ގައުމު މިހާރު އޮތް ނާޒުކު ހާލަތުން އަރައިގަތުމަށްޓަކައި އެންމެ ފުރަތަމަ ކުރަންޖެހޭ ކަމަކީ މިހާރު އޮތް ރައީސް މުހައްމަދު މުއިއްޒުގެ ސަރުކާރު ބަދަލުކުރުން ކަމަށް ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީގެ ކޮންގްރެސް ފެށުމަށްޓަކައި ރޭ މާލޭ ސިޓީ ހޯލުގައި ބޭއްވި ރަސްމިއްޔާތުގައި ސޯލިހު ވިދާޅުވީ ގައުމަށް ދިމާވެފައިވާ މައްސަލަތަކަކީ ހަމައެކަނި ސިޔާސީ ޝިއާރަކުން ހައްލުކުރެވޭނެ ކަންތައްތަކެއް ނޫން ކަމަށެވެ. މިކަމަށް ބޭނުންވަނީ ޒިންމާދާރު ލީޑަޝިޕަކާއި، އިތުބާރު ހުރި އިގުތިސާދީ ސިޔާސަތުތަކެއްގެ އިތުރުން ގައުމީ މަމަސްލަހަތަށްޓަކައި އެއްބާރުލުން ދޭނެ ލީޑަރުންތަކެއް ކަމަށް އެމަނިކުފާނު ފާހަގަކުރެއްވި އެވެ. އަދި ގައުމުގެ ހާލަތު ރަނގަޅު ކުރުމަށްޓަކައި އަލުން އެމްޑީޕީގެ ވެރިކަމެއް ގައިމުކުރަން ޖެހޭ ކަމަށްވެސް ވިދާޅުވިއެވެ.
"މިއަދު ގައުއުމު މި އޮތް ހާލަތުން އަރައިގަތުމަށްޓަކައި އެންމެ ފުރަތަމަވެސް ކުރަންޖެހޭ ކަމަކީ މި ސަރުކާރު ބަދަލުކުރުން. އަދި ހަމައެއާއެކު އެމްޑީޕީގެ ވެރިކަމެއް މި ރާއްޖޭގައި ގާއިމުކުރަން،" ސޯލިހު މިހެން ވިދާޅުވުމާއެކު ޖަލްސާގެ ބައިވެރިން ހޫނު ތަރުހީބެއް ދިނެވެ.
އެމްޑީޕީއަކީ ތަޖުރިބާކާރު ސިޔާސީ ފަރުދުން ހިމެނޭ ވަރުގަދަ ޕާޓީއެއްކަން ފާހަގަކުރައްވަމުން ސޯލިހު ވިދާޅުވީ، އެ ޕާޓީގައި ރާއްޖޭގެ ރައީސްކަން ކުރެއްވި ބޭފުޅުންނާއި، މަޖިލީހުގެ ރައީސްކަމާއި ނައިބު ރައީސްކަން ކުރެއްވި ބޭފުޅުންގެ އިތުރުން ގިނަ އަދަދެއްގެ ކައުންސިލަރުންނާއި މޭޔަރުން އެބަތިއްބެވި ކަމަށެވެ.
އެމަނިކުފާނު ވިދާޅުވި ގޮތުގައި އެމްޑީޕީގެ ކުރިމަގު ލިޔާނީ ހަމައެކަނި ވަކި ބަޔަކެއް ނޫން ކަމަށާއި، އެއީ ރާއްޖޭގެ ހުރިހާ ކަންކޮޅުތަކެއްގައި ތިބި މަސްވެރިންނާއި، ދަނޑުވެރިންނާއި، ޓީޗަރުންނާއި، ޑޮކްޓަރުން ފަދަ ހުރިހާ ދާއިރާއެއްގެ މެންބަރުން ކަމަށެވެ.
"އެމްޑީޕީގެ އަންނަ ބާބު ލިޔާނީ އެއްވެ މީހެއް ނޫން. އަދި އަޅުގަނޑުމެން މިތާ އެއްވެ މި ތިބި މީހުން އެކަންޏެއްވެސް ނޫން ނޫން،" ސޯލިހު ވިދާޅުވި އެވެ.
"އެ ބާބު ލިޔާނީ ދިވެހިރާއްޖޭގެ ހުރިހާ ކަންކޮޅެއްގައި ތިބި އެމްޑީޕީގެ މެންބަރު. އެއީ މަސްވެރިންނާއި، ދަނޑުވެރިންނާއި، ޓީޗަރުންނާއި، ނަރުހުންނާއި، ޑޮކްޓަރުންނާ، ވިޔަފާރިވެރިންނާއި، ޒުވާން ގްރެޖުއޭޓުން އަދި އަމިއްލަ ދަރިންގެ މާދަމާއާ މެދު ކަންބޮޑުވާ މައިން."
އެމްޑީޕީން ވެރިކަން ހޯދުމަށްޓަކައި ރައްޔިތުންގެ އިތުބާރު އިތުރަށް ހޯދަންޖެހޭ: ސޯލިހު
އެމްޑީޕީން އަލުން ވެރިކަމަށް އައުމަށްޓަކައި ރައްޔިތުންގެ އިތުބާރު ހޯދަންޖެހޭ ކަމަށާއި، އެ މަސައްކަތް ޕާޓީގެ އެތެރެއިން ފަށަންޖެހޭ ކަމަށް ސޯލިހު ވިދާޅުވި. އިތުބާރު ހޯދޭނީ ކުރިން ހެދިފައިވާ ގޯސްތައް ގަބޫލުކޮށް، ރައްޔިތުންގެ އަޑުއަހައިގެން ކަމަށާއި، ވޯޓު ހޯދުމުގެ ބަދަލުގައި ރައްޔިތުންގެ ގާތަށް ދާންވީ އިތުބާރު ހޯދަން ކަމަށް އެމަނިކުފާނު ވިދާޅުވި.
