ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންޓުން ހިމެނޭހެން ރާއްޖޭގެ ޓޫރިޒަމް ޕްރޮޑަކްޓުތައް ވިއްކާއިރު ލާ ފައިދާއިން ޓެކްސް ނަގާ ގޮތަށް ގާނޫނަށް ގެނައި ބަދަލުތަކާ ގުޅޭ ގޮތުން ޓޫރިޒަމް އިންޑަސްޓްރީގެ އިސް މީހުންނާއި ސަރުކާރުގެ މިނިސްޓަރުންނާއި ޓެކްސް ކޮމިޝަނަރު އިއްޔެ ބައްދަލުކުރައްވައިފި އެވެ.
ސަރުކާރުން ބުނާ ގޮތުގައި ވެލާނާގޭގައި އިއްޔެ މެންދުރު ކުރިއަށް ދިޔަ މި ބައްދަލުވުމަކީ ފަތުރުވެރިކަމުގެ ދާއިރާގައި ހުރި ގޮންޖެހުންތަކަށް ހައްލު ހޯދުމަށް ބޭއްވުނު މުހިންމު މަޝްވަރާ ބައްދަލުވުމެކެވެ.
މި ބައްދަލުވުމުގައި ސަރުކާރުގެ ފަރާތުން ބައިވެރިވެވަޑައިގަންނަވަނީ ފިނޭންސް މިނިސްޓަރު ހަސަން ޒަރީރާއި، ޓޫރިޒަމް މިނިސްޓަރު މުހައްމަދު އަމީން އާއި، އިކޮނޮމިކް މިނިސްޓަރު މުހައްމަދު ސައީދުގެ އިތުރުން ބަންޑާރަ ނައިބު އަހުމަދު އުޝާމް އަދި ޓެކްސް ކޮމިޝަނާ ޖެނެރަލް ފާތިމަތު އަމީޒާ އެވެ.
ޓޫރިޒަމް އިންޑަސްޓްރީގެ ފަރާތުން މި ބައްދަލުވުމުގައި ބައިވެރިވެވަޑައިގަތީ އެ ދާއިރާގެ އެންމެ ތަޖުރިބާކާރު ބޭފުޅުން ކަމަށްވާ ކްރައުން ކުންފުނީގެ ޗެއާޕާސަން ހުސައިން އަފީފު (ޗަމްޕާ އަފީފު) އާއި، ސަން ކުންފުނީގެ ވެރިޔާ އަހުމަދު ސިޔާމް އަދި ވިލާ ކުންފުނީގެ މެނޭޖިން ޑިރެކްޓަރު ސިޔާދު ގާސިމުގެ އިތުރުން ގެސްޓްހައުސް އެސޯސިއޭޝަނާއި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސްގެ މަންދޫބުންނެވެ.
ޓޫރިޒަމް މިނިސްޓްރީއާ ހަވާލާދީ މީޑިއާތަކުގައި ރިޕޯޓުކޮށްފައިވާ ގޮތުގައި، މި ބައްދަލުވުމުގައި އިންޑަސްޓްރީގެ ތަޖުރިބާކާރުންގެ ހުށަހެޅުންތަކުގެ މައްޗަށް ބިނާކޮށް މުހިންމު ލަނޑުދަނޑިތަކަކަށް އެއްބަސްވެވުނެވެ. ނަމަވެސް އިއްޔެގެ ބައްދަލުވުމުގައި ބައިވެރިވި ބައެއް މީހުންގެ ފަރާތުން އަދަދު ނޫހަށް މައުލޫމާތު ދިނީ ގާނޫނަށް ގެންނަ ބަދަލުތަކުގެ ތަފުސީލުތަކެއް ހިއްސާނުކުރާ ކަމަށެވެ.
