ކެނެޑާ އާއި ހެއިޓީއަށް ނިސްބަތްވާ މަޝްހޫރު ލިޔުންތެރިއަކު އޭނާގެ ފުރަތަމަ ވާހަކަ ލިޔުމަށް އާޓިފިޝަލް އިންޓެލިޖެންސް (އޭއައި) ބޭނުންކުރި ކަމަށް ތުހުމަތުކުރުމާ ގުޅިގެން، ފަރަންސޭސިވިލާތުގެ އަދަބީ ދާއިރާގައި ބޮޑު ނުތަނަވަސްކަމެއް އުފެދިއްޖެ އެވެ.
އުމުރުން 38 އަހަރުގެ ތޭލީސަން އޮރޭލިއަން ލިޔުނު "ސެޓައިޓް ސާ އޫ މޫރީ" (އެ ގޮތް ނޫނީ މަރު) ނަމަކަށް ކިޔާ ފޮތަށް ދާދި ފަހުން ވަނީ އަދަބީ މޫސުމުގެ ފުރަތަމަ އެވޯޑު ކަމަށްވާ "ޕްރީ ޑޫ ރޯމަން ފްނެކް" ލިބިފަ އެވެ.
މީގެ އިތުރުން، ފަރަންސޭސި ބަހުން ދެވޭ އެންމެ ޝަރަފުވެރި އަހަރީ އެވޯޑުތައް ކަމަށްވާ "ގޮންކޯޓް" އަދި "ރެނޯޑޯ" އެވޯޑުގެ ފައިނަލިސްޓުންގެ ތެރޭގައި ވެސް އޭނާ ހިމެނެ އެވެ. މި އެވޯޑުތައް ދިނުމަށް ހަމަޖެހިފައިވަނީ ކުރިއަށް އޮތް ދުވަސްތަކުގަ އެވެ.
ނަމަވެސް، "ބެލެންސް ޓޮން ކްލޯޑް" ކިޔާ ގްރޫޕަކުން މިދިޔަ އަންގާރަ ދުވަހު ބުނީ، އެ ފޮތަކީ "ގާތްގަނޑަކަށް އެއްކޮށް" އޭއައި ބޭނުންކޮށްގެން ލިޔެފައިވާ ފޮތެއް ކަމަށެވެ. އެކަމަކު ލިޔުންތެރިޔާ ވަނީ އެ ތުހުމަތުތައް ދޮގުކޮށްފަ އެވެ.
އެކްސްގައި އެ ގްރޫޕުން ބުނެފައިވަނީ، ފޮތުގެ އެކި ބައިތަކުން ގިނަ ޕެސެޖުތަކެއް ޓެސްޓުކުރިއިރު، އެ ހުރިހާ ބަޔަކުން ވެސް ލިބުނީ އެއް ނަތީޖާއެއް ކަމަށާއި، އެއީ 100 އިންސައްތަ އޭއައި ކަމަށެވެ.
މެންބަރުންނަކީ ކޮބައިކަން ސާފުނުވާ އެ ގްރޫޕުން ބުނާ ގޮތުގައި، މިކަން ދެނެގަތީ "ޕެންގްރާމް" ކިޔާ ޕްރޮގްރާމަކުންނެވެ. އެއީ މިހާތަނަށް އެންމެ ސައްހަ ނަތީޖާ ދޭ، އަދި ކުށް ދެއްކުމުގެ ފުރުސަތު ނިސްބަތުން ވަރަށް ކުޑަ ޕްރޮގްރާމެއް ކަމަށް ވެސް އެ ގްރޫޕުން ބުނެ އެވެ.
ހެއިޓީއަށް އުފަންވެ، 2010 ވަނަ އަހަރު މޮންޓްރިއަލްއަށް ހިޖުރަކުރި އޮރޭލިއަން ވަނީ ވަގުތުން އެ ތުހުމަތުތައް ދޮގުކޮށްފަ އެވެ.
"ލިބަރޭޝަން" ނޫހަށް ދިން އިންޓަވިއުއެއްގައި އޭނާ ބުނީ، އޭނާއަކީ އަބަދުވެސް އަމިއްލަ އުފެއްދުންތެރިކަމާއި އަދަބިއްޔާތަށް ލޯބިކުރާ މީހެއް ކަމަށާއި، މެޝިނެއް ބޭނުންކުރަން ޖެހޭ އެއްވެސް ސަބަބެއް ނުފެންނަ ކަމަށެވެ. އަދި އެ ފޮތަކީ އަމިއްލަ މަސައްކަތެއްކަން ސާބިތުކޮށްދިނުމަށް އެޑިޓަރާ ގުޅިގެން "ލިޔެކިޔުންތައް ތައްޔާރުކުރަމުންދާ" ކަމަށް ވެސް އޭނާ ބުންޏެވެ.
