނުމުގެ ހިދުމަތް ދޭ ފަރާތްތަކުގެ މިނިމަމް އަންއިމްޕެއާޑް ކެޕިޓަލްގެ އަދަދު ވަނީ އެއް މިލިއަން ރުފިޔާއަށް އިތުރުކޮށްފަ އެވެ.
އެމްއެމްއޭއިން މައުލޫމާތު ދޭ ގޮތުގައި، ރައުސްމާލުގެ މިންގަނޑުތަކަށް މި ބަދަލުތައް ގެނައުމުގެ މައިގަނޑު ބޭނުމަކީ ލައިސަންސް ދޫކޮށްފައިވާ މުއައްސަސާތަކަށް ލިބޭ ގެއްލުންތަކުން އަރައިގަނެ، ރައްކާތެރިކަމާއެކު މެދުނުކެނޑި ހިދުމަތް ދެވޭނެ މާލީ ގާބިލުކަން ހުރިކަން ކަށަވަރުކުރުމެވެ. މީގެ އިތުރުން މާލީ ދާއިރާގައި ހަރަކާތްތެރިވަނީ މާލީގޮތުން ދުޅަހެޔޮ، ޒިންމާދާރު މުއައްސަސާތަކެއްކަން ކަށަވަރުކޮށް، މާލީ ނިޒާމަށް އޮންނަ އާންމުންގެ އިތުބާރު ދެމެހެއްޓުމަކީވެސް މި އިސްލާހުތަކުގެ މަގުސަދެކެވެ.
