ފްރާންސްގެ އެކި ކަންކޮޅުތަކުގައި ހުންނަ ސާނަވީ މަދަރުސާތަކުގެ ދަރިވަރުން އަންގާރަ ދުވަހު ކުރި މުޒާހަރާތަކާ ގުޅިގެން 400 އަށްވުރެ ގިނަ މީހުން ހައްޔަރުކޮށްފައިވާ ކަމަށާއި، އޭގެ ތެރޭގައި ގިނައީ ކުޑަކުދިން ކަމަށް އެ ގައުމުގެ އިންޓީރިއާ މިނިސްޓަރު ވިދާޅުވެއްޖެ އެވެ.
ޕެރިހުން ފެށިގެން ދިޔަ މި މުޒާހަރާތަކުގައި ފާއިތުވި ދުވަސްތަކުގައި ފުރާވަރުގެ ކުދިން ވަނީ މަދަރުސާތަކަށް ނުވަދެވޭ ގޮތަށް ބަންދުކޮށްފަ އެވެ. މި އިހުތިޖާޖުތަކަކީ ކްލާސްތަކުގައި ކުދިން ގިނަވުމާއި މުދައްރިސުން މަދުވުމުގެ މައްސަލަތަކާ ގުޅިގެން ކުރިއަށްދާ މުޒާހަރާތަކެކެވެ.
އަންގާރަ ދުވަހުގެ މުޒާހަރާތަކުގައި މަދުވެގެން 10 މުދައްރިސަކަށާއި، ބައެއް ދަރިވަރުންގެ އިތުރުން ތަންފީޒީ އިދާރާތަކުގެ 48 އޮފިސަރަކަށް އަނިޔާވެފައިވާ ކަމަށް އޮފިޝަލުން ވިދާޅުވި އެވެ. އެ ގައުމުގެ އެޑިއުކޭޝަން މިނިސްޓްރީން ހާމަކުރި ގޮތުގައި މި މުޒާހަރާތަކުގެ އަސަރު މަދުވެގެން 400 މަދަރުސާއަކަށް ވަނީ ކޮށްފަ އެވެ.
މުޒާހަރާގެ ބައިވެރިން ރޯކޮށް، ބަސް ހުއްޓިތަކަށް ގެއްލުން ދޭ މަންޒަރު ފެންނަ ފޮޓޯ އާއި ވީޑިއޯތައް ވަނީ އާންމުވެފަ އެވެ.
އޭއެފްޕީ ނިއުސް އެޖެންސީއާ ވާހަކަދެއްކި އުމުރުން 16 އަހަރުގެ އަންހެން ދަރިވަރަކު ބުނީ، އެ ކުދިން ނުކުމެ ތިބީ މެސެޖެއް ދިނުމަށް ކަމަށާއި، އެއްވެސް ބޭނުމެއް ނެތި ތަންތަން ސުންނާފަތި ކުރަން ނޫން ކަމަށެވެ. އަދި ތައުލީމީ ނިޒާމު މުޅިން ހަރާބުވެފައިވާ ކަމަށާއި، ކޮންމެ ކްލާހެއްގައި 34 ކުދިން ތިބޭއިރު އެއީ އުނގަންނައިދިނުމަށް އެކަށީގެންވާ މާހައުލެއް ނޫން ކަމަށާއި، މުދައްރިސުންނަށް އޮތް މަސައްކަތުގެ ބުރަ ބޮޑުވެފައިވާ ކަމަށް ވެސް އޭނާ ބުންޏެވެ.
ފްރާންސްގެ އެޑިއުކޭޝަން މިނިސްޓަރު އެޑްވާޑް ގެފްރޭ އެކްސްގައި ކުރެއްވި ޕޯސްޓެއްގައި ވިދާޅުވީ، މުޒާހަރާ ކުރުމުގެ ހައްގު ދަރިވަރުންނަށް އޮތް ނަމަވެސް، ހިންގަމުންދާ ހަމަނުޖެހުންތަކަކީ އެއްވެސް ގޮތަކަށް ބަލައިގަނެވޭނެ ކަންކަމެއް ނޫން ކަމަށެވެ.
ފްރާންސްގެ މީޑިއާތަކުން ރިޕޯޓްކޮށްފައިވާ ގޮތުގައި މުޒާހަރާގެ ބައިވެރިން ފުލުހުންނާ ދިމާލަށް އެކި އެއްޗެހި އުކާފައިވާއިރު، ފުލުހުން ވަނީ ބާރުގެ ބޭނުންކޮށް ކަރުނަގޭސް ޖަހާފަ އެވެ.
ދަރިވަރުން ތަމްސީލުކުރާ ޔޫނިއަން ސިންޑިކޭލް ލައިސީންގެ ރައީސް ރިޔާދު ރާނީ އޭއެފްޕީއަށް ދިން އިންޓަވިއުއެއްގައި ވަނީ، ފްރާންސް ސަރުކާރުން ދަރިވަރުންނަށް ނުފޫޒު ފޯރުވައި ބިރުދައްކަމުންދާ ކަމަށާއި ފުލުހުން އިންތިހާއަށް ބާރުގެ ބޭނުންކުރަމުންދާ ކަމަށް ތުހުމަތުކޮށްފަ އެވެ.
