ފްރާންސްގެ ސްކޫލެއްގެ ކައިރީގައި ފުލުހުންނާއި މުޒާހަރާގެ ބައިވެރިންނާ ދެމެދު ހިނގި ކުރިމަތިލުމެއްގައި 15 އަހަރުގެ ކުއްޖެއްގެ އަތަށް ބޮޑެތި ގެއްލުންތަކެއް ލިބިފައިވާ ކަމަށް އޮފިޝަލުން ބުނެފި އެވެ.
އޮފިޝަލުން ބުނީ މި "ސީރިއަސް ހާދިސާ" ހިނގާފައިވަނީ ހޯމަ ދުވަހުގެ ހެނދުނު އެ ގައުމުގެ އުތުރުގެ ސިޓީއެއް ކަމަށްވާ ލެންސްގައި ކަމަށެވެ.
އެ ކުއްޖާގެ ފުރާނައަށް ނުރައްކަލެއް ނެތް ކަމަށާއި، ހާދިސާ ހިނގިތާ "ކުޑައިރުކޮޅެއްގެ ތެރޭގައި" ކައިރީގައި ހުރި ހޮސްޕިޓަލަކަށް އެ ކުއްޖާ ބަދަލުކޮށްފައިވާ ކަމަށް އޮފިޝަލުން ބުންޏެވެ.
ސްކޫލް އިމާރާތްތަކުގެ ހާލަތު ދަށްވުމާއި މުވައްޒަފުން މަދުވުމާ ގުޅިގެން ދަރިވަރުން ކުރަމުންދާ މުޒާހަރާތަކުގައި ފާއިތުވި ދުވަސްތަކުގައި ފުލުހުންނާ ދެމެދު ކުރިމަތިލުންތަކެއް ހިނގާފައިވާއިރު، ހޯމަ ދުވަހު އެ ގައުމުގެ ގާތްގަނޑަކަށް 500 އެއްހާ ސްކޫލް ވަނީ ބަންދުކޮށްފަ އެވެ.
އެ ކުއްޖާއަށް އަނިޔާ ލިބުނު ގޮތާ މެދު ފްރާންސްގެ މީޑިއާތަކުން ދަނީ ތަފާތު ރިޕޯޓުތަކެއް ފަތުރަމުންނެވެ.
އޭއެފްޕީ ނިއުސް އެޖެންސީން ފުލުހުންގެ ޔޫނިއަންގެ މަސްދަރަކާ ހަވާލާދީ ރިޕޯޓުކޮށްފައިވާ ގޮތުގައި، މުޒާހަރާ ކޮންޓްރޯލްކުރާ ފުލުހުން އުކި "ސްޓިންގް-ބޯލް ގްރެނޭޑެއް" (ބާރުގަދަ އަޑަކާއެކު ގޮވާ އަތުބޮމެއް) އެ ކުއްޖާ ނެގި ވަގުތު އޭތި ވަނީ އަތަށް ގޮވާފަ އެވެ.
ނަމަވެސް، އެ ސަރަހައްދުގެ ނޫހެއް ކަމަށްވާ "ލާ ވޮއިސް ޑޫ ނޯޑް" އަށް މައުލޫމާތު ދެމުން، އެ ވަގުތު އެ ކުއްޖާގެ ކައިރީގައި ހުރި އަންހެން ކުއްޖަކު ބުނީ އެ ކުއްޖާ އެ ގްރެނޭޑް ނަގާފައެއް ނުވެ އެވެ.
މި ހާދިސާއާ ގުޅޭ ގޮތުން ސުވާލު ކުރުމުން ލެންސްގެ މޭޔަރު ސިލްވައިން ރޮބާޓް ވިދާޅުވީ، ހާދިސާ ހިނގި ގޮތް އަދި ސާފުކުރަން ޖެހޭ ކަމަށެވެ.
ސަރަހައްދީ ޕްރޮސިކިއުޓަރަކު ވިދާޅުވީ، ހިނގާދިޔަ ކަންތައްތައް ފުރިހަމައަށް ސާފުކުރުމަށްޓަކައި ފްރާންސްގެ ފުލުހުންގެ މައްސަލަތައް ބަލާ އިދާރާ ކަމަށްވާ "ޖެނެރަލް އިންސްޕެކްޝަން އޮފް ދަ ނޭޝަނަލް ޕޮލިސް" (އައިޖީޕީއެން) އިން މި މައްސަލަ ތަހުގީގު ކުރާނެ ކަމަށެވެ.
އެޑިއުކޭޝަން މިނިސްޓަރު އެޑްވާޑް ގެފްރޭ ވިދާޅުވި ގޮތުގައި، މުޒާހަރާތައް ފެށުނު ފަހުން މިހާތަނަށް މަދުވެގެން 190 ދަރިވަރުންނަށް ވަނީ އެކިވަރުގެ އަނިޔާ ލިބިފަ އެވެ.
މި މުޒާހަރާތައް ފެށުނީ ސެޕްޓެމްބަރު މަހުގެ ފަހުކޮޅު ޕެރިހުގަ އެވެ. އޭގެ ފަހުން މުޅި ގައުމަށް މި ހަރަކާތް ވަނީ ފެތުރިފަ އެވެ.
ހައިސްކޫލް ދަރިވަރުން ފެށި މި މުޒާހަރާތަކުގައި މައިގަނޑު ގޮތެއްގައި ޝަކުވާ ކުރަނީ ޓީޗަރުންނާއި މުވައްޒަފުން މަދުވުމާއި، ކްލާސްރޫމްތަކުގައި ކުދިން ގިނަވުމާއި، ސްކޫލް އިމާރާތްތައް ބާވެ ހަލާކުވަމުންދާތީއެވެ. ނިމިދިޔަ ހަފުތާގައި ޔުނިވާސިޓީ ދަރިވަރުން ވެސް ވަނީ މި ޑިމާންޑްތަކާއެކު މުޒާހަރާގައި ބައިވެރިވާން ފަށާފަ އެވެ.
އޭއެފްޕީން ރިޕޯޓުކުރާ ގޮތުގައި، މި ހަރަކާތް ފެށުނީއްސުރެ މިހާތަނަށް 5,000 އަށްވުރެ ގިނަ މީހުން ހައްޔަރުކޮށްފައިވާއިރު، އޭގެ ތެރެއިން 85 އިންސައްތައަކީ ކުޑަކުދިންނެވެ.
