ރާއްޖޭގެ ފަރުތައް މަރާލުމުން ގެއްލުންވާ ކަމަށާއި ތަރައްގީ ހޯދަންވީ ގުދުރަތީ ވަސީލަތްތައް ބަހައްޓައިގެން ކަމަށް ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
އެމްޑީޕީގެ ކޮންގްރެސްގެ ތެރެއިން ބޭއްވި އިންވެސްޓްމަންޓް ފޯރަމްގައި ނަޝީދު ވިދާޅުވީ ރާއްޖޭގެ ރަށްތައް ހިއްކައިދޭން ބައެއް މީހުން އެދެމުންދާއިރު، ފަރުތައް ހިއްކުމުގެ ސަބަބުން މަސްވެރިން އެންދަމަން ދުރަށް ދާންޖެހޭ ކަމުގެ ޝަކުވާވެސް ބޮޑުވަމުން އަންނަ ކަމަށެވެ.
"އަޅުގަނޑުމެން ރާއްޖޭގެ ރަށްތަކުން އެއްބަޔަކު ވަރަށް ބޮޑަށް އެބަ އެދޭ ރަށް ހިއްކައިދޭން. އޭރުން ފަރު މަރުވޭ. އެކަމަކު މަސްވެރިން ވަރަށް ކަންބޮޑުވޭ މިހާރު އެން ދަމަން ދާންޖެހޭ ދުރުކަމާއި އޭގެ ހިސާބާ އެކީގައި. ފަރު މަރާލައިގެންތޯ އަޅުގަނޑުމެންނަށް ތަރައްގީ ހޯދޭން އޮތީ ނުވަތަ ފަރު ބާއްވައިގެންތޯ ތަރައްގީ ހޯދެން އޮތީ،" ނަޝީދު ވިދާޅުވި އެވެ.
"ގުދުރަތީ ވަސީލަތްތައް ބަހައްޓައިގެން އަޅުގަނޑުމެންނަށް ތަނަވަސްކަން ހޯދެން އެބައޮތްތޯ. މިރޭގެ މި ޕެނަލްގައި އަޅުގަނޑުމެން ހަގީގަތުގައި އެ ވާހަކަ. އަޅުގަނޑުމެންނަށް ގުދުރަތީގޮތުން ލިބިފައި މިހުރި ވަސީލަތްތައް ބަހައްޓައިގެން އަޅުގަނޑުމެންނަށް ތަރައްގީ ހޯދިދާނެ ކަމަށް އަދި ކުރެވެން އޮތް ކަމެއް ގޮތުގައި ވަރަށް ބޮޑަށް ފާހަގަވޭ."
ނަޝީދު ވިދާޅުވީ ރާއްޖޭގެ ގުދުރަތީ ވަސީލަތްތަކުން މުޅި ދުނިޔެއަށް ހިދުމަތްތައް ދެވޭ ކަމަށެވެ. އެގޮތުން އެމަނިކުފާނު ވިދާޅުވީ ދުނިޔޭގައި ވެސް ހަތަރު ވަނައަށް އޮތް އެންމެ ބޮޑު ފަރު އޮތްއިރު، ރާއްޖޭގެ ފަރުން ދުނިޔޭގެ ހުރިހާ ކަނޑުތަކަށް ހިދުމަތް ދެވޭ ކަމަށެވެ.
"ބެލެވެމުން މިދަނީ ކޮބައިތޯ މި ޕްލެނެޓަށް މި ދުނިޔެއަށް ދެވޭ ހިދުމަތްތަކަކީ ދިވެހިރާއްޖޭގެ ގުދުރަތީ ވަސީލަތްތަކުން. ރާއްޖޭގެ މިހުރި ގުދުރަތީ ވަސީލަތްތަކުން މި ދުނިޔެއަށް ދެވޭ ހިދުމަތްތަކީ ކޮބައިތޯ. ރާއްޖޭގައި މިއޮތީ ދުނިޔޭގައި ހަތަރުވަނައަށް އޮތް އެންމެ ބޮޑު ފަރު. މި ފަރުގައި ހުރި މަސްމަހާ މެއްސާއި ގަސްގަހާ ގެއްސާއި ހުރި އެހެން ދިރުންތައް އެބަ ދޭ މި މުޅި ދުނިޔެއަށް އެހެން ހުރިހާ ކަނޑުތަކަށް ހިދުމަތެއް،" ނަޝީދު ވިދާޅުވި އެވެ.
"ޗައިނާ މީހުން ދާ އަޅައިގެން ނުވަތަ ކޮރެއާ މީހުން ދާ އަޅައިގެން ނުވަތަ ފްރާންސް މީހުން ދާ އަޅައިގެން ބާނާނެ މަހެއް އިންޑިއާ ކަނޑުގައި ނޯންނާނެ ސަތޯރަހަ ނެތީއަކާއެއް. ނުވަތަ މި މަސް ވިހާ ހާތައް މި އަޅުގަނޑުމެންގެ ކަނޑުގައި ނެތިއްޔާ،"
ރާއްޖޭގެ ތާރީހުގައި ހިއްކާ އެންމެ ބޮޑު ފަޅު ކަމަށްވާ ފުށިދިއްގަރުފަޅު ނުވަތަ ރަސްމާލެ މަޝްރޫއުގެ ސަބަބުން އެ ސަރަހައްދުގެ ފަރުތަކަށް ބޮޑެތި ގެއްލުންތަކެއް ވަމުން އަންނާތީ ނަޝީދު ކުރިން ކަންބޮޑުވުން ފާޅުކޮށްފައިވެ އެވެ.
އެމްޑީޕީގެ ޗެއާޕާސަންގެ މަގާމާ ހަވާލުވެވަޑައިގަތުމުގެ ކުރިން ތިމާވެއްޓަށް ކުރާ ނޭދެވޭ އަސަރުތަކުން އެންމެ ބޮޑަށް ގެއްލުންވާ ކުޑަ ގައުމުތަކުގެ ހައްގުތަކަށް ވަކާލާތުކުރާ ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމު ނަޝީދު ފުރުއްވި އެވެ.