ބޭރުގެ ޓުއާ އޮޕަރޭޓަރުން އަތުން ޓެކްސް ނަގަން ފެށިތާ ތިން ވަނައަށްވީ ދުވަހު ގާނޫނު ބަދަލު ކުރަން ނިންމައިފި
ބޭރުގެ ޓުއާ އޮޕަރޭޓަރުންގެ އަތުން ޓެކްސް ނެގުމަށްޓަކައި ގާނޫނަށް ގެނައި އިސްލާހު ގެޒެޓު ކުރީ އޯގަސްޓް 31، ގަ އެވެ. އެ އިސްލާހާ އެއްގޮތަށް ބޭރުގެ ޓުއާ އޮޕަރޭޓަރުން އަތުން މީރާއިން ޓެކްސް ނަގަން ފެށީ މިދިޔަ ބުރާސްފަތި ދުވަހެވެ.
ޓޫރިޒަމް އިންޑަސްޓްރީއާ ސަރުކާރުން ބައްދަލުކޮށްފައި މިވަނީ ޓޫރިސްޓުންނަށް ރާއްޖެއިން ބުކިން ހަދައިދޭ ބުކިން ޕްލެޓްފޯމްތަކާއި ޓުއާ އޮޕަރޭޓަރުންނާއި ޓްރެވެލް އެޖެންޓުންގެ އަތުން ޓީޖީއެސްޓީ ނަގާ ގޮތަށް ގާނޫނަށް ގެނައި ބަދަލުކުރަން ނިންމުމަށް ފަހުގައި އެވެ.
ޓެކްސްއާ ބެހޭ ގާނޫނަށް މިދިޔަ މަހު ގެނައި ބަދަލާއެކީ، އޯފްޝޯ ބުކިން ޕްލެޓްފޯމްތަކާއި ބޭރުގެ ޓުއާ އޮޕަރޭޓަރުންނާއި ޓްރެވެލް އެޖެންޓުން ދޭ ހިދުމަތްތަކުން ޖީއެސްޓީ ނަގާނެ އުސޫލުތައް ވަނީ ކަނޑައަޅާފަ އެވެ. ސަރުކާރުން ލަފާކުރަނީ މި ބަދަލުތަކާއެކު ޓެކްސް ނަގަން ފަށައިފި ނަމަ، ބޭރުގެ ޓްރެވެލް އެޖެންޓުންނާއި ޓުއާ އޮޕަރޭޓަރުންގެ އަތުން އަހަރަކު ގާތްގަނޑަކަށް 1.6 ބިލިއަން ރުފިޔާ ދައުލަތަށް އިތުރަށް ލިބޭނެ ކަމަށެވެ.
ނަމަވެސް، މި ބަދަލުތަކާ ގުޅިގެން ޓޫރިޒަމް ދާއިރާގެ ވިޔަފާރިތަކާއި ބޭރުގެ ޓުއާ އޮޕަރޭޓަރުން ދަނީ ބޮޑެތި ޝަކުވާތަކެއް ކުރަމުންނެވެ. އަދި، މި އުސޫލާ ދެކޮޅަށް ރާއްޖެއަށް އެންމެ ގިނައިން ޓޫރިސްޓުން އަންނަ ގައުމުތަކުގެ ޓްރެވަލް ޖަމިއްޔާތަކުން ވެސް ވަނީ ކަންބޮޑުވުން ފާޅުކޮށްފަ އެވެ. ބައެއް ޔޫރަޕްގެ ޓުއާ އޮޕަރޭޓަރުން މިހާރު ވަނީ ރާއްޖެއަށް ބުކިން ހެދުން ވެސް މެދުކަނޑާލާފަ އެވެ.
ބޭރުގެ ވިޔަފާރިތަކުން ބުނާ ގޮތުގައި އެ މީހުން މިހާރު ވެސް ރާއްޖޭގެ ހުރިހާ ޓެކްސްތަކެއް ދައްކަމުންދާއިރު، އެ މީހުންގެ އަމިއްލަ ގައުމުތަކުގައި ކުރާ މުއާމަލާތްތަކަށް ދިވެހި ސަރުކާރަށް ޓެކްސް ދައްކަން ޖެހުމަކީ ބަލައިގަނެވޭނެ ކަމެއް ނޫނެވެ. މީގެ އިތުރުން، އެކަށީގެންވާ މުއްދަތެއް ނުދީ އަވަސް އަރުވާލައިގެން ޓެކްސް ނަގަން އުޅުމަކީ ވެސް ވިޔަފާރިތަކުގެ ބޮޑު ކަންބޮޑުވުމެކެވެ.
