ރައްޔިތުންގެ މަޖިލީހުގައި 2011 ވަނަ އަހަރު ތަގުރީރު ކުރެއްވި ސައުތު އެފްރިކާގެ ފަނޑިޔާރު ނަވީ ޕިއްލޭއަށް ނޯބެލް ސުލްހައިގެ އެވޯޑު ލިބިއްޖެ އެވެ.
ނަވީ ޕިއްލޭއަށް އެވޯޑު ލިބުނުކަން އިއުލާނު ކުރީ މިއަދެވެ. އޭނާއަށް އެވޯޑު އަރުވާނީ މާދަމާގެ ވަގުތެއްގަ އެވެ. ޕިއްލޭއަކީ އިންޑިއާ ދަރިކޮޅުގެ ސައުތު އެފްރިކާއަށް އުފަން ވަކީލެއް އަދި ފަނޑިޔާރެކެވެ.
ޕިއްލޭއަށް ނޯބެލް ސުލްހައިގެ އެވޯޑު ލިބުނީ ގަތުލްއާންމުތަކާއި ހަނގުރާމައިގެ ކުށްތައް ބެލުމުގައި އޭނާ އަދާކުރައްވަމުންގެންދާ ރޯލުގެ ސަބަބުންނެވެ. އެ އެވޯޑާއެކު އޭނާއަށް މިލިއަނެއްހާ ޑޮލަރު ލިބޭނެ އެވެ.
ދިވެހި ސަރުކާރުގެ ދައުވަތަށް ނަވީ ޕިއްލޭ ރާއްޖެ ވަޑައިގެންނެވި އޭނާ ހުންނެވީ އދ. ގެ އިންސާނީ ހައްގުތަކާ ބެހޭ ކޮމިޝަނަރުގެ މަގާމުގަ އެވެ. އޭނާ ނޮވެމްބަރު، 2011، ގައި ރައްޔިތުންގެ މަޖިލީހުގައި ތަގުރީރެއް ވެސް ދެއްވި އެވެ.
ޕިއްލޭގެ ތަގުރީރުގައި ރާއްޖޭގައި ހައްދު ޖެހުން ހުއްޓާލަން ސަރުކާރަށް ގޮވާލުމުން އެއިރު ވަރަށް މައްސަލަ ބޮޑުވި އެވެ. ޑިސެމްބަރު 23، 2011، ގައި އެއިރުގެ ރައީސް މުހައްމަދު ނަޝީދުގެ ސަރުކާރާ ދެކޮޅަށް ބޭއްވި ބޮޑު އެއްވުމުގެ އެއް ޑިމާންޑަކީ ވެސް ޕިއްލޭގެ ވާހަކަ ސަރުކާރުން ކުށްވެރި ކުރުމެވެ.
އޭގެ ފަހުން، 2013 ވަނަ އަހަރު ރާއްޖޭގައި ބޭއްވި ރިޔާސީ އިންތިހާބު ސުޕްރީމް ކޯޓުން ބާތިލް ކުރުމުން ޕިއްލޭ ވަނީ އެކަން ކުށްވެރި ކުރައްވައިފަ އެވެ. އަދި ސުޕްރީމް ކޯޓުން ޑިމޮކްރަސީއަށް ހުރަސްއަޅަމުންދާ ކަމަށް ވެސް އޭނާ ވިދާޅުވި އެވެ.
ޕިއްލޭ އެހެން ވިދާޅުވުމުން، ސުޕްރީމް ކޯޓާއި އެއިރުގެ ރައީސް މުހައްމަދު ވަހީދު ހަސަން މަނިކު ވަނީ އެކަން ކުށްވެރި ކުރައްވައި، ޕިއްލޭގެ ބަޔާން ނެރުއްވީ ބަލަންޖެހޭ މިންވަރަށް ކަންކަން ނުބައްލަވާ ކަމަށް ވިދާޅުވެފަ އެވެ.
