ޒަގްރެބް، ކްރޮއޭޝިއާ (އޮކްޓޫބަރު 4) - ޔުއެފާ ނޭޝަންސް ލީގުގައި ރޭ ރަށުންބޭރުގައި ކުޅެގެން ކްރޮއޭޝިއާ އަތުން އިންގްލެންޑުން 7-0 އިން މޮޅުވިއިރު، މި މެޗުގައި ހަތް ރެކޯޑެއް ވަނީ ގާއިމްކޮށްފަ އެވެ.
އެމެރިކާ، މެކްސިކޯ އަދި ކެނަޑާގައި މި އަހަރުގެ ޖޫން/ޖުލައި މަހު ބޭއްވި ފީފާ ވޯލްޑް ކަޕްގައި އިންގްލެންޑުން 4-2 އިން ކްރޮއޭޝިއާ އަތުން މޮޅުވިއިރު، ރޭ، ކްރޮއޭޝިއާގައި ކުޅެ، އެ ޓީމު އަތުން ތޯމަސް ޓުޗެލްގެ ކޯޗުކަމުގައި ކުޅޭ އިންގްލެންޑުން ހޯދީ ހާއްސަ ނަތީޖާ އެކެވެ.
ކްރޮއޭޝިއާ ކޮޅަށް އިންގްލެންޑްގެ ލަނޑުތައް ޖެހީ ހެރީ ކޭން އާއި ބުކާޔޯ ސަކާ، ކޮންމެ ކުޅުންތެރިއަކު ދެ ގޯލާއި ޖޫޑް ބެލިންހަމް، އެންތަނީ ގޯޑަން އަދި މޯގަން ރޮޖާސް އެވެ. ބެލިންހަމް ވަނީ މި މެޗުގައި ތިން ގޯލު ޖަހަން ފުރުސަތު ތަނަވަސްކޮށްދީފަ އެވެ.
މި މެޗުގެ ނަތީޖާ އަށް ބަލާއިރު، އިންގްލެންޑުން ވަނީ ފަސް ރެކޯޑެއް ގާއިމްކޮށްފަ އެވެ. އެ ގޮތުން، މިއީ، ދުނިޔޭގެ ފުޓްބޯޅައިގެ ރޭންކިންގެ ގަދަ 50 ތެރޭގައި އޮތް ޓީމެއް އަތުން އިންގްލެންޑްގެ އެންމެ ބޮޑު މޮޅެވެ. އެންމެ ފަހުން، ގަދަ 50 ތެރޭގައި އޮތް ޓީމެއް އަތުން އިންގްލެންޑް ހޯދި އެންމެ ބޮޑު މޮޅަކީ، 1882 ވަނަ އަހަރު ނޮދަން އަޔަލެންޑް އަތުން 13-0 އިން މޮޅުވި މެޗެވެ.
ފީފާ ވޯލްޑް ކަޕްގެ 2018 ވަނަ އަހަރު ރަޝިއާގައި ބޭއްވި މުބާރާތުގެ ފައިނަލުގައި ކުޅެ، ގަތަރުގައި 2022 ވަނަ އަހަރު ބޭއްވި މުބާރާތުގެ ސެމީ ފައިނަލަށް ދިޔަ ކްރޮއޭޝިއާ ކޮޅަށް އަމިއްލަ ގައުމުގައި ފުރަތަމަ ފަހަަރަށް 7 ގޯލު ވަންއިރު، މިއީ، އެ ޓީމު ކޮޅަށް ފަސް ގޯލު ވެސް ޓީމަކުން ޖެހި ފުރަތަމަ ފަހަރެވެ. މީގެ ކުރިން 2008 ވަނަ އަހަރު އިންގްލެންޑުން ވަނީ، ކްރޮއޭޝިއާގައި 4-1 އިން މޮޅުވެފަ އެވެ.
އަނެއްކޮޅުން، އިންގްލެންޑްގެ ބެލިންހަމް އަކީ 1993 ވަނަ އަހަރަށް ފަހު، އިންގްލެންޑްގެ އެއް މެޗެއްގައި ހަތަރު ގޯލުގައި ހިއްސާ އޮތް ފުރަތަމަ މިޑްފީލްޑް ކުޅުންތެރިޔާ އެވެ. މީގެ ކުރިން، އެކަން ހާސިލްކުރީ 1993 ވަނަ އަހަރު ޑޭޭވިޑް ޕްލަޓް އެވެ. އެއީ، ސެން މެރީނޯ ކޮޅަށް ހަތަރު ގޯލު ޖަހައިގެންނެވެ. ރޭ ބެލިންހަމް ވަނީ އެއް ގޯލު ޖަހައި ތިން ގޯލު ޖަހަން ފުރުސަތު ހޯދައިދީފަ އެވެ.
އިންގްލެންޑްގެ ކެޕްޓަން، ކޭން އަކީ އެ ޓީމަށް ލަނޑު ޖެހުމުގެ ގިނަ ރެކޯޑްތަކެއް އޮތް ކުޅުންތެރިއެކެވެ. ރޭގެ މެޗުގައި ޖެހި ލަނޑުތަކާ އެކު، ކޭން މި ވަނީ ތިން ކަލަންޑަރު އަހަރުގައި އިންގްލެންޑަށް 10 ގޯލަށް ވުރެން އިތުރަށް ޖަހައިފަ އެެވެ. މީގެ ކުރިން، 2019 ގައި 12 ގޯލު ޖެހިއިރު، 2021 ގައި 16 ގޯލު ޖެހި އެވެ.
ރޭގެ މެޗުގައި އިންގްލެންޑްގެ މިޑްފީލްޑަރު، އެލިއަޓް އެންޑަސަން ވަނީ ގައުމީ ޓީމަށް 20 ވަނަ މެޗު ކުޅެފަ އެވެ. އޭނާ އަކީ، އިންގްލެންޑަށް އެންމެ އަވަހަށް އެ އަދަދު ހަމަ ކުރި ކުޅުންތެރިޔާ އެެވެ. އިންގްލެންޑް ގައުމީ ޓީމަށް ކުޅެން ފެށީތާ ގާތްގަނޑަކަށް 392 ދުވަސް ތެރޭ އެންޑަސަން މި ވަނީ 20 މެޗު ހަމަކޮށްފަ އެވެ.
