އޭޝިއާގެ މައި ފުޓްބޯޅަ އިދާރާ، އޭޝިއަން ފުޓްބޯޅަ ކޮންފެޑެރޭޝަން (އޭއެފްސީ) އިން އަލަށް ތައާރަފްކުރަން ނިންމާފައިވާ ނޭޝަންސް ލީގުގެ ފުރަތަމަ މުބާރާތް، 2030 ވަނަ އަހަރު ފަށާއިރު، ޕްލޭނުގެ ތެެރެއިން އެ މުބާރާތާއި ފީފާ ވޯލްޑް ކަޕް އޭޝިއާގެ ކޮލިފައިން އާއި އޭޝިއަން ކަޕްގެ ކޮލިފައިން ގުޅިގެން ކުރިއަށްގެންދަން އޭއެފްސީން ރާވައިފި އެވެ.
އޭއެފްސީން މިދިޔަ އަހަރުގެ ފަހުކޮޅު ވަނީ ނޭޝަންސް ލީގެއް މުޅިން އަލަށް، 2030 ވަނަ އަހަރުން ފެށިގެން ކޮންމެ ދެ އަހަރަކުން އެއް އަހަރު ބޭއްވުމަށް ނިންމައި، އެކަން އިއުލާނުކޮށްފަ އެވެ. އޭގެ ފުރަތަމަ މުބާރާތް، 2030-31 ގައި ބޭއްވުމުގެ ކުރިން، އެ ފޯމެޓަށް ކަންކަން ތަރުތީބުކުރަން ގިނަ ކަންތައްތަކެއް އޭއެފްސީން ކުރިއަށްގެންދާނެ އެވެ.
އެ ގޮތުން، ހުށަހެޅިފައިވާ ޕްރޮޕޯސަލްގައި، 47 މެމްބަރު ގައުމު ހިމެނޭ، އޭޝިއާގެ ފުޓްބޯޅައިގެ ގައުމުތައް ބެހިގެންދާނީ ތިން ފަންތި އަކަށެވެ. އެއީ، ފުރަތަމަ އަދި، ދެ ވަނަ ފަންތީގެ ކެޓަގަރީގައި 18 ގައުމު ހިމެނެ އެވެ. ތިން ވަނަ ފަންތީގައި 11 ގައުމު ތިން ގްރޫޕަކަށް ބެހިގެންދާނެ އެވެ. ރޭންކް ކުރެވިގެންދާއިރު، ފުރަތަމަ ފަންތީގެ ގަދަ 6 ޓީމަށް ވޯލްޑް ކަޕުން ސީދާ ޖާގަ ލިބޭނެ އެވެ.
ވޯލްޑް ކަޕާ ގުޅުވައިގެން ބާއްވާ ފުރަތަމަ ނޭޝަންސް ލީގު ކުރިއަށްދާނީ 2032-33 ގަ އެވެ. ގިނަ މެޗުތުަކެއް ކުޅެލަން ލިބޭ މި މުބާރާތުގައި ކޮންމެ ގައުމަކުން އަމިއްލަ ދަނޑުގައި އަދި ރަށުން ބޭރުގައި ވެސް ހަ މެޗު ކުޅެން ލިބެ އެވެ.
ފުރަތަމަ ފަންތީގެ ހަތް ވަނަ މަގާމުން ފެށިފެން 10 ވަނަ މަގާމުގެ ނިޔަލަށް ހިމެނޭ ހަތަރު ޓީމުގެ ދެމެދު ކުޅޭ ރައުންޑް ރޮބިން ޕްލޭއޮފް މަރުހަލާއިން އެންމެ ރަނގަޅު ނަތީޖާ ހޯދާ ދެ ދެ ޓީމަށް ވޯލްޑް ކަޕްގެ ފަހު ދެ ޖާގަ ލިބޭނެ އެވެ. އެ މަރުހަލާގެ ތިން ވަނަ އަށް ދާ ޓީމު ދާނީ ވޯލްޑް ކަޕް ކޮލިފައިންގެ އިންޓަ ކޮންޓިނެންޓަލް ޕްލޭއޮފް އަށެވެ. ނޭޝަން ލީގުގެ 2030 ގެ މުބާރާތުގެ ފުރަތަމަ ފަންތީގެ ހުރިހާ ގައުމުތަކުގެ އިތުރުން، ދެ ވަނަ ފަންތީގެ އެންމެ ކުރީގައި ނިންމާ ހަ ގައުމަށް އޭޝިއަން ކަޕުން ސީދާ ޖާގަ ލިބޭނެ އެވެ.
އޭޝިއަން ކަޕާ ގުޅުވައިގެން ބާއްވާ ނޭޝަނަލް ލީގުގެ ފުރަތަމަ މުބާރާތް 2030 ގައި ބާއްވަން ހުށަހަޅާފައިވާއިރު، އެއީ، ދެން ބާއްވާ ފީފާ ވޯލްޑް ކަޕްގެ ހާއްސަ މުބާރާތް އޮންނަ އަހަރެވެ. އެއާ އެކު، އެ އަހަރު އޭޝިއަން ކަޕް ނުބާއްވައި އެއް އަހަރު ފަހަަަަތަށް ވަނީ ޖައްސައިފަ އެވެ.
އޭއެފްސީން ނޭޝަންސް ލީގެއް ފަށަން ނިންމި މައިގަނޑު ސަބަބަކީ، 2018 ވަަނަ އަހަރު ޔޫރަޕްގެ މައި ފުޓްބޯޅަ އިދާެރާއިން ފެށި ޔުއެފާ ނޭޝަންސް ލީގުގެ ކާމިޔާބާ އެކުގަ އެވެ. ޔުއެފާ އިން ނޭޝަންސް ލީގު ފެށީ މާނައެއް ނެތް، ބައިނަލްއަގުވާމީ އެކުވެރިކަމުގެ މެޗުތަކެއް ކުޅުމުގެ ބަދަލުގައި، ކުރިއެރުން ވަޒަންކުރެވޭ ގޮތަށް އެއް ލެވަލެއްގެ ގައުމުތައް ކުޅެ ކުރިއަށްދިއުމާއި ފަހަތަށް ދިއުން މިނެކިރުމަށްޓަކައި، ޕްރޮމޯޝަންސް އާއި ރެލިގޭޝަން ހިމަނައިގެން ރޭވުމަށެވެ. އެ މުބާރާތަށް ވެސް އެކި ފަހަރު މަތިން ފޯމެޓަށް ބަދަލު ގެނެސް، މިހާރު ވަނީ ޔުއެފާ ޔޫރޯގެ ކޮލިފައިން އާއި ފީފާ ވޯލްޑް ކަޕްގެ ޔޫރަޕް ކޮލިފައިން އަށް ވެސް ޔުއެފާ ނޭޝަންސް ލީގުން ފުރުސަތު ފަހިވާ ގޮތަށް ފޯމެޓް ރާވައިފަ އެވެ.
އޭޝިއާ އިން ނޭޝަންސް ލީގެއް ފަށައިފިނަަމަ، ސައުތު އީސްޓް އޭޝިއާ އާއި ސައުތު އޭޝިއާގެ ގައުމުތަކުގެ ފުޓްބޯޅަ އިތުރަށް ރަނގަޅުކުރަން ވާދަވެރި މެޗުތަކެއް ލިބޭނެ އެވެ.
