ޖިނާއީ ބޮޑެތި ކުށްތައް ކޮށްގެން ހޯދާ މުދާ ދައުލަތަށް ނެގޭނެ އިޖުރާއަތުތައް ހިމަނައި ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލު ގާނޫނަކަށްވުމުން ރައީސް މުހައްމަދު މުއިއްޒުގެ ސަރުކާރުން ބޭނުންކުރަން ގަސްތުކޮށްފައިވަނީ ވިޔަފާރިވެރިން ބްލެކްމެއިލް ކުރުމަށް ކަމަށް ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވެއްޖެ އެވެ.
ސަރުކާރުގެ ފަރާތުން ފުވައްމުލަކު މެދު ދާއިރާގެ މަޖިލިސް މެންބަރު، އަލީ ފަޒާދު މަޖިލީހަށް ހުށަހެޅުއްވި އެ ބިލުގައި މީހެއްގެ މައްޗަށް ކުށް ސާބިތުވުމުން ކުށް ކޮށްގެން ހޯދާފައިވާ މުދާ ދައުލަތައް ނެގުމުގެ އުސޫލުތަކާއި އިސްތިސްނާ ހާލަތްތަކެއްގައި ކުށް ސާބިތުނުވަނީސް ވެސް ކުށް ކޮށްގެން ހޯދާ މުދާ ދައުލަތަށް ނެގުމުގެ އުސޫލުތައް ހިމަނާފައިވެ އެވެ.
އެ ބިލުގައިވާ ގޮތުން، އެ ބިލު ގާނޫނަކަށްވުމުގެ ކުރިން ކުށް ކޮށްގެން ހޯދާފައިވާ މުދާ ވެސް ދައުލަތަށް ނެގޭނެ އެވެ. މިއަދު އެ ބިލަށް ބަހުސް ކުރައްވަމުން މީކާއިލް ވަނީ ސަރުކާރުން އެ ބިލު ހުށަހެޅި ނިޔަތާ މެދު ސުވާލު އުފައްދަވާފަ އެވެ. އޭނާގެ މައިގަނޑު ކަންބޮޑުވުމަކީ ވެސް ކޯޓަކުން ހުކުމެއް ސާބިތުވުމުގެ ކުރިން މުދާ ނެގޭ ގޮތަށް އޮތުމެވެ.
"ހުކުމް ސާބިތު ނުވަނީސް މީހުންގެ މުދާ ނެގެޔޯ، މީހުން އަސާސީ ހައްގުތަކާ ވެސް ހިލާފު [މި ބިލު]. ރައީސް މުއިއްޒުގެ އަމަލުތައް މާޒީގައި ފެނިދިޔަ ކޮންމެ މީހަކަށް އެނގޭނެ މި ބިލު ގާނޫނަކަށް ވެއްޖެނަމަ ދެން އަމަލުކުރާނެ ގޮތް، މީކާއިލް ވިދާޅުވި އެވެ.
ބޭރު ގައުމުތައް މެދުވެރިކޮށް ކުށް ކޮށްގެން ހޯދާ މުދާ ހިފެހެއްޓުމާއި ދައުލަތަށް ނެގުމުގެ އުސޫލާއި ރާއްޖޭގައި އުޅޭ ބޭރު ގައުމުތަކަށް ނިސްބަތްވާ މީހުން ކުށް ކޮށްގެން ހޯދާ މުދާ ހިފެހެއްޓުމާއި ދައުލަތަށް ނެގުމުގައި އެ މީހުން ނިސްބަތްވާ ގައުމުތަކަށް އެހީތެރިކަން ފޯރުކޮށްދިނުމާބެހޭ އުސޫލުތައް ވެސް އެ ބިލުގައި ހިމަނައިފައިވެ އެވެ.
"މިއީ ބްލެކްމެއިލް ބިލެއް. އަޅުގަނޑުމެން އެންމެނަށް ވެސް ސާފު މި ބިލުގެ ހަގީގީ މަގުސަދު، މި ބިލު ހުށަހެޅިގެންދާ ނިޔަތް، ސަރުކާރުން މި ބިލާ ގުޅިގެން ދެން ގާނޫނަކަށް ވީމައި އަމަލުކުރަން ގަސްތުކޮށްފައިވާ ގޮތް ވެސް ސާފު. އަޅުގަނޑު ޗެލެންޖު ކޮށްފައި ބުނަން މި ބިލު ފަރުމާކުރަންދާ ހަރަދު ވެސް މި ބިލުން އަޅުގަނޑުމެންނަށް ނުހޯދޭނެ،" މީކާއިލް ވިދާޅުވި އެވެ.
ކުށް ކޮށްގެން ހޯދާ މުދަލުން މުއާމަލާތުކުރުން ހުއްޓުވުމަށްޓަކައި، އެ މުދާ ހިފެހެއްޓޭނެ އުސޫލުތަކާއި އެގޮތަށް ހިފެހެއްޓޭ އަދި ދައުލަތަށް ނެގޭ މުދާ ބެލެހެއްޓުމާއި އެ މުދާ ބޭނުންކުރެވޭނެ އުސޫލުތައް ވެސް އެ ބިލުގައި ހިމަނައިފައިވެ އެވެ.
"މި ބިލުން ހާސިލުކުރަން މި އުޅޭ މަގުސަދަކީ ރާއްޖޭގެ ވިޔަފާރިވެރިން ބްލެކްމެއިލް ކުރުން. ހުރިހާ ކަމެއް އަމާޒު ހިފާފައި މި އޮތީ މަޖިލީހުގެ މަސައްކަތްތައް ވެސް، ޕީއެސްއައިޕީ ޕްރޮޖެކްޓެއް ވެސް، ފަނޑިޔާރުގޭގައި ހިނގާ މައްސަލައަކަށް އަތް ބޭނުންވެސް، ހުރިހާ ކަމެއް އަމާޒު ހިފާފައި މިއޮތީ 2028 ގެ ރިޔާސީ އިންތިހާބު ބައި ހުކް އެންޑް ކްރުކް ކާމިޔާބުކުރުމަށް،" މީކާއިލް ވިދާޅުވި އެވެ.
މީހުން ބްލެކްމެއިލްކޮށްގެން ވިޔަފާރިވެރިން އޮބި އަޅައިގެން އިންތިހާބު ކާމިޔާބު ނުކުރެވޭނެ ކަމަށް އޭނާ ވިދާޅުވި އެވެ.
