އިދިކޮޅު އެމްޑީޕީން ވެރިކަން ހޯދުމަށްޓަކައި ރައްޔިތުންގެ އިތުބާރު އިތުރަށް ހޯދަން ޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
އެމްޑީޕީ ކޮންގްރެސް ހުޅުވުމުގެ ޖަލްސާގައި ސޯލިހު ވިދާޅުވީ އެމްޑީޕީން ރައްޔިތުންގެ އިތުބާރު އިތުރަށް ހޯދުމުގެ މަސައްކަތް ފުރަތަމަ ކަމަކަށް ފަށަން ޖެހޭނީ ޕާޓީގެ އެތެރެއިން ކަމަށެވެ.
"ދަންނަވަންތޯ އެއްވެސް ފަރުދަކު މި ޕާޓީއަށްވުރެ ބޮޑެއް ނުވާނެ. އަދި އެއްވެސް ޕާޓީއެއް މި ގައުމަށްވުރެ ބޮޑެއް ނުވާނެ. އަޅުގަނޑު ދެކޭ ގޮތުގައި އެމްޑީޕީން ވެރިކަން ހޯދުމަށްޓަކައި ކުރަންވީ ކަމަކީ ދިވެހި ރައްޔިތުންގެ އިތުބާރު އިތުރަށް ހޯދަންވީ. އެ އިތުބާރު ހޯދަން ބޭނުންނަމަ އަޅުގަނޑުމެން މަސައްކަތް ފަށަންވާނީ ޕާޓީގެ އެތެރެއިން،" ސޯލިހު ވިދާޅުވި އެވެ.
އެމްޑީޕީން ރައްޔިތުންގެ އިތުބާރު ހޯދަން ރައްޔިތުންގެ އަޑު އަހައި، ކުރިން ހެދިފައި ހުރި ގޯސްތައް ގަބޫލުކޮށް ހަގީގީ ހުށަހެޅުންތަކެއް ހުށަހަޅަން ޖެހޭ ކަމަށެވެ. މިގޮތުން ކޮންގްރެސްގައި ރައްޔިތުންގެ އިތުބާރު ހޯދޭނެ މަގުތައް ހޯދައި، ބޭނުން ނުވާ ތަފާތުތައް ދޫކޮށްލަން ޖެހޭ ކަމަށާއި ރައްޔިތުން ކައިރިއަށް ވޯޓު ހޯދުމުގެ ބަދަލުގައި އިތުބާރު ހޯދަން ދާން ޖެހޭ ކަމަށް އެމަނިކުފާނު ވިދާޅުވި އެވެ.
"މިއަދު ކުރަންވީ ސުވާލަކީ އެހެން ސިޔާސީ ޕާޓީއަކަށްވުރެ ބޮޑަށް އެމްޑީޕީއަށް އިތުބާރު ކުރަންވީ ކީއްވެތޯ. އަޅުގަނޑު ދެކޭ ގޮތުގައި އިތުބާރު ހޯދޭނީ ރައްޔިތުންގެ އަޑު އަހައިގެން. އިތުބާރު ހޯދޭނީ ކުރިން ހެދިފައި ހުރި ގޯސްތައް ގަބޫލުކޮށްގެން. އިތުބާރު ހޯދޭނީ ހަގީގީ ހައްލު ހުށަހަޅައިގެން. އިތުބާރު ހޯދޭނީ އެކަކު އަނެކަކަށް އިހްތިރާމް ކޮށްގެން. އަދި އެންމެ މުހިންމު ކަމަކީ އިތުބާރު ހޯދޭނީ އަމަލުން. ވީމާ އަޅުގަނޑުގެ އިލްތިމާސަކީ މި ކޮންގްރެސްގައި މިދެންނެވި ކަންތައްތަކާ މެދު ވިސްނާ ބަހުސްކުރުން،" ސޯލިހު ވިދާޅުވި އެވެ.
"ބޭނުން ނުވާ ތަފާތުތައް ދޫކޮށްލުން. އާ ހިޔާލުތަކަށް ހުޅުވާލުން. އަދި އަނެއްކާވެސް ރައްޔިތުންގެ ގާތަށް ދާން ފަށަންވީ. ހަމައެކަނި ވޯޓު ހޯދުމަކަށް ނޫން. ދާންވީ އިތުބާރު ހޯދަން. ހިތްވަރާ އަޒުމާ ޔަގީންކަމާ އެކީ ކުރިއަށްދާންވީ."
އެމްޑީޕީގެ ކޮންގްރެސް މިރޭ ހުޅުވުމަށްފަހު މާދަމާ މެންދުރުފަހުން ފެށިގެން ރޭގަނޑަށް ބޭއްވުމަށް ހަމަޖެހިފައިވަނީ އިންވެސްޓްމަންޓް ފޯރަމެވެ. އެއަށްފަހު ހޮނިހިރު ދުވަހު ހެނދުނުން ފެށިގެން ކޮންގްރެސްގެ ރަސްމީ މަސައްކަތްތައް ފެށުމަށް ވަނީ ހަމަޖެހިފަ އެވެ.
