ޒަގްރެބް، ކްރޮއޭޝިއާ (ސެޕްޓެމްބަރު 29) - ކްރޮއޭޝިއާ ގައުމީ ފުޓްބޯޅަ ޓީމުގެ ކެޕްޓަން، ލޫކަ މޮޑްރިޗަށް 42 އަހަރު ފުރުނު ކަމުގައި ވިޔަސް ގަައުމީ ޓީމަށް ކުޅެވޭނެ ކަމަށް ކްރޮއޭޝިއާގެ ލެޖެންޑް، ޑާވޯ ސުކާ ބުނެފި އެވެ.
މި މަހުގެ ކުރީކޮޅުގައި މޮޑްރިޗަށް ވަނީ 41 އަހަރު ފުރިފަ އެވެ. އޭގެ ފަހުން، މި ފަހަރުގެ ނޭޝަންސް ލީގުގައި ކްރޮއޭޝިއާ އިން ކުޅުނު ފުރަތަމަ މެޗުގައި، ސާބިއާ ކޮޅަށް މޮޑްރިޗް ވަނީ ލަނޑު ޖަހައިފަ އެވެ. އެ މެޗަކީ، މޮޑްރިޗް، ކްރޮއޭޝިއާ ގައުމީ ޓީމަށް ކުޅެދިން 203 ވަނަ މެޗެވެ.
ޕްރޮފެޝަނަލް ކެރިއަރު ކުރިއަށްގެންދިއުމުގައި، ގައުމީ ޓީމާއި ކްލަބް ލެވަލްގައި މޮޑްރިޗްގެ ޕްލޭން ކުރިއަށްގެންދަނީ އަހަރުން އަހަރަށެވެ. އެ ގޮތުން، އިޓަލީގެ ގަދަބާރު، އޭސީ މިލާނާ އެކު ހަދާ ކޮންޓްރެކްޓް ވެސް މޮޑްރިޗް ކުރިއަށްގެންދަނީ ސީޒަނަކަށް ފަހު ސީޒަނެއްގެ ވިސްނުމުގަ އެވެ.
"އަހަރެން ދެކޭ ގޮތުގަައި އަދިވެސް މޮޑްރިޗަށް އަހަރެއް ނޫނީ ދެ އަހަރު ވަރު ގައުމީ ޓީމަށް ކުޅެވިދާނެ. ކިހިނެއް އެނގެނީ، 2028 ގެ ޔޫރޯއާ ހަަމައަށް ވެސް އޭނާ އަށް ކުރިއަށް ދެވިދާނެ،" 1998 ވަނަ އަހަރު ފީފާ ވޯލްޑް ކަޕްގައި ތަފާތު ދެއްކި ކްރޮއޭޝިއާ ޓީމުގެ އެޓޭކް ލީޑުކުރި، ސުކާ ބުންޏެވެ.
ކެރިއަރު ކުރިއަށް ގެންދިއުމާ މެދު މޮޑްރިޗް ގެންގުޅޭ ވިސްނުމަށް ވެސް ސުކާ ވަނީ ތައުރީފުކޮށްފަ އެވެ. އަދި، މޮޑްރިޗަކީ ދުނިޔޭގެ ފުޓްބޯޅައިގެ މިސާލެއްގެ ގޮތުގައި، ސުކާ ވަނީ ސިފަކޮށްފަ އެވެ.
ރަޝިއާގައި 2018 ވަނަ އަހަރު ބޭއްވި ވޯލްޑް ކަޕް ފައިނަލަށް ކްރޮއޭޝިއާ ގެންގޮސްދިން މޮޑްރިޗަކީ ކްރޮއޭޝިއާގެ ފުޓްބޯޅަ ތާރީހު ދުށް އެންމެ މޮޅު ކުޅުންތެރިޔާ އެވެ. ކްރޮއޭޝިއާ ގައުމީ ޓީމަށް 2006 ވަނަ އަހަރުގެ މާޗް މަހުން ފެށިގެން ކުޅެމުން އަންނަ މޮޑްރިޗް ވަނީ ތަފާތު ހަ ވޯލްޑް ކަޕެއްގައި ކްރޮއޭޝިއާ އަށް ކުޅެފަ އެވެ.
ނޭޝަންސް ލީގުގައި ކްރޮއޭޝިއާ އިން ކުޅޭ ދެ ވަނަ މެޗުގައި މިރޭ ބައްދަލުކުރާނީ ދުނިޔޭގެ ޗެމްޕިއަން، ސްޕެއިންއާ އެވެ. ބައިނަލްއަގުވާމީ ފުޓްބޯޅައިގައި އެންމެ ފަހުން ކުޅުނު 39 މެޗުން ވެސް ބަލިނުވެ، ރެކޯޑެއް ހަދާފައިވާ ސްޕެއިނަކީ، ކްރޮއޭޝިއާ ރަނގަޅު ޗެލެންޖެއް ކަމަށް ސުކާ ވަނީ ބުނެފަ އެވެ.
"ސްޕެއިނަކީ ފޭވަރިޓުން، ކްރޮއޭޝިއާ އިން ދުލެއް ނުދޭނެ. ވަރަށް ގިނަ ގޯލު ފެންނާނެ މެޗެއް ކަމަށް ބެލެވެނީ. 0-0 ކަމަކުނުދޭ،" މިރޭ ސްޕެއިންގެ ސެވިލްގައި ކުޅޭ މެޗާ ބެހޭގޮތުން ސުކާ ބުންޏެވެ.
