ރިސޯޓު ތަރައްގީކުރަން ކުއްޔަށް ދޫކޮށްފައިވާ ތަންތަނުގެ ތެރެއިން މަސައްކަތް ނުނިމި އަހަރުތަކެއް ވެފައިވާ ތަންތަނުގެ ތެރެއިން ބައެއް ތަންތަނަށް އަންނަ ހަފްތާގެ ތެރޭގައި ފިޔަވަޅު އަޅަން ފަށާނެކަން ޓޫރިޒަމް މިނިސްޓަރު މުހައްމަދު އަމީން ހާމަކުރައްވައިފި އެވެ.
މިދިޔަ ސެޕްޓެމްބަރު މަހުގެ ތެރޭގައި ޓޫރިޒަމް މިނިސްޓްރީން ވަނީ ބައެއް ތަންތަނަށް އިތުރު ފުރުސަތެއް ނުދީ، ކުލީގެ އެއްބަސްވުންތައް ބާތިލުކުރެވޭ ގޮތަށް ގަވާއިދެއް އެކުލަވާލައި ގެޒެޓުކޮށްފަ އެވެ.
އާދީއްތަ ދުވަހުގެ ރޭ ބޭއްވި "އަހާ ފޯރަމް" ގައި ވާހަކަ ދައްކަވަމުން އަމީން އެ ގަވާއިދުގެ ދަށުން ކުރިއަށް އޮތް ހަފުތާގެ ތެރޭގައި ފިޔަވަޅު އަޅާނެ ކަމަށް ވިދާޅުވެފަ އެވެ.
"ރައްޔިތުންނާ ސީދާ ގޮތުން ގުޅުންހުރި ކަންކަން މިއީ ރަށްރަށާއި ފަޅުތައް މިހާ ގިނަ ދުވަސް ވަންދެން އަމިއްލަ ފަރާތްތަކުގެ އަތް ދަށުގައި ހުރުމަކީ. ސީޕީ ރެގިއުލޭޝަން ހަތަރު ކެޓަގަރީއަކަށް ބަހާފައި ޓާމިނޭޝަން ޕްރޮސެސް (އެއްބަސްވުން އުވާލުމުގެ މަރުހަލާ) އަށް ދެވޭނެ ގޮތަށް ވާނީ ގެޒެޓު ކުރެވިފައި،" އަމީން ވިދާޅުވި އެވެ.
އެކި ސަރުކާރުތަކުން މިފަދަ އެއްބަސްވުންތަކާ ގުޅިގެން އަމަލުކޮށްފައިވަނީ އެކަށީގެންވާ ގޮތެއްގައި ނޫން ކަމަށާއި ބައެއް ތަންތަނަށް ދައުލަތަށް ދައްކަން ޖެހޭ ފައިސާ 500 މިލިއަން ޑޮލަރަށްވުރެ އިތުރުވެފައިވާ ކަމަށް އަމީން ވިދާޅުވި އެވެ.
"ރައްޔިތުންގެ އެއްޗެހި މިއީ، ރަށްރަށާއި ފަޅުފަޅަކީ، މި ޓެކްސް ވެސް ލިބެން ޖެހޭނެ، ވަޒީފާގެ ފުރުސަތު ވެސް އޮންނަން ޖެހޭނެ. ވަކި ބަޔަކު އަތް މަތީގައި މިހާ ގިނަ ދުވަހު މި ތަންތަނެއް ނުބޭއްވޭނެ. ވުމާއެކީގައި މިހާރު އަމަލީ ގޮތުން މި ފިޔަވަޅު އެޅުން އޮންނާނެ. އިރާދުކުރެއްވިއްޔާ އެ ފިޔަވަޅުތައް ކުރިއަށް އޮތް ހަފްތާގެ ތެރޭގައި ތި ބޭފުޅުންނަށް ފެނިވަޑައިގަންނަވާނެ،" އަމީން ވިދާޅުވި އެވެ.
ޓޫރިޒަމްގެ ބޭނުމަށް ތަރައްގީކޮށް ނުނިމި ހުރި ތަންތަނާ ގުޅޭ އާ ގަވާއިދުގެ ދަށުން، ކޮންސްޓްރަކްޝަން މުއްދަތު އިތުރުކޮށްފައިވާ ތަންތަނާއި އިތުރުކޮށްފައި ނުވާ ތަންތަނަށް ވެސް ވެސް އަމަލުކުރަނީ އެއް ގޮތަކަށެވެ.
އެހެން ނަމަވެސް އެއްވެސް ފުރުސަތެއް ނުދީ އަތުލަނީ ވަކި ޝަރުތުތަކެއް ހަމަވާ ތަންތަނެވެ. ބައެއް ތަންތަނަށް ފަހު ފުރުސަތެއް ދޭއިރު، އެހެން ބައެއް ތަންތަނަށް ފުރުސަތު ދިނުމާއި ފިޔަވަޅު އެޅުން އޮތީ މިނިސްޓްރީގެ އިހުތިޔާރުގަ އެވެ.
ޓޫރިޒަމުން ފަހު ފުރުސަތު ދެނީ މަސައްކަތް ނުނިމޭ ރިސޯޓުތަކުގެ ތެރެއިން، ގްރޭސް ޕީރިއަޑު ހަމަވެ، މުއްދަތު އިތުރުކޮށްފައި ނުވާ، އަދި ކުލީގެ މުއްދަތުން އަށް އަހަރު ދުވަސް ނުވާ ތަންތަނަށެވެ. މި ގޮތަށް ދޭ މުއްދަތުގެ ތެރޭގައި އެ ތަންތަނުގެ މަސައްކަތް ނިންމައި، އޮޕަރޭޝަނަށް ނުގެނެސްފި ނަމަ ކުލީގެ އެއްބަސްވުން ބާތިލުކުރެވެ އެވެ.
ތަރައްގީކޮށް ނުނިމޭ ތަންތަނުގެ ތެރެއިން އިމާރާތްކުރުމުގެ (ކޮންސްޓްރަކްޝަން) މުއްދަތު އޮތް ތަންތަމުގެ ތެރެއިން، މަސައްކަތް ނުހިނގާ ތަންތަނަށް، މިނިސްޓްރީއަށް ފިޔަވަޅު އެޅެ އެވެ. އަދި، މި ތަންތަނުގެ 50 ޕަސެންޓަށް ވުރެ ބޮޑު ބަޔެއް ނިމިފައިވާ ނަމަ، ކޮންސްޓްރަކްޝަން މުއްދަތު އިތުރުކުރުން އޮތީ މިނިސްޓްރީގެ އަތް މަތީގަ އެވެ.
ނުނިމި ދުވަސްވެފައިވާ ތަންތަން އަތުލެވޭ އިޖުރާއަތުތައް ތަފުސީލުކޮށް، ސަރުކާރުން ގަވާއިދެއް ހެދިއިރު، ތަރައްގީ ނުކުރާ ނަމަ އެއްބަސްވުން ބާތިލުކުރުމުގެ ބާރު މިހާރު ވެސް ސަރުކާރަށް ލިބެ އެވެ. ނަމަވެސް، ހުރިހާ ސަރުކާރެއްގައި ވެސް މަސައްކަތް ކުރަނީ ތަންތަން އަތުނުލައި ލުއިތަކާއި ފުރުސަތުތައް ދީގެން ރިސޯޓުތައް ހުޅުވޭތޯ އެވެ.
