މި މަހު ބޭއްވުމަށް ހަމަޖެހިފައިވާ "އެމްއައިބީ ގެސްޓްހައުސް ސިމްޕޯސިއަމް 2026" ގެ ޝަރަފުވެރި ކީނޯޓް ސްޕީކަރެއްގެ ގޮތުގައި، ބައިނަލްއަގުވާމީ ފެންވަރުގައި ފާހަގަކޮށްލެވޭ ޕްރޮފެޝަނަލް ސްޕީކަރ އަދި އޮންލައިން ބިޒްނަސް ސްޓްރެޓީޖިސްޓް ކިރުބާ ޝަންކަރު ހަމަޖައްސައިފި އެވެ.
ދުނިޔޭގެ 24 ގައުމެއްގައި 700 އަށް ވުރެ ގިނަ ތަގުރީރު ދެއްވާފައިވާ ކިރުބާއަކީ އާޓިފިޝަލް އިންޓެލިޖެންސް (އޭއައި)، ޑިޖިޓަލް ޓްރާންސްފޮމޭޝަން، އޮންލައިން ރެޕިއުޓޭޝަން މެނޭޖްމަންޓް އަދި ވިޔަފާރި ކުރިއެރުވުމުގެ ދާއިރާއިން ފުޅާ ދާއިރާއެއްގައި ތަޖުރިބާ ލިބިވަޑައިގެންފައިވާ ބޭފުޅެކެވެ.
އޭނާއަކީ ޕްރޮފެޝަނަލް ސްޕީކާސް އެސޯސިއޭޝަން އޮފް އިންޑިޔާގެ ފައުންޑަރ އަދި ފައުންޑިން ޕްރެޒިޑެންޓް ވެސް މެއެވެ. ކިރުބާގެ ވާހަކަދެއްކުމުގެ ހުނަރުން، ވިޔަފާރީގެ އަމަލީ މައިދާނާ ގުޅޭ، ފަސޭހައިން ވިސްނޭ ކަންތައްތައް ހިމަނައިގެން، އުނދަގޫ ބޮޑެތި ހިޔާލުތައްވެސް އަމަލީ ގޮތުން ބޭނުންހިފޭ ފަދަ ފަސޭހަ މައުލޫމާތަކަށް ބަދަލުކޮށްލަދެ އެވެ.
ސިމްޕޯސިއަމްގެ މައިގަނޑު މައުޟޫއުތައް
މި އޮކްޓޯބަރު 15 ވަނަ ދުވަހު ބާސެލޯ ނަސަންދުރާގައި ބާއްވާ މި ސިމްޕޯސިއަމްގައި ކިރުބާ ދެއްވާ ކީނޯޓް ބިނާވެފައިވާނީ ގެސްޓްހައުސް ސިނާއަތަށް އަންނަމުންދާ ބަދަލުތަކަށެވެ. އަދި ޑިޖިޓަލްވެ ވާދަވެރިވަމުންދާ މާހައުލެއްގައި ގެސްޓްހައުސް ހިންގާ ފަރާތްތަކަށް ޒަމާނީ ބަދަލުތަކަށް އަހުލުވެރިވުމާއި، އީޖާދީ ގޮތްތައް ހޯދުން އަދި ވިޔަފާރި ފުޅާކުރުމަށް ބޭނުންވާ ވިސްނުންތަކާއި އަމަލީ އިރުޝާދުތައް ކިރުބާ ހިއްސާކުރާނެ ކަމަށް އެމްއައިބީން ބުންޏެވެ.
މި ސިމްޕޯސިއަމްގައި ރާއްޖޭގެ ގެސްޓްހައުސްތަކުގެ ވެރިންނާއި، އޮޕަރޭޓަރުން އަދި ސިނާއަތާ ގުޅުންހުރި އެކި ފަރާތްތައް ބައިވެރިވެ، ހިޔާލު ބަދަލުކޮށް، ގުޅުން ބަދަހިކޮށް، ގެސްޓްހައުސް ދާއިރާގެ މުސްތަގުބަލާ މެދު މުހިންމު މަޝްވަރާތައް ކުރުމަށް ވަނީ ހަމަޖެހިފައެވެ.
ކިރުބާގެ މި ކީނޯޓް ވެގެންދާނީ، ހިޔާލުތައް އަމަލަށް ބަދަލުކޮށް، އިތުބާރާއެކު ވިޔަފާރިތައް ކުރިއެރުވުމަށް ވިޔަފާރިވެރިންނަށް ލިބިގެންދާނެ ބޮޑު ހިތްވަރަކަށް ކަމަށް އެމްއައިބީން ދެކެ އެވެ.
