ފްރާންސްގެ އެތައް ސަތޭކަ ސުޕަމާކެޓަކަށް ދިން ސައިބާ ހަމަލާއެއްގައި، އެ ތަންތަނުގެ ފިނިކުރާ ނިޒާމުތަކާއި އައިސްއަލަމާރިތަކުގެ ހޫނުމިން މަތިވުމުގެ ސަބަބުން، މިލިއަނުން ޔޫރޯގެ އަގުހުރި ތާޒާ ކާބޯތަކެއްޗާއި ގަނޑުކުރި ތަކެތި ހަލާކުވެއްޖެ އެވެ.
ހެކަރުން ވަނީ ސުޕަމާކެޓްތަކުގެ ފިނިކުރާ ނިޒާމުތަކުގެ ހޫނުމިން ކޮންޓްރޯލްކުރާ ސޮފްޓްވެއާގެ ބާރު ހޯދައި، އެއްރޭ ތެރޭގައި ބައެއް ޔުނިޓްތަކުގެ ހޫނުމިން 50 ޑިގްރީ ސެލްސިއަސް އަށް މަތިކޮށްފަ އެވެ.
ކޯޕަރޭޓިވް ޔޫ ގެ ޗީފް އެގްޒެކެޓިވް ވިދާޅުވީ، އެ ކުންފުނީގެ ދަށުން ހިންގާ ބައެއް ސުޕަމާކެޓްތަކަށް އަމާޒުކޮށް ދިން މި ހަމަލާއަކީ "އިންތިހާއަށް ސީރިއަސް އަދި މީގެ ކުރިން ދުވަހަކުވެސް ކުރިމަތިވެފައި ނުވާ ފަދަ" ހަމަލާއެއް ކަމަށެވެ.
އޭއެފްޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި، ކޯޕަރޭޓިވް ޔޫގެ 100 އަށްވުރެ ގިނަ ސުޕަމާކެޓަކަށް މި ހަމަލާ އަމާޒުވެފައިވާއިރު، އިންޓަމާޝޭ އާއި އެ ކުންފުނީގެ ނެޓޯ ބްރޭންޑްގެ މަދުވެގެން 300 ފިހާރައަކަށް ވަނީ މިކަމުގެ އަސަރުކޮށްފަ އެވެ.
މީގެ އިތުރުން ކެރެފޯ، މޮނޮޕްރިކްސް އަދި އީ.ލެކްލާކް ފަދަ ފްރާންސްގެ ބޮޑެތި ރީޓެއިލް ކުންފުނިތަކަށް ވެސް މި ހަމަލާގެ އަސަރުކޮށްފައިވެ އެވެ. މި ހަމަލާ އަމާޒުކޮށްފައިވަނީ ޑެންމާކުގެ އިންޖިނިއަރިން ކުންފުންޏެއް ކަމަށްވާ ޑެންފޮސް އިން ފޯރުކޮށްދޭ ސޮފްޓްވެއާއަކަށެވެ.
މި ސޮފްޓްވެއާއަކީ ސުޕަމާކެޓްތަކުގައި ހުންނަ ފިނިކުރާ ނިޒާމުތައް ދުރުގައި ތިބެގެން ބެލެހެއްޓުމަށް ބޭނުންކުރާ ސޮފްޓްވެއާއެކެވެ.
އާންމު އުސޫލުން ސުޕަމާކެޓްތަކުގެ ފިނިކުރާ ނިޒާމުތަކަކީ ރޭގަނޑު ވަގުތު ކުޑަ ވަގުތުކޮޅަކަށް އައިސް ވިރުވުމަށްޓަކައި ހޫނުމިން ކުޑަކޮށް މަތިވާ ގޮތަށް ހުންނަ އެއްޗެހި ނަމަވެސް، މި ހަމަލާގައި ހެކަރުން ވަނީ އެ ޔުނިޓްތަކުގެ ހޫނުމިން ވަރަށް ބޮޑަށް މަތިކޮށް، އެގޮތުގައި ހިފަހައްޓާފަ އެވެ.
ޑެންފޮސް ކުންފުނިން ބުނި ގޮތުގައި މި ހަމަލާގެ އަސަރުކޮށްފައިވަނީ އެ ކުންފުނީގެ ކުރީގެ މޮޑެލްތަކުގެ ޔުނިޓްތަކަށެވެ. އެ ޔުނިޓްތަކުގައި ހުރި ސެކިއުރިޓީ މައްސަލަތައް ހައްލުކުރުމަށްޓަކައި ސޮފްޓްވެއާ އަޕްޑޭޓް ކުރެވޭނެ ގޮތެއް ނެތުމުން، މިފަދަ ނުރައްކަލަކުން ސަލާމަތްވުމަށް ވަނީ ހުރަސްތަކެއް ކުރިމަތިވެފަ އެވެ.
މި ހަމަލާގެ ސަބަބުން ލިބުނު ގެއްލުމުގެ ފުރިހަމަ ތަފްސީލެއް އަދި ސާފެއް ނުވެ އެވެ. ނަމަވެސް އެކި ކުންފުނިތަކުން ލިބިފައިވާ މައުލޫމާތަށް ބަލާއިރު، ފްރާންސްގެ 15،000 އެއްހާ ފިހާރައިގެ ތެރެއިން ގާތްގަނޑަކަށް 500 ފިހާރައަކަށް މި ހަމަލާގެ އަސަރުކޮށްފައިވާ ކަމަށް ބެލެވެ އެވެ.
ފްރާންސްގެ ޕްރޮސިކިއުޓަރުން މިހާރު ވަނީ މި ހާދިސާއާ ގުޅިގެން ސައިބާ ކުށުގެ ހާއްސަ ތަހުގީގެއް ފަށާފަ އެވެ. ޕެރިސްގެ ޕްރޮސިކިއުޓަރުގެ އޮފީހުން މި ހާދިސާ ސިފަކޮށްފައިވަނީ "ފްރާންސްގެ ބޮޑެތި ރީޓެއިލް ކުންފުނިތަކުގެ ފިނިކުރާ ނިޒާމުތަކަށް އަމާޒުކޮށް ދީފައިވާ ފުޅާދާއިރާއެއްގެ ސައިބާ ހަމަލާއެއް" ގެ ގޮތުގަ އެވެ.
