ފާއިތުވި ދުވަސްތަކުގައި ފުލުހުންނާއި ދަރިވަރުންނާ ދެމެދު ހިނގި ކުރިމަތިލުންތަކާ ގުޅިގެން، ފަރަންސޭސިވިލާތުގެ 500 އެއްހާ ސްކޫލް ބަންދުކޮށްފި އެވެ.
އެޑިއުކޭޝަން މިނިސްޓަރު އެޑްވާޑް ގެފްރޭ ވިދާޅުވީ، ސަލާމަތީ ކަންކަން ފުރިހަމަވެފައި ނުވާތީ 400 އާއި 500 އާ ދެމެދުގެ އަދަދެއްގެ ހައި ސްކޫލްތަކުގެ ކިޔެވުން މުޅިން ނުވަތަ ބައެއް ގަޑިތަކަށް މެދުކަނޑާލާނެ ކަމަށެވެ.
މީގެ އިތުރުން، މުޒާހަރާތައް ފެށުނު ފަހުން މިހާތަނަށް 24 ސްކޫލެއްގައި ރޯކޮށްލައި ނުވަތަ އެ ތަންތަނަށް ބޮޑެތި ގެއްލުންތަކެއް ދީފައިވާ ކަމަށް ވެސް އޭނާ ވިދާޅުވި އެވެ.
ތައުލީމީ ފެންވަރު ދަށްވުމާ ގުޅިގެން އެތައް ހާސް ދަރިވަރުންނެއް މުޒާހަރާ ކުރަމުންދާއިރު، މިދިޔަ ހަފުތާގައި ޕެރިހުން ފެށުނު މި މުޒާހަރާތައް މިހާރު ވަނީ މޮންޕެލިއޭ، ނޯންޓް އަދި މާސޭ ފަދަ އެހެން ސިޓީތަކަށް ވެސް ފެތުރިފަ އެވެ.
ހައި ސްކޫލް ދަރިވަރުންނާއި އެހެނިހެން ފަރާތްތަކުން މުޒާހަރާ ކުރަމުންދަނީ ޓީޗަރުން މަދުވުމާއި، ކްލާސްރޫމްތަކުގައި ކުދިން ގިނަވުމުގެ އިތުރުން ސްކޫލް އިމާރާތްތައް ބޭނުންނުކުރެވޭ ވަރަށް ބާވެފައިވާތީ އެކަމާ ދެކޮޅަށެވެ.
ފަރަންސޭސި ޖަސްޓިސް މިނިސްޓަރު ޖެރަލްޑް ޑާމަނިން ހުކުރު ދުވަހު ވިދާޅުވި ގޮތުގައި، އެ ގައުމުގެ 3،700 ސްކޫލްގެ ތެރެއިން 735 ސްކޫލަކަށް މި ހަމަނުޖެހުންތަކުގެ އަސަރު އެކި ގޮތްގޮތުން ވަނީ ކޮށްފަ އެވެ.
ފަރަންސޭސި އިންޓީރިއާ މިނިސްޓަރު ލޯރެންޓް ނޫނޭޒް ވިދާޅުވި ގޮތުގައި، ހުކުރު ދުވަހު އެކަނިވެސް 1،747 މީހުން ވަނީ ހައްޔަރުކޮށްފަ އެވެ.
އޭއެފްޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި، މި ހަރަކާތް ފެށުނު ފަހުން މިހާތަނަށް ޖުމްލަ 5،000 އަށްވުރެ ގިނަ މީހުން ހައްޔަރުކޮށްފައިވާއިރު، އޭގެ ތެރެއިން 85 އިންސައްތައަކީ ކުޑަކުދިންނެވެ.
ސަރުކާރުން އެކަށީގެންވާ ފިޔަވަޅުތަކެއް އަޅަމުން ނުދާ ކަމަށް ތުހުމަތުކޮށް، އަންގާރަ ދުވަހު ވެސް މުޒާހަރާތައް ކުރިއަށް ގެންދިއުމަށް މުޒާހަރާ އިންތިޒާމުކުރާ ފަރާތްތަކުން ގޮވާލާފައިވާ ކަމަށް އޭއެފްޕީން ބުނެ އެވެ.
ފަރަންސޭސި ބޮޑުވަޒީރު ސެބަސްޓިއަން ލެކޯނޫ އާދިއްތަ ދުވަހު ވިދާޅުވީ، ހައި ސްކޫލް ދަރިވަރުންނާއި ތައުލީމީ ދާއިރާގެ މުވައްޒަފުންނަށް ކުރިމަތިވެފައިވާ ދަތިތަކަށް ހައްލެއް ހޯދުމަށް ސަރުކާރުން އިތުރު ފިޔަވަޅުތައް އަޅަމުންދާ ކަމަށެވެ.
