ޔުނައިޓެޑް އެރަބް އެމިރޭޓްސްގެ އީގަލް ހިލްސްއަށް ރަސްމާލެ ތާއަބަދަށް ދޫކޮށްލަން ސަރުކާރުން ނިންމާފައިވާ ނިންމުމުގައި ކަންބޮޑުވާންޖެހޭ ބިރުވެރި ކަންކަން އެކުލެވޭ ކަމަށް ޝެއިހު އާދަމް ނިޝާން ވިދާޅުވެއްޖެ އެވެ.
ފޭސްބުކްގައި ކުރެއްވި ޕޯސްޓެއްގައި ނިޝާން ވިދާޅުވީ ރަސްމާލޭގެ 500 ހެކްޓަރު އީގަލް ހިލްސްއަށް ދޫކޮށްލުމުގައި " އިންތިހާއަށް ކަންބޮޑުވާ އަދި ބިރުވެރިކަން ހުރި" ކަމަށެވެ.
"ރަސްމާލެ ތަރައްގީ ކުރުމުގެ ގޮތުން ރަސްމާލޭގެ ހިއްކިބިމުން 500 ހެކްޓަރުގެ ބިން، ޔޫއޭއީގެ މަހުޖަނު މުހައްމަދުލް އައްބާރުގެ އީގަލް ހިލްސް ކުންފުންޏަށް 99 އަހަރަށް ކުއްޔަށް ވިއްކާލުމާ ގުޅޭ ގޮތުން ދިރާސާކޮށް ބެލިބެލުމުން، އެކަމުގައި އިންތިހާއަށް ކަންބޮޑުވާ އަދި ބިރުވެރިކަން ހުރި ކަންކަން ވަނީ ފާހަގަވެފަ،" ނިޝާން ވިދާޅުވެފައިވެ އެވެ.
ނިޝާން ވިދާޅުވީ، ރަސްމާލެ ދޫކޮށްލުމާމެދު ވިސްނަންޖެހޭނީ ސިޔާސީ ވިސްނުން އެކަހެރި ކުރުމަށްފަހު ކަމަށެވެ. އޭނާ ވިދާޅުވީ އެ ޑީލުގެ އާހިރު ނަތީޖާ ގުޅިފައި ވަނީ "އިސްލާމްކަމާއި މި ގައުމުގެ މިނިވަންކަން" ދެމިއޮތުމާއި ގެއްލިދިޔުމުގެ މައްޗަށް ކަމަށެވެ.
"މިއީ ހަމައެކަނި ސިޔާސީ ގޮތުން ދެކޮޅުވެގެން ނުވަތަ އެއްކޮޅުވެގެން އަޅުގަނޑުމެން ވަކިގޮތެއް ނިންމަން ޖެހޭ ކަމަކަށްވުރެ ނުރައްކާތެރިކަން ބޮޑު މައްސަލައެއް. އެހެނީ މިކަމުގެ އާހިރު ނަތީޖާ ގުޅިފައިވަނީ އަޅުގަނޑުމެން 900 އަހަރުވަންދެން ދަމަހައްޓަމުން މިއައި އިސްލާމްކަމާއި މިގައުމުގެ މިނިވަންކަމާއި އިސްތިގްލާލް ދެމިއޮތުމާއި ގެއްލިދިއުމުގެ މައްޗަށް ކަމަށް ވާތީ،" އޭނާ ވިދާޅުވެފައިވެ އެވެ.
އޭގެ އިތުރުން ވެސް ރަސްމާލެ ދޫކޮށްލުމުގައި ހުރި އޭނާގެ މުހިންމު ކަންބޮޑުވުންތަކެއް ނިޝާންގެ ޕޯސްޓުގައި ހިއްސާ ކުރި އެވެ. އޭގެ ތެރޭގައި ދެ ވަނަ ދަރަޖައިގެ ރައްޔިތުންނަށް ދިވެހިންވުމުގެ ބިރާއި ކާފަރުންގެ އަތްމައްޗަށް ދިވެހި ބިންތައް ގެއްލުމުގެ ބިރާއި އީގަލް ހިލްސް އާއި ޔަހޫދީންނާ ގުޅުން ބޮޑުވުމާއި ފާތަތައް އާންމުވުން ހިމެނެ އެވެ.
"މުސްލިމުންގެ ހައިސިއްޔަތުން އަޅުގަނޑުމެނަށް ވާޖިބުވެގެންވަނީ އަޅުގަނޑުމެންގެ ދީނާއި ބިން ހިމާޔަތްކުރުން. ތަރައްގީ އާއި ތަހުޒީބު ހޯދުމުގެ ނަމުގައި އިސްލާމްދީނާއި މުސްލިމުންގެ ބިންތައް ގުރުބާން ނުކުރެވޭނެ،" ނިޝާން ވިދާޅުވި އެވެ.
ސަރުކާރުން ރަސްމާލެ ދޫކޮށްލީ ލޭންޑް އިކުއިޒިޝަން ފީއެއް އަދި ބިމު ކުުއްޔެއް ނުނަގާ ގޮތަށެވެ. ރަސްމާލެއިން ސަރުކާރަށް ލިބެނީ، އެތަނުގައި އަޅާ އިމާރާތް ޑިވެލޮޕަރު ފުރަތަމަ ފަހަރު ވިއްކާލުމުން ލިބޭ 10 ޕަސެންޓުގެ ފީއަކާއި ގަންނަ ފަރާތުން ދައްކަންޖެހޭ ހަތަރު ޕަސެންޓުގެ ފީއެކެވެ. އެތަނުގެ އޯނާޝިޕް ޓްރާންސްފާ ކުރާ ކޮންމެ ފަހަރަކު ވެސް ހަތަރު ޕަސެންޓުގެ ފީއެއް ލިބޭނެ އެވެ.
ރަސްމާލެ ދޫކޮށްލީ 99 އަހަރަށް ކަމަށް ސަރުކާރުން ބުނި ނަމަވެސް އެގްރިމެންޓު ފްރޭމްކޮށްފައި އޮތް ގޮތުން އެތަން އެއްކޮށް ގެއްލޭނެ އެވެ. ރަސްމާލެއިން ޕްރޮޕަޓީސް ގަންނަ މީހާއަށް ލިބޭ މީހާ އެތަން ވިއްކާލުމުން، އަލުން 99 އަހަރުގެ އާ ލީސް މުއްދަތެއް ފެށޭނެ އެވެ. އަދި ހިބައިން ދިނަސް އަނެއްކާ 99 އަހަރުގެ އާ ލީސް މުއްދަތެއް ފެށޭނެ އެވެ.
ރަސްމާލެ ހިއްކަން ފެށީ އެތަނަކީ ދިވެހިންގެ ބޯހިޔާވަހިކަމަށް ހާއްސަކޮށް ހިއްކާ ރަށެއް ކަމަށް ބުނެ އެވެ. އަދި ރަސްމާލޭ ބޭރުގެ ބަޔަކަށް ކުއްޔަށް ވެސް ނުދެއްވާނެ ކަމަށް ސީދާ ރައީސް މުހައްމަދު މުއިއްޒު ވަނީ ވައުދުވެވަޑައިގެންފަ އެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
