އިދިކޮޅު އެމްޑީޕީގެ ރިޔާސީ ޕްރައިމަރީގެ އެއްވެސް ކަމެއްގައި އެ ޕާޓީގެ ޗެއާޕާސަނަށް ނޫޅެވޭ ގޮތަށް އަސާސީ ގަވާއިދަށް އިސްލާހެއް ހުށަހަޅައިފި އެވެ.
އެމްޑީޕީގެ އަސާސާސީ ގަވާއިދަށް ހުށަހަޅާފައިވާ އިސްލާހުގައިވާ ގޮތުން ޗެއާޕާސަންގެ މަސްއޫލިއްޔަތުތަކުގެ ތެރެއިން ރިޔާސީ ޕްރައިމަރީ އިންތިޒާމުކޮށް ރޭވުން ވަނީ އުނިކޮށްފަ އެވެ. ކުރިން ޗެއާޕާސަނަށް އިންތިޒާމުކޮށް ރޭވުން މަނަލީ ހަމައެކަނި ޗެއާޕާސަން އިންތިހާބެވެ.
ޕާޓީގެ އަސާސީ ގަވާއިދަށް ގެންނަ މި އިސްލާހާއެކު ރިޔާސީ ޕްރައިމަރީގެ އިންތިހާބުގެ ކަންކަން ހިންގައި ބަލަހައްޓާނީ އިސްތިއުނާފު ފަނޑިޔާރުންގެ މަޖިލީހުގެ ރައީސް އެވެ. އިސްތިއުނާފް ފަނޑިޔާރު މަޖިލީހުގެ މެންބަރުންގެ ގޮތުގައި ޕާޓީގެ އެއްވެސް އިންތިހާބީ މަގާމެއް ނުވަތަ ސެކްރެޓޭރިއެޓްގެ މަގާމެއް ފުރާ މީހަކު އައްޔަން ނުކުރެވެ އެވެ.
ޗެއާޕާސަންގެ ބައެއް މަސްއޫލިއްޔަތުތައް:
- ކޮންގްރެސް އާއި ގައުމީ މަޖިލީހާއި ގައުމީ ހިންގާ ކޮމިޓީގެ ރިޔާސަތު ބެލެހެއްޓުން.
- ޕާޓީގެ ގުނަވަންތަކުގެ މަޝްވަރާއާއެކު ޕާޓީގެ ކުރު މުއްދަތާއި، ދިގު މުއްދަތުގެ ސިޔާސީ ލަނޑުދަނޑިތައް ކަނޑައަޅައި، އެކަންކަން ފާސްކުރުމަށްޓަކައި ގައުމީ މަޖިލީހަށް ހުށަހެޅުން.
- އެކިއެކި ދާއިރާތަކުގެ ގުނަވަންތައް ގުޅިގެން ހިންގުންތެރިކަމާއެކު މަސައްކަތްކުރޭތޯ ބެލުން.
- ގައުމީ އަދި ބައިނަލްއަގުވާމީ މައިދާންތަކުގައި ޕާޓީ ތަމްސީލުކުރުމާއި ތަމްސީލްކުރާނެ މީހުން އައްޔަންކުރުން.
- ޕާޓީގެ މެންބަރުންގެ މެދުގައި ޑިމޮކްރަސީގެ މިންގަނޑުތަކާއި، ހަމަހަމަކަން ކުރިއެރުވުމަށް މަސައްކަތްކުރުން.
އެމްޑީޕީގެ ޗެއާޕާސަނަށް ރިޔާސީ ޕްރައިމަރީގެ އެއްވެސް ކަމެއްގައި ނޫޅެވޭ ގޮތަށް އަސާސީ ގަވާއިދަށް އިސްލާހު ހުށަހަޅާފައިވާއިރު، ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި އެ ޕާޓީގެ ޗެއާޕާސަން، ކުރީގެ ރައީސް މުހައްމަދު ނަޝީދު ވަނީ ރިޔާސީ ޕްރައިމަރީގައި ވާދަކުރައްވާނެކަން އިއުލާންކުރައްވާފައިވާ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލްއަށް ތާއީދުކުރައްވާފަ އެވެ.
އެމްޑީޕީގެ އަސާސީ ގަވާއިދު ބުނާގޮތުން އެ ޕާޓީގެ ޗެއާޕާސަނަށް ރިޔާސީ ޕްރައިމަރީގައި ވާދަކުރައްވާ ކެންޑިޑޭޓަށް ތާއީދުކުރެއްވުމަށް އެއްވެސް ހުރަހެއް ނެތެވެ. ފައްޔާޒަށް ތާއީދުކުރައްވާކަން ނަޝީދު ހާމަކުރެއްވީ އެމްޑީޕީގެ ޗެއާޕާސަން އިންތިހާބަށް ވާދަކުރައްވާކަން އިއުލާންކުރެއްވި ދުވަހު އެވެ.
އެމްޑީޕީގެ ކޮންގްރެސް ރަސްމީކޮށް ހުޅުވުމަށް ހަމަޖެހިފައިވަނީ މިރެ އެވެ. އެއަށްފަހު މާދަމާ މެންދުރުފަހުން ފެށިގެން ރޭގަނޑަށް ބޭއްވުމަށް ހަމަޖެހިފައިވަނީ އިންވެސްޓްމަންޓް ފޯރަމެވެ. އަދި ހޮނިހިރު ދުވަހު ހެނދުނުން ފެށިގެން ކޮންގްރެސްގެ ރަސްމީ މަސައްކަތްތައް ފެށުމަށް ވަނީ ހަމަޖެހިފަ އެވެ.
މިގޮތުން ހޮނިހިރު ދުވަހު އަސާސީ ގަވާއިދަށް ގެންނަ ބަދަލުތަކާ ގުޅޭގޮތުން ބަހުސްކޮށް، އަސާސީ ގަވާއިދަށް ގެންނަ އިސްލާހުތައް ފާސްކުރުމަށް ވަނީ ހަމަޖެހިފަ އެވެ. އޭގެއިތުރުން ބޮޑު ބަދަލާ ގުޅޭ ގަރާރާއި، ލާމަރުކަޒީ ނިޒާމާ ގުޅޭ ގަރާރަށް ބަހުސްކޮށް ގޮތެއް ނިންމުމަށް ވަނީ ހަމަޖެހިފަ އެވެ.
އެމްޑީޕީގެ ކޮންގްރަސްމަނުންގެ ގޮތުގައި 986 ޑެލިގޭޓުން ތިބި ކަމަށް އެ ޕާޓީން ބުނެ އެވެ.
