ބްރުސެލްސް، ބެލްޖިއަމް (ސެޕްޓެމްބަރު 29) - ޔުއެފާ ނޭޝަންސް ލީގުގެ ލީގު އޭގެ ގްރޫޕް އެކެއްގައި ރޭ މައިކަލް އޮލީސޭގެ ގޯލުން ފްރާންސް އިން 1-0 އިން ބެލްޖިއަމް ބަލިކުރިއިރު، ތުރުކީގެ މައްޗަށް 4-1 އިން އިޓަލީން ކުރިހޯދައިފި އެވެ.
ޑިޑިއޭ ޑެޝޯމްޕްސް، 14 އަހަރަށް ފަހު ފްރާންސް ގައުމީ ޓީމުގެ ކޯޗުކަން ދޫކޮށްލިއިރު، ދެން އެ ޓީމާ ހަވާލުވީ އޭނާއާ އެކު، ފްރާންސް ގައުމީ ޓީމަށް ކުރިން ކުޅުނު ޒިނެދިން ޒިދާން އެެވެ. ޒިދާންގެ ކޯޗުކަމުގައި ފްރާންސް އިން ކުޅުނު ފުރަތަމަ މެޗުގައި އެއް ގޯލުގެ ފަރަގަކުން ތުރުކީ ބަލިކުރިއިރު، އެ މެޗުގައި ލަނޑު ޖެހި ކީލިއަން އެމްބާޕޭ އަށް އަނިޔާވެގެން، ރޭ ބެލްޖިއަމްއާ ދެކޮޅަށް ނުކުޅެ އެވެ.
ބެލްޖިއަމް ދަނޑުގައި ރޭ ފްރާންސް އިން ގިނަ ބަދަލުތަކާ އެކު ކުޅުނުއިރު، ފުރަތަމަ ހާފުގައި އެ ޓީމަށް ލަނޑު ޖަހައިދޭން ޑެޒީރޭ ޑޫއޭ ފޮނުވާލި ހަމަލާތައް ބެލްޖިއަމްގެ ކީޕަރު، ސެން ލަމެންސް ވަނީ މަތަކޮށްފަ އެވެ. ފްރާންސް ކޮޅަށް ލަނޑު ޖަހަން ބެލްޖިއަމްގެ ކެވިން ޑި ބްރޭނާ އާއި ޗާލްސް ޑި ކަޓަލާރޭ ފޮނުވާލި ހަމަލާތައް ކާމިޔާބުވާ ގޮތެއްނުވި އެވެ.
މެޗުން ފްރާންސް މޮޅުވީ، ފުރިހަމަ ވަގުތު ހަމަވާން ދެ މިނިޓަށް ވެފައި ވަނިކޮށް، އޮލީސޭ ޖެހި އިންޑިވިޖުއަލީ މޮޅު ގޯލުންެނެވެ. އަމިއްލަ ހާފުގެ ތެރެއިން ހިފައިގެން އައި ބޯޅަ އޮލީސޭ ވަނީ ހަމަޖެހިލައިފައި ގޯލުގެ ތިރީ ކަނަށް ފޮނުވާލައިފަ އެވެ.
އިޓަލީގެ ކޯޗުކަމާ ރޮބާޓޯ މަންޗިނީ އެނބުރި އައިސް އަލުން ހަވާލުވެ، ނުކުތް ފުރަތަމަ މެޗުގައި ބެލްޖިއަމް އަތުން ވަނީ ބަލިވެފަ އެވެ. އެކަަމަކު، އިޓަލީ ގައުމީ ޓީމުގެ ކުރީގެ ފޯވާޑް، ވިންޗެންޒޯ މޮންޓެލާ ކޯޗުކޮށްދޭ ތުރުކީ ކައިރީގައި އިޓަލީ ފެނުނީ ވަރުގަދަ ކޮށެވެ.
ރޭ ބުރްސާގައި ކުޅުނު މެޗުގައި، އިޓަލީން ވަނީ 27 މިނިޓް ތެރޭ ތިން ގޯލުގެ ލީޑެއް ނަގައިފަ އެވެ. އިޓަލީގެ ފުރަތަމަ ލަނޑު ނުވަ ވަނަ މިނިޓްގައި ޖެހީ އަލެސަންދްރޯ ބަސްޓޯނީ އެވެ. މެޗުގެ 22 ވަނަ މިނިޓްގައި، ޑާވިޑޭ ފްްރަޓޭސީ ވަނީ އިޓަލީގެ ދެ ވަނަ ލަނޑު ޖަހައިފަ އެވެ. އަދި، އޭގެ ފަސް މިނިޓް ފަހުން، މައިކަލް ކަޔޯޑޭ ވަނީ އިޓަލީގެ ތިން ވަނަ ލަނޑެއް ކާމިޔާބުކޮށްދީފަ އެެވެ.
މެޗުގައި ތުރުކީން ޖެހި ހަމައެކަނި ލަނޑު ދެ ވަނަ ހާފުގެ ކުޅުން ފެށިގެން ދެ މިނިޓް ތެރޭ ކާމިޔާބުކުރި އެެވެ. މި ލަނޑު ޖެހީ، ބަރިސް ޔިލްމާޒް އެވެ. އެހެން ނަަމަވެސް ތުރުކީން ލަނޑެއް ޖަހައި އުންމީދެއް ހޯދިތާ ތިން މިނިޓް ފަހުން، މެޗުގެ 50 ވަނަ މިނިޓްގައި ޕިއޯ އެސްޕޮސީޓޯ ވަނީ އިޓަލީގެ ހަތަރު ވަނަ ލަނޑު ޖަހައި، އަލުން ތިން ގޯލުގެ ލީޑުނަގައިދީފަ އެވެ.
މި ފަހަރުގެ އިންޓަނޭޝަނަލް ބްރޭކުގައި ދެން އޮތް މެޗުތަކުގައި، ހުކުރު ދުވަހުގެރޭ، ބެލްޖިއަމުން ތުރުކީއާ ކުޅޭނެ އެެވެ. އަދި، ފްރާންސް އިން އަމިއްލަ ދަނޑުގައި ބައްދަލުކުރާނީ އިޓަލީއާ އެވެ.
