ޔޫއޭއީގެ އީގަލް ހިލްސްއަށް ރަސްމާލެ ވިއްކާލުމާ ދެކޮޅަށް އަޑުއުފުލައި، އަމިއްލަ އެދުން ދޫކޮށް ގައުމުގެ ދިފާއުގައި ތެދުވުމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ގޮވާލައްވައިފި އެވެ.
"އެކްސް" ގައި އައްބާސް ކުރެއްވި ޕޯސްޓުތަކެއްގައި ވިދާޅުވީ، މިއަދު އަމިއްލަ އެދުމާއި، ވަގުތީ މަގާމާއި، މާއްދީ ދަހިވެތިކަމުގައި ހައްގު މަގު ދޫކޮށްލާ ކޮންމެ މީހަކު ހަނދާންކުރަންވީ މުހިންމު ހަގީގަތެއް އެބައޮތް ކަމަށެވެ. އަދި މިއަދު ނިންމާ ކޮންމެ ނިންމުމެއްގެ ހިތްދަތި ނަތީޖާ މާދަމާ މި ގައުމުގެ އަންނާން އޮތް ޖީލުތަކަށް ތަހައްމަލުކުރަން ޖެހިދާނެކަމުގެ އިންޒާރު އޭނާ ދެއްވިއެވެ.
"ގައުމާއި ދީނުގެ މަސްލަހަތަށްވުރެ އަމިއްލަ ފައިދާ އިސްކޮށް، ވެރިންގެ ނިންމުންތަކަށް ލޯމަރާލައިގެން ތިބޭ ތިބުމަކީ ތާރީހުގެ ކުރިމަތީގަ އާއި، މާތް الله ގެ ހަޟްރަތުގައި މާދަމާ ވަކިވަކިން ޖަވާބުދާރީވާންޖެހޭނެ ބޮޑު ޒިންމާއެއް،" އައްބާސް ވިދާޅުވި އެވެ.
"ދުނިޔެވީ ވަގުތީ އުފަލަށްވުރެ ގައުމީ ސިޔާދަތާއި ދީނީ އެއްބައިވަންތަކަން މާ މަތިވެރިވާނެ."
މީގެ އިތުރުން، ރޭ އިނގިރޭސި ބަހުން ކުރެއްވި ޕޯސްޓެއްގައި ވެސް އައްބާސް ވަނީ މި މޭރުމުން ވާހަކަދައްކަވާފައެވެ. އެގޮތުން، މިއަދު އަޅުގަނޑުމެން ނިންމާ ނިންމުންތަކުގެ ހިތްދަތި ނަތީޖާ މާދަމާގެ ޖީލުތަކުން ތަހައްމަލުކުރާނެ ކަމަށާއި، ވަގުތު ފާއިތުވުމުގެ ކުރިން ހޭލަންވެއްޖެ ކަމަށް އޭނާ ވިދާޅުވި އެވެ.
ރަސްމާލެ ވިއްކާލުމާ ގުޅޭގޮތުން ނިންމާ ނިންމުންތަކަށް ފާޑުވިދާޅުވަމުން އައްބާސް ވަނީ، ވަގުތު ފާއިތުވުމުގެ ކުރިން ހޭލުންތެރިވެ، އަމިއްލަ އެދުމުން ދުރުވެ، ހެޔޮވިސްނުމައިގެން ގައުމުގެ ދިފާއުގައި އެކުގައި ތެދުވުމަށް އެންމެހައި ދިވެހި ރައްޔިތުންނަށް ގޮވާލައްވާފަ އެވެ.
