ރައީސުލްޖުމްހޫރިއްޔާގެ އޮފީހުގައި މަސައްކަތް ކުރި ކުރީގެ އަންހެން މުވައްޒަފެއްގެ މައްޗަށް އުފުލާފައިވާ ގަޒްފުކުރުމުގެ ކުށުގެ ދައުވާގެ އިބްތިދާއީ އަޑުއެހުމެއް އަންނަ ހޯމަ ދުވަހަށް ތާވަލުކޮށްފި އެވެ.
އުމުރުން 24 އެ އަންހެން މީހާގެ މައްޗަށް ގަޒްފު ކުރުމުގެ ކުށުގެ ދައުވާ އުފުލާފައި ވަނީ ޕްރޮސެކިއުޓާ ޖެނެރަލްގެ އޮފީހުންނެވެ. އެ ދައުވާގެ އިބްތިދާއީ އަޑުއެހުމެއް ތާވަލުކޮށްފައި ވަނީ ހޯމަ ދުވަހުގެ ހެނދުނު 10:00 އަށެވެ.
މި ނޫހުން ގެނެސްދިން "އައިޝާ" ޑޮކިއުމެންޓްރީއަށް އިންޓަވިއު ދިނީ އެ މުވައްޒަފު ކަމަށް ތުހުމަތުކޮށް މީގެ ކުރިން ފުލުސް އޮފީހަށް އޭނާ ހާޒިރުކޮށްފައިވެ އެވެ. ނަމަވެސް، ދިފާއުގައި ވާހަކަދެއްކުމުގެ ފުރުސަތު ފުލުހުން އޭނާއަށް ދީފައެއް ނުވެ އެެވެ. އޭނާގެ މައްޗަށް ދައުލަތުން ދައުވާ އުފުލީ ވެސް "އައިޝާ" ޑޮކިއުމެންޓްރީ މައްސަލައިގަ އެވެ.
އޭނާގެ މައްޗަށް ދައުވާ އުފުލާފައިވާއިރު، މި ސަރުކާރުގެ ކެބިނެޓުގެ ވަޒީރަކު އޭނާއަށް ގުޅައި އިންޒާރު ދީފައިވާ ކަމަށް އޭނާ ވަނީ ތުހުމަތުކޮށްފަ އެވެ. އަދި ރައީސް އާއިލީ މެންބަރެއްގެ ފަރާތުން އޭނާގެ އާއިލާއަށް އެކި ގޮތްގޮތުން ދަތިކުރަމުންދާ ކަމަށް ވެސް އެ މުވައްޒަފު ތުހުމަތު ކުރެ އެވެ.
އެ ޑޮކިއުމެންޓަރީގެ މައްސަލައިގައި މި ނޫހުގެ ސީއީއޯ ހުސެއިން ފިޔާޒް މޫސާ އާއި އެޑިޓަރު ހަސަން މުހައްމަދުގެ މައްޗަށް ވެސް ދައުލަތުން ވަނީ ގަޒްފު ކުރުމުގެ ކުށުގެ ދައުވާ އުފުލައިފަ އެވެ. ކްރިމިނަލް ކޯޓުގައި ބާއްވާ ސިއްރު ޝަރީއަތެއްގައި އެ މައްސަލައިގައި އަޑުއެހުންތައް މިހާރު ވެސް އެބަ ކުރިއަށްގެންދެ އެވެ.
"އައިޝާ" ޑޮކިއުމެންޓަރީއަށް އިންޓަވިއު ދިން ފަރާތުން ވަނީ އޭނާ ރައީސް މުހައްމަދު މުއިއްޒާއެކު ކައިވެނިން ބޭރުން ގުޅުމެއް ހިންގި ކަމަށް ތުހުމަތުކޮށްފަ އެވެ. އެ ތުހުމަތުތަކާ ގުޅޭ ގޮތުން މުއިއްޒުއާ ސުވާލު ކުރުމުން މި ނޫހުގެ ނޫސްވެރިޔާ މުހައްމަދު ޝަހުޒާން ވަނީ 15 ދުވަހަށް ޖަލަށްލައިފަ އެވެ.
އޭގެ އިތުރުން، އެ މައްސަލައިގައި ކޯޓުން ނެރުނު ގެގް އޯޑަރަކާ ހިލާފުވި ކަމަށް ބުނެ މި ނޫހުގެ ނޫސްވެރިޔާ ލީވާން އަލީ ނާސިރު ވަނީ 10 ދުވަހަށް ޖަލަށްލައިފަ އެވެ.
