މާލޭގެ ރަސްފަންނުގައި ހުރި ރުއްތަކުން ވަގުރުކު އެޅި މީހަކު ހައްޔަރުކޮށް، ހަތް ދުވަހު އޭނާ ބަންދުގައި ބަހައްޓަން ކްރިމިނަލް ކޯޓުން އަމުރުކޮށްފި އެވެ.
އެ މައްސަލައިގައި ފުލުހުން ހައްޔަރުކޮށްފައި ވަނީ އަބްދުއްލަތީފް، 56، ވައިޓްހީރާ، ސ. ހިތަދޫ އެވެ. އޭނާ ހައްޔަރުކޮށްފައި ވަނީ ވައްކަމުގެ ތުހުމަތުގަ އެވެ.
ރަސްފަންނުގައި ހުރި ރުއްތަކުން ވަގުރުކު އެޅި މައްސަލައިގައި އޭނާ ހައްޔަރުކޮށް ކޯޓަށް ހާޒިރުކުރުމުން އަބްދުއްލަތީފް ބުނެފައި ވަނީ އެ ސަރަހައްދުގައި ހުރި ރުއްތަކުން ކުރުނބާ އެޅުމަކީ މަނާކަމެއްކަން އޭނާއަށް ނޭނގޭ ކަމަށެވެ.
އަބްދުއްލަތީފްއަކީ މީގެ ކުރިން ވެސް ތަފާތު އެކި މައްސަލަތަކުގައި ބަންދުކޮށްފައިވާ މީހެއް ކަމަށް ކޯޓު އަމުރުގައިވެ އެވެ.
އޭނާ ހަތް ދުވަހު ބަންދުގައި ބަހައްޓަން ކޯޓުން އަމުރުކޮށްފައި ވަނީ، އޭނާ ބަންދުން ދޫކޮށްލައިފި ނަމަ، މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެކަމަށް ބުނެ އެވެ.
ރަސްފަންނަކީ މާލެ ސިޓީ ކައުންސިލްގެ ބެލުމުގެ ދަށުގައި އޮންނަ ތަނެކެެވެ. އެހެންކަމުން އެ ތަނުގައި ހުންނަ ރުއްގަހަކީ ވެސް އެ ކައުންސިލްގެ ތަކެއްޗެވެ.