އެމްޑީޕީގެ ވެރިންގެ ޒިންމާއަކަށް ވާންވާނީ އެ ހުރިހާ ބައެއްގެ އަޑުއެހައި، އެ މީހުންނަށް އިތުބާރާއި އުއްމީދު ދިނުން ކަމަށް ވެސް ސޯލިހު ވިދާޅުވި އެވެ. އެކަމަކު އެއީ ފުއްދޭނެކަމުގެ ޔަގީންކަމެއް ނެތް ވައުދުތަކުން ދެވޭ އުއްމީދަކަށް ވެގެންނުވާނެ ކަމަށް ވެސް އެމަނިކުފާނު ވިދާޅުވި އެވެ.
ރައީސް މުހައްމަދު މުއިއްޒުގެ ވެރިކަން ބަދަލުކުރާނެ ކަމަށް ކުރީގެ ރައީސް އަދި އެމްޑީޕީގެ ޗެއާޕާސަން މުހައްމަދު ނަޝީދު ވެސް ރޭ ވިދާޅުވި އެވެ.
ސޯލިހު ވިދާޅުވީ، ސިޔާސީ މަގާމަކީ ވަގުތީ ކަމެއް ނަމަވެސް ހިދުމަތަކީ ދެމިގެންދާ ޒިންމާއެއް ކަމަށެވެ. ރައްޔިތުންގެ އިތުބާރު އެމްޑީޕީއަށް ހޯދޭނީ ކުރިން ހެދިފައި ހުރި ގޯސްތައް ޤަބޫލުކޮށް، ރައްޔިތުންގެ އަޑުއަހައިގެން ކަމަށް އެމަނިކުފާނު ވިދާޅުވިއެވެ. އެހެންކަމުން، ޕާޓީގެ މެންބަރުން ބޭނުންނުވާ ތަފާތުތައް ދޫކޮށްލައި، އާ ހިޔާލުތަކާއެކު އަޒުމެއްގައި ރައްޔިތުންގެ ގާތަށް ދިއުމަށް އެމަނިކުފާނު އިލްތިމާސް ކުރެއްވިއެވެ.
ބޮޑެތި ގައުމުތަކުގެ ވާދަވެރިކަމުގެ ބިމަކަށް ރާއްޖެ ވެގެން ނުވާނެ
ހާރިޖީ ސިޔާސަތާ ގުޅޭގޮތުން ވާހަކަ ދައްކަވަމުން ސޯލިހު ވިދާޅުވީ، ރާއްޖޭގެ މިނިވަންކަމާއި ސިޔާދަތު ދިފާއުކުރުމާއެކު އަވަށްޓެރި ގައުމުތަކާ އެކު އިތުބާރު ކުރެވޭ ބަދަހި ގުޅުމެއް ބާއްވަންޖެހޭ ކަމަށެވެ. އަދި އިންޑިއާ ކަނޑުގެ ސުލްހަވެރިކަމަކީ ރާއްޖޭގެ އިގުތިސާދާއި ރައްކާތެރިކަމާ ގުޅިފައިވާ ކަމެއް ކަމަށާއި، ރާއްޖެއަކީ ބޮޑެތި ގައުމުތަކުގެ ވާދަވެރިކަމުގެ ބިމަކަށް ވެގެންނުވާނެ ކަމަށްވެސް އެމަނިކުފާނު ވިދާޅުވިއެވެ.
ރަސްމާލޭގެ ސިއްރު ޑީލަށް އާނއެކޭ ބުނެ، ޖާގަ ދީގެން ނުވާނެ: ސޯލިހު
ރަސްމާލެ މަޝްރޫއުގެ ދަށުން ހިއްކާ ބިމުން 500 ހެކްޓަރު ބޭރުގެ ކުންފުންޏަކަށް ދިނުމަށް ވެފައިވާ ސިއްރު އެއްބަސްވުމަށް ފުރުސަތު ދީގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވި. އެމަނިކުފާނު ގޮވާލެއްވީ ރައްޔިތުންގެ ބޮޑު ހޭދައަކުން ހިންގާ މި މަޝްރޫއުގެ ތަފްސީލާއި އޭގެއިން ލިބޭ ފައިދާ ސަރުކާރުން ހާމަކުރުމަށް.
މޫސުމީ ބަދަލުތަކުގެ ސަބަބުން ކުރިމަތިވާ ގޮންޖެހުންތަކަށް އަލިއަޅުވާލައްވަމުން ސޯލިހު ވިދާޅުވީ، ރަށް ގިރުމާއި އުދައެރުން ފަދަ ކާރިސާތަކުން ލިބޭ ގެއްލުންތައް އިންތިހާއަށް އިތުރުވެފައިވާ ކަމަށެވެ. މިކަންކަމުން ރައްކާތެރިވުމަށް އަހަރަކު 2.5 ބިލިއަން ރުފިޔާ ހޭދަކުރަންޖެހޭއިރު، މިއީ މުޅި މުޖުތަމައުގެ ބައިވެރިވުން ބޭނުންވާ ކަމެއް ކަމަށް ފާހަގަކުރެއްވިއެވެ.
އެމްޑީޕީގެ ކޮންގްރެސް ފެށުމުގެ ރަސްމިއްޔާތުގެ ވީޑިއޯ
