ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން، ވަޒީފާއިން ވަކިކުރިކަމަށް ބުނާ 205 ސިޔާސީ މުވައްޒަފުންނަކީ ކޮންބައެއްކަން ހާމަކުރުމަށް ރައީސުލްޖުމްހޫރިއްޔާގެ އޮފީހުން ދެކޮޅުހަދައިފި އެވެ.
މި މައުލޫމާތު ހޯދުމަށް 'އަދަދު' ނޫހުން މަހޯލި ޕޯޓަލް މެދުވެރިކޮށް ހުށަހެޅި ސުވާލުތަކަށް ރައީސް އޮފީހުން މިހާތަނަށް އެއްވެސް ޖަވާބެއް ދީފައެއް ނުވެ އެވެ. 'އަދަދު' އިން ރައީސް އޮފީހަށް ހުށަހެޅީ މައިގަނޑު ދެ ސުވާލެކެވެ. އެއީ؛
- ސަރުކާރުގެ ތަރުޖަމާނު 5 ސެޕްޓެމްބަރު 2026 ގައި، ވޭތުވެދިޔަ 3 މަހު 205 ސިޔާސީ މުވައްޒަފުން ވަކިކޮށްފައިވާ ކަމަށް ވިދާޅުވެފައިވާއިރު، އެއީ ކޮން ބައެއްކަން މިނިސްޓްރީތަކާއި މަގާމުތައް ވަކިން އެނގޭ ގޮތަށް އަދި ވަކިކުރި ނުވަތަ ވަކިވި ތާރީހުތައް.
- އެ 205 މުވައްޒަފުން ވަކިކުރުމުން މިހާރު ތިބި ސިޔާސީ މުވައްޒަފުންގެ ޖުމްލަ އަދަދަކީ ކޮބައިކަން ސާފުކުރުން.
ދައުލަތުގެ މީޑިއާ، ޕީއެސްއެމް ނިއުސްއަށް ސެޕްޓެމްބަރު މަހު މައުލޫމާތު ދެއްވަމުން ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފު ވިދާޅުވެފައިވަނީ ސަރުކާރުން އެހާތަނަށް 4 ފަންތިއެއްގެ މަގާމުތަކުގައި ތިބި 205 ސިޔާސީ މުވައްޒަފުން ވަކިކޮށްފައިވާ ކަމަށެވެ. އޭގެ ތެރޭގައި ހިމެނެނީ ސްޓޭޓް މިނިސްޓަރުންނާއި، ޑެޕިއުޓީ މިނިސްޓަރުންނާއި، ސީނިއާ ޕޮލިޓިކަލް ޑިރެކްޓަރުންގެ އިތުރުން ޕޮލިޓިކަލް ޑިރެކްޓަރުންނެވެ.
ސިޔާސީ މުވައްޒަފުން ވަޒީފާއިން ވަކިކުރުމުގެ މަސައްކަތް އަދި ނުނިމޭ ކަމަށާއި، ކުރިއަށް އޮތްތަނުގައިވެސް އިތުރު ސިޔާސީ މުވައްޒަފުން ވަކިކުރަމުންދާނެކަން އޭނާ ފާހަގަކުރެއްވި އެވެ.
މީގެ އިތުރުން، ސަރުކާރު ހިއްސާވާ ކުންފުނިތައް ރައިޓްސައިޒު ކުރުމުގެ މަސައްކަތް ނިމޭއިރު، މި ސަރުކާރުން ވަޒީފާތަކަށް ނެގި މީހުންގެ އަދަދަށްވުރެ ބޮޑު އަދަދެއް އުނިވެގެންދާނެކަމަށް ތަރުޖަމާނު ވިދާޅުވެފައިވެ އެވެ.
ސިޔާސީ މަގާމުތަކުން ވަކިކުރި އަދަދު ހާމަނުކުރާއިރު، އައްޔަންކުރިކަން އިއުލާނު ނުކޮށް ގިނަ ބަޔަކަށް ސިޔާސީ މަގާމުތައް މިހާރު ވެސް ދެމުންދާ ކަމަށް މައުލޫމާތު ލިބިފައިވެ އެވެ.
