ރަސްމާލޭ ވޯޓާފްރަންޓް އެންޑް މެރީނާ މަޝްރޫއު ހިންގަން ޔޫއޭއީގެ އީގަލް ހިލްސް ކުންފުނިން ހިންގަން އުޅޭ މަޝްރޫއު ދެފުށް ފެންނަ ގޮތަށް އައްޑޫ ސިޓީއަށް ގެނައުމަށް މަރުހަބާ ކިޔާނެ ކަމަށް އައްޑޫ ސިޓީގެ މޭޔަރު އަލީ ނިޒާރު މިއަދު ވިދާޅުވެއްޖެ އެވެ.
އެމްޑީޕީގެ ކޮންގްރެސް ތެރެއިން ކުރިއަށްގެންދާ އިންވެސްޓްމަންޓް ފޯރަމްގައި ނިޒާރު ވިދާޅުވީ އީގަލް ހިލްސް އިން ރަސްމާލޭގައި މިހާރު އެ ހިންގާ މަޝްރޫއު އެއޮތް ގޮތަށް އައްޑޫއަށް ގެންނަން އެއްބަސް ނޫން ކަމަށެވެ. ނަމަވެސް އެ މަޝްރޫއު ދެފުށް ފެންނަ ގޮތަށް ރައްޔިތުންނަށްވެސް ވާ އެއްޗެއް ބުނެދެވޭ ގޮތަށް ގެނައުމަކީ އެއްވެސް މައްސަލައެއް ނޫން ކަމަށް މޭޔަރު ވިދާޅުވި އެވެ.
"އީގަލް ހިލްސްގެ ޕްރޮޖެކްޓް މިހާރު އެއޮތް ގޮތަށް އައްޑޫއަށް ގެންދާކަށް އަޅުގަނޑު ބޭނުމެއް ނޫން. މިހާރު އެ ގެންދާ ގޮތަކަށް. ދެފުށް ފެންނަ ގޮތަށް ރައްޔިތުންނަށް އެނގޭ ގޮތަށް އައްޑޫ ރައްޔިތުންނަށްވެސް މިވާ އެއްޗެއް ބުނެދެވޭ ގޮތަށް އަންނަންޔާމުން މަރުހަބާ. އަޅުގަނޑުމެން މަރުހަބާ ކިޔާނަން. އެއްވެސް މައްސަލައެއް ނޫން އެއީކީއެއް،" ނިޒާރު ވިދާޅުވި އެވެ.
އީގަލް ހިލްސްއަށް ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
ރަސްމާލެ ތަރައްގީ ކުރަން ނިންމާފައި ވަނީ ފަތުރުވެރިކަމުގެ މަންޒިލެއްގެ ގޮތުގަ އެވެ. އެތަން ތަރައްގީ ކުރަނީ ބިދޭސީންނަށް އެތަނުގައި ދިގު މުއްދަތަކަށް ދިރިއުޅެވޭނެ ގޮތަށެވެ. ރަސްމާލޭގައި ބިނާ ކުރާ އެޕާޓްމަންޓުތަކާއި ވިލާތައް ބިދޭސީންނަށް ވިއްކަން އީގަލް ހިލްސް އިން މިހާރު ވެސް ވަނީ ހުޅުވާލައިފަ އެވެ.
އިންވެސްޓްމަންޓް ފޯރަމްގައި އައްޑޫ ސިޓީ ކައުންސިލުގެ ފަރާތުން ޖުމްލަ އަށް ޕްރޮޖެކްޓެއް ހުށަހަޅާފައިވެ އެވެ. އޭގެ ތެރޭގައި ކްލައިމެޓް ޗޭންޖް އެންޑް މެރިން ރިސާޗް ފެސިލިޓީއެއް ގާއިމުކުރުމާއި، ކޮންވެސްޝަން ސެންޓަރަކާއި ހޮޓަލެއް ގާއިމުކުރުމާއި، ދިގިރަށް ޕަބްލިކް ބީޗް ޑިވެލޮޕްމަންޓް ޕްރޮޖެކްޓާއި، ގްރީން ވޭސްޓް ކޮމްޕޯޒިން ފެސިލިޓީ ގާއިމުކުރުން ހިމެނެ އެވެ.
މީގެއިތުރުން ހޯމް ސޯލާ އެންޑް ބެޓަރީ ޕްރޮގްރާމާއި، މިއުޒިއަމް އެންޑް ކަލްޗަރަލް ސެންޓަރު ޕްރޮޖެކްޓާއި، ނޭޗާ ޕާކް އިކޯ-އިންވެސްޓްމަންޓް ޕްރޮޖެކްޓް އަދި ރެއިންވޯޓާ ހާވެސްޓިން އެންޑް ސްޓޯރޭޖް ފެސިލިޓީ ޕްރޮޖެކްޓް އައްޑޫ ސިޓީ ކައުންސިލުން ވަނީ ހުށަހަޅާފައިވެ އެވެ.
މިއީ ރާއްޖޭގެ ސިޔާސީ ޕާޓީއަކުން ބާއްވާ ފުރަތަމަ އިންވެސްޓްމަންޓު ފޯރަމެވެ. އެމްޑީޕީގެ ކޮންގްރެސްގައި މިއަދު މައިގަނޑު ކަމެއްގެ ގޮތުގައި އެ ފޯރަމެވެ. މާދަމާ އެމްޑީޕީގެ ކޮންގްރެސްގައި އޮންނާނީ އަސާސީ ގަވާއިދަށް ބަދަލުތައް ގެނައުމާއި، އެކި ގަރާތުތައް ފާސްކުރުމެވެ.
