ރައީސުލްޖުމްހޫރިއްޔާގެ އޮފީހުގައި މަސައްކަތް ކުރި ކުރީގެ އަންހެން މުވައްޒަފެއްގެ މައްޗަށް ގަޒްފު ކުރުމުގެ ކުށުގެ ދައުވާ ޕްރޮސެކިއުޓާ ޖެނެރަލްގެ އޮފީހުން ކްރިމިނަލް ކޯޓުގައި މިއަދު އުފުލައިފި އެވެ.
އުމުރުން 24 އެ އަންހެން މީހާގެ މައްޗަށް ގަޒްފު ކުރުމުގެ ކުށުގެ ދައުވާ އުފުލިކަން ޕްރޮސެކިއުޓާ ޖެނެރަލް އޮފީހުން ވަނީ އަދަދު އަށް ޔަގީންކޮށްދީފަ އެވެ.
މި ނޫހުން ގެނެސްދިން "އައިޝާ" ޑޮކިއުމެންޓްރީއަށް އިންޓަވިއު ދިނީ އެ މުވައްޒަފު ކަމަށް ތުހުމަތުކޮށް މީގެ ކުރިން ފުލުސް އޮފީހަށް އޭނާ ހާޒިރުކޮށްފައިވެ އެވެ. ދައުވާ އުފުލީ ވެސް އެ މައްސަލައިގަ އެވެ.
އޭނާގެ މައްޗަށް މިއަދު ދައުވާ އުފުލިއިރު، މި ސަރުކާރުގެ ކެބިނެޓުގެ ވަޒީރަކު އޭނާއަށް ގުޅައި އިންޒާރު ދީފައިވާ ކަމަށް އޭނާ ވަނީ ތުހުމަތުކޮށްފަ އެވެ. އަދި ރައީސް އާއިލީ މެންބަރެއްގެ ފަރާތުން އޭނާގެ އާއިލާއަށް އެކި ގޮތްގޮތުން ދަތިކުރަމުންދާ ކަމަށް ވެސް އެ މުވައްޒަފު ތުހުމަތު ކުރެ އެވެ.
އެ ޑޮކިއުމެންޓަރީގެ މައްސަލައިގައި މި ނޫހުގެ ސީއީއޯ ހުސެއިން ފިޔާޒް މޫސާ އާއި އެޑިޓަރު ހަސަން މުހައްމަދުގެ މައްޗަށް ވެސް ދައުލަތުން ވަނީ ގަޒްފު ކުރުމުގެ ކުށުގެ ދައުވާ އުފުލައިފަ އެވެ. ކްރިމިނަލް ކޯޓުގައި ބާއްވާ ސިއްރު ޝަރީއަތެއްގައި އެ މައްސަލައިގައި އަޑުއެހުންތައް މިހާރު ވެސް އެބަ ކުރިއަށްގެންދެ އެވެ.
"އައިޝާ" ޑޮކިއުމެންޓަރީއަށް އިންޓަވިއު ދިން ފަރާތުން ވަނީ އޭނާ ރައީސް މުހައްމަދު މުއިއްޒާއެކު ކައިވެނިން ބޭރުން ގުޅުމެއް ހިންގި ކަމަށް ތުހުމަތުކޮށްފަ އެވެ. އެ ތުހުމަތުތަކާ ގުޅޭ ގޮތުން މުއިއްޒުއާ ސުވާލު ކުރުމުން މި ނޫހުގެ ނޫސްވެރިޔާ މުހައްމަދު ޝަހުޒާން ވަނީ 15 ދުވަހަށް ޖަލަށްލައިފަ އެވެ.
އޭގެ އިތުރުން، އެ މައްސަލައިގައި ކޯޓުން ނެރުނު ގެގް އޯޑަރަކާ ހިލާފުވި ކަމަށް ބުނެ މި ނޫހުގެ ނޫސްވެރިޔާ ލީވާން އަލީ ނާސިރު ވަނީ 10 ދުވަހަށް ޖަލަށްލައިފަ އެވެ.
