ދެ ފައިގެ ފަލަމަސްގަނޑުގައި ބަނދެގެން ވައިގެ މަގުން މަސްތުވާތަކެތި އުފަލަން އުޅެނިކޮށް އެއާޕޯޓުން ހައްޔަރުކުރި މީހަކު، 50 އަހަރަށް ޖަލަށް ލާން ކްރިމިނަލް ކޯޓުން ހުކުމްކޮށްފި އެވެ.
މި މައްސަލައިގައި ށ. ނޫމަރާ، ހަވީރީގެ، އަބްދުﷲ ފަސީހު މިހާ ދިގު މުއްދަތަކަށް ޖަލަށް ލާން ހުކުމް ކުރީ، ދައުލަތުން އުފުލި ކެނެބިސް ޓްރެފިކް ކުރުމާއި ޑައިމޯފިން ޓްރެފިކް ކުރުމުގެ ދައުވާ ވެސް އޭނާގެ މައްޗަށް ސާބިތުވުމުންނެވެ. މި ދެ މައްސަލައިގައި ވެސް އޭނާއަށް އުމުރު ދުވަހުގެ (25 އަހަރުގެ) ހުކުމް އިއްވާފައިވާއިރު، ދެ ލައްކަ ރުފިޔާއިން ޖޫރިމަނާކުރަން ވެސް ކޯޓުން ވަނީ ނިންމާފަ އެވެ.
ފަސީހު ޑްރަގުތަކާއެކީ ވެލާނާ އިންޓަނޭޝަނަލް އެއާޕޯޓުން ހައްޔަރުކުރީ، އޮކްޓޫބަރު 7، 2024 ގައި ގއ. ކޫއްޑޫއަށް ފުރަން ގޮސް ހުއްޓަ އެވެ. އޭނާގެ ގައިގައި ޑްރަގުތައް ބަނދެފައި ހުރިކަން އެނގުނީ، ބޮޑީ ސްކޭނަރު ތެރެެއިން ދިޔަ ވަގުތު އެލާމު އެޅުމުން، މަސްތުވާތަކެތި ހުންނާނެ ކަމަށް އޭވިއޭޝަން ސެކިއުރިޓީ އޮފިސަރުން ގާތު އޭނާ އަމިއްލައަށް ބުނުމުންނެވެ.
ކޯޓުގައި ހެކި ބަސް ދިން އޭވިއޭޝަން އޮފިސަރުން ބުނީ، ޑްރަގުތައް ހުރީ ފަސީހުގެ ޖިންސު ދަށުން ލައިގެން ހުރި ސޯޓަކާއެކީ، ފައިގެ ފަލަމަސްގަނޑުގައި ޑަކްޓް ޓޭޕު އަޅާ ބަނދެފަ ކަމަށެވެ. އޭނާގެ ކޮންމެ ފައެއްގައި އޮޅާފާ ހުރި ޓޭޕުގަނޑުގެ ދަށުގައި ފަސް ދަޅާއި ރަބަރު ޕެކެޓެއް އޮތެވެ.
ފުލުހުން ބުނީ ފަސީހު ގައިގައި ބަނދެފައި ހުރި 10 ދަޅުގައި، 252.1 ގްރާމު ކެނެބިސް ހުރި ކަމަށާއި ދެ ރަބަރު ޕެކެޓުގައި، 25.5 ގްރާމު ޑައިމޯފިން ހުރި ކަމަށެވެ. މި ދެ ބާވަތުގެ ބަރުދަން ވެސް ޓްރެފިކިން މިންގަނޑަށް ފެތެ އެވެ.
ޝަރީއަތުގެ މަރުހަލާފައި ފަސީހުގެ ވަކީލުން ވަނީ އެއީ މީހަކު އޭނައަށް މަޖުބޫރުކޮށްގެން ކުރި ކަމެއް ކަމަށާއި، އޭނާއަކީ ހިއުމަން ޓްރެފިކިން ވިކްޓިމްއެއް ކަމަށް ބުނެ ދިފާއު ނަގާފަ އެވެ. ނަމަވެސް ގާޒީ ނިންމީ، އެކަން ސާބިތުކޮށްދޭން އެއްވެސް ހެއްކެއް ހުށަހަޅާފައި ނުވާތީ އާއި ތަހުގީގުގައި ހަނުހުރެފައިވާތީ އެ ދިފާއުއަށް ބުރަދަނެއް ދެވެން ނެތް ކަމަށެވެ.
