ޒިއުރިކް، ސްވިޒަލެންޑް (އޮކްޓޫބަރު 8) - އިނގިރޭސި ކްލަބްތަކަށާއި ސްވިޒަލެންޑް ގައުމީ ޓީމަށް ކުރިން ކުޅުނު ރަމޮން ވޭގާ، އަންނަ އަހަރު ބާއްވާ ފީފާގެ އިންތިހާބުގައި އެ ފެޑެރޭޝަންގެ ރައީސް ކަމަށް ކުރިމަތިލާން ނިންމައި އެކަން އިއުލާނުކޮށްފި އެވެ.
އުމުރުން 55 އަހަރުގެ ވޭގާ އަކީ ޓޮޓެންހަމް ހޮޓްސްޕާސް އާއި ސެލްޓިކް އަދި ވަޓްފޯޑުން ފާހަގަކުރެވުނު ކުޅުންތެރިއެކެވެ. ފުޓްބޯޅައިން މީގެ 22 އަހަރު ކުރިން، 2004 ވަނަ އަހަރު ރިޓަޔާވުމަށް ފަހު، ވޭގާ މަސައްކަތް ކުރަމުން އައީ ވިޔަފާރިތަކުގެ ފައިނޭންސް ސެކްޓަރުގަ އެވެ.
ސެޕް ބްލެޓާ، 2015 ވަނަ އަަހަރު ފީފާގެ ރައީސް ކަމުން ދުރުކުރުމަށް ފަހު، ދެން އެންމެ ފުރަތަމަ ބޭއްވި އިންތިހާބު ކާމިޔާބުކުރައްވައި، 2016 އިން ފެށިގެން ފީފާގެ ރައީސްކަން ފުރުއްވަމުން އަންނަ ޖިއާނީ އިންފަންޓީނޯ ވަނީ އަންނަ އަހަރު ބާއްވާ އިންތިހާބުގައި ހަތަރު ވަނަ ދައުރަކަށް ކުރިމަތިލާނެކަން އިއުލާނުކޮށްފަ އެވެ. މީގެ 11 އަހަރު ކުރިން ވެސް ފީފާގެ ރައީސްގެ މަގާމަށް ޝައުގުވެރިކަން ފާޅުކުރި ވޭގާ އަކީ ފީފާ އިންތިހާބުގައި ވާދަކުރާނެކަން އިއުލާނުކުރި ދެ ވަނަ ކެންޑިޑޭޓެވެ.
"ފުޓްބޯޅައިގެ ގުޅުން ބަދަހިކޮށް 21 ވަނަ ގަރުނު ބޭނުންވާ ހެޔޮ ބަދަލު ފުޓްބޯޅަ އަށް ގެންނަން ފީފާ އަށް އައުމަށް އަހަރެން މަސައްކަތް ފަށައިފިން،" ވޭގާ ބުންޏެވެ.
ވޭގާ ވަނީ، މީގެ ކުރިން އިންފަންޓީނޯއާ ދެކޮޅަށް ފީފާގެ އިންތިހާބެއްގައި ވާދަކޮށްފަ އެވެ. އެކަމަކު، އެކަށީގެންވާ ސަޕޯޓް، ގައުމުތަކުގެ ފަރާތުން ލިބިފައިނުވާތީވެ، މަސައްކަތުގައި ކުރިއެރުމެއް ލިބޭގޮތެއްނުވި އެވެ. އެކަމަކު، ވޭގާ ދެކޭ ގޮތުގައި މިހާރު އޮތީ ހާލަތު ބަދަލުވެފަ އެވެ.
"އަހަރެން މިހާރު ތައްޔާރަށް މި ހުރީ އެއީ ދިރިއުޅުގައި ކުރެވުނު މަސައްކަތާއި ހުރިހާ ކަމަކަށް ބަލާއިރު ގަބޫލުކުރެވޭ ގޮތަކީ،" ވޭގާ ބުންޏެވެ.
ވޭގާ ބުނީ، ފުޓްބޯޅަ އަކީ މަގާމުތަކަށް އަންނަ ފަރާތްތަކާއި އެސޯސިއޭޝަންތަކާއި އެހެނިހެން ވަކިވަކި ބައެއްގެ ހައްގު އޮންނަ އެއްޗަކަށް ވުރެން މި ކުޅިވަރުގައި ޝާމިލުވާ އެންމެންގެ ހައްގު ހިމާޔަތް ކުރަން ޖެހޭ ކަމެއް ކަމަށެވެ. އަދި، ފީފާގައި އޭނާ މަސައްކަތްކުރާނީ، މަގާމުގެ ދިފާއުގައި ހުންނަން މަސައްކަތްކުރާ މީހަކަށް ވުރެން ހިދުމަތްތެރިއެއްގެ ގޮތުގައި ކަމަށް ވޭގާ ވަނީ ބުނެފަ އެވެ.
އަންނަ އަހަރުގެ މާޗް މަހު ފީފާގެ އާ އިންތިހާބު އޮތްއިރު، ރަސްމީކޮށް މިހާތަނަށް ކެންޑިޑެސީ އިއުލާނުކުރެއްވީ، 2016 ވަނަ އަހަރުން ފެށިގެން ފީފާގެ ރައީސްގެ މަގާމު ފުރުއްވަމުން އަންނަ އިންފަންޓީނޯ އާއި ވޭގާ އެވެ. ނޮވެމްބަަރު މަހު، 18 ވަނަ ދުވަހު އިންްތިހާބަށް ކުރިމަަތިލުމުގެ މުއްދަތު ހަމަވާނެ އެވެ. ފީފާގެ ރައީސްގެ މަގާމު ލިބޭނީ، ފީފާ މެމްބަރު، 211 ގައުމުގެ ތެރެއިން، މަދުވެގެން 106 ގައުމުގެ ތާއީދު ހޯދައިގެންނެވެ.