އޭނާ އިތުރަށް ބުނީ، އޭނާގެ އުސޫލުތަކަކީ ހެއިޓީ އާއި ކެރީބިއަން ސަގާފަތާ ގުޅިފައިވާ ކަންތައްތަކެއް ކަމަށާއި، ފޮތުގައި ބޭނުންކޮށްފައިވާ ސިފަކުރުންތަކާއި، ތަކުރާރުކުރުންތަކާއި، ބަހުގެ ރޫހަކީ އޭނާގެ އަމިއްލަ އުފެއްދުންތަކެއް ކަމަށެވެ.
އެ ފޮތް ޝާއިއުކުރި "ގްރާސެޓް" ޕަބްލިޝިން ހައުސްއިން ވެސް ވަނީ އޭނާގެ ދިފާއުގައި ވާހަކަދައްކާފަ އެވެ. އެ ތަނުން ބުނީ، މިއީ އާދަޔާ ހިލާފު ދިރިއުޅުމުގެ ތަޖުރިބާތަކެއް ހުރި ލިޔުންތެރިއަކަށް ކުރެވޭ ވަރަށް އިހާނެތި ތުހުމަތުތަކެއް ކަމަށާއި، އޭނާގެ އުފެއްދުމަކީ އަމިއްލަ ވަރުގަދަ މަސައްކަތެއް ކަމަށެވެ.
މި ފޮތް ބިނާވެފައިވަނީ ހެއިޓީގައި ހިނގަމުންދާ ގޭންގު މާރާމާރީތަކުން ސަލާމަތްވުމަށް ފިލައިގެންދާ މުދައްރިސެއްގެ ދިރިއުޅުމުގެ މައްޗަށެވެ. އަދި އޭނާ ކެނެޑާއަށް ގޮސް، "ބިރުވެރިކަމެއް ނެތި ނޭވާލުމުގެ ހައްގު" އަލުން ހޯދުމާ ހަމައަށް ކުރިމަތިވި ކަންތައްތައް މި ފޮތުގައި ކިޔައިދެ އެވެ.
ދިރާސާތަކުން ދައްކާ ގޮތުގައި، އޭއައި ދެނެގަންނަ ޕްރޮގްރާމްތަކުން އިންސާނުން ލިޔާ ލިޔުންތަކަކީ އޭއައި ލިޔުންތަކެއް ކަމަށް ނުބައިކޮށް ދައްކަފާނެ އެވެ. އަދި އޭއައި އިން ލިޔެފައިވާ ލިޔުމެއްގައި ބަދަލުތަކެއް ގެނެސްފައިވާނަމަ، އެއީ އޭއައި ލިޔުމެއްކަން ދެނެގަންނަން އެ ޕްރޮގްރާމްތަކަށް ނޭނގިދާނެ އެވެ.
ބައެއް ފަރާތްތަކުން ބުނާ ގޮތުގައި، މި ޕްރޮގްރާމްތައް ހަދާފައިވަނީ އިނގިރޭސި ނުވަތަ ފަރަންސޭސި ބަހުގެ މިންގަނޑުތަކަށް ބަލައިގެން ކަމަށްވާތީ، ކެރީބިއަން ފަދަ ސަރަހައްދުތަކުގެ ބަހުރުވަ ބޭނުންކޮށްގެން ލިޔެފައިވާ ލިޔުންތައް އެ ވަސީލަތްތަކަށް ރަނގަޅަށް ދެނެއެއް ނުގަނެވޭނެ އެވެ.
ނަމަވެސް "ބެލެންސް ޓޮން ކްލޯޑް" ގެ ފަހަތުގައި ތިބި މީހުން ބުނަނީ، "ޕެންގްރާމް" އިން ނުބައި ނަތީޖާއެއް ދައްކަނީ ކޮންމެ 24،400 ފަހަރަކުން އެންމެ ފަހަރަކު ކަމަށް ސާބިތުވެފައިވާ ކަމަށެވެ.
އޭއައި ބޭނުންކުރުން އާންމުވަމުންދާ މި ދަނޑިވަޅުގައި، "ސެޓައިޓް ސާ އޫ މޫރީ" އާ މެދު އުފެދިފައިވާ މި ބަހުސަކީ، އިންސާނުންގެ އުފެއްދުންތެރިކަމާއި އޭއައިގެ އެހީތެރިކަން ބޭނުންކުރުމުގައި ބަލައިގަނެވޭނެ މިންގަނޑަކީ ކޮބައިތޯ ކުރެވޭ ބަހުސަށް އިތުރުވި ބޮޅެކެވެ. ސަބަބަކީ ލިޔުންތެރިން އޭއައި ބޭނުންކޮށްގެން ލިޔުމެއް އުފެއްދުމަށްފަހު އަމިއްލައަށް ބަދަލުކުރުން ނުވަތަ އަމިއްލައަށް ލިޔުމަށްފަހު އޭއައި މެދުވެރިކޮށް ރިވިއުކުރުމަކީ ވެސް ވެދާނެ ކަމަކަށްވާތީ އެވެ.
