ޕީޕަލްސް ނެޝަނަލް ފްރަންޓް (ޕީއެންއެފް) ގެ ދަތުރެއްގައި ކުރީގެ ރައީސް އަބްދުﷲ ޔާމީން އަންނަ ހުކުރު ދުވަހު އައްޑޫ ސިޓީއަށް ވަޑައިގަންނަވާ ގޮތަށް ހަމަޖެހިއްޖެ އެވެ.
ޗެނަލް 13 އަށް ދެއްވި އިންޓަވިއުއެއްގައި ޔާމީން ވިދާޅުވީ އައްޑޫއަށް ކުރައްވާ ދަތުރުގެ ތެރެއިން އެ ސިޓީގައި ޖަލްސާއެއް ބޭއްވުމަށް ހަމަޖެހިފާ ކަމަށެވެ.
ޔާމީންގެ މި ދަތުރާ ގުޅުވައި އެމަނިކުފާނަށް މަރުހަބާ ކިޔުމަށް ސަރުކާރު ހިއްސާވާ ކުންފުނިތަކުގެ މުވައްޒަފުން ނުދާން އަންގަމުންދާ ކަމަށް ޕީއެންއެފް އިން ވަނީ ބުނެފަ އެވެ.
ޔާމީން އައްޑޫއަށް ވަޑައިގަންނަވާއިރު އެ މަނިކުފާނު ވަނީ މީގެކުރިން ފުވައްމުލައް ސިޓީ އަދި ތިނަދޫ ސިޓީއަށް ވަޑައިގެން އެ ރަށްތަކުގައި ބޭއްވި ޕީއެންއެފްގެ އެކި ހަރަކާތްތަކުގައި ބައިވެރިވެވަޑައިގެންފަ އެވެ.
މީގެ ދެ އަހަރު ފަހުން 2028 ވަނަ އަހަރު ބާއްވާ ރިޔާސީ އިންތިހާބުގައި ބައިވެރިވެވަޑައިގަންނަވާނެކަން އިއުލާންކުރައްވާފައިވާ ޔާމީންގެ ޕާޓީ ޕީއެންއެފް އިން އަންނަނީ ކޮންމެ ހަފްތާއަކު ވެސް އެކި ހަރަކާތްތައް ބާއްވަމުންނެވެ.
އެގޮތުން ވަރަށް ފަހުން މާލޭ އާޓިފިޝަލް ބީޗުގައި "ފެހި ސިގްނަލް" ނަމުގައި ޖަލްސާއެއް ވެސް ވަނީ ބާއްވާފަ އެވެ. އަދި ކޮންމެ ހަފުތާއަކު ތިން ފަހަރު އެ ޕާޓީގެ ހަރުގޭގައި ވެސް ޖަލްސާ ބާއްވަ އެވެ.
