ރަސްމާލެއިން ހިއްކާ 1010 ހެކްޓަރުގެ ތެރެއިން 500 ހެކްޓަރު އީގަލް ހިލްސްއަށް ދިނުމުގެ ސިއްރު އެއްބަސްވުމަށް އާނއެކޭ ބުނެ، އެކަމަށް ޖާގަ ދީގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމްޑީޕީގެ ކޮންގްރެސް ހުޅުވުމުގެ ރަސްމިއްޔާތުގައި ސޯލިހު ވިދާޅުވީ ފޮރިން އިންވެސްޓްމަންޓާއި ރެސިޑެންސް ވިސާ ދިނުމުގައި މައްސަލައެއް ނެތަސް، ސިއްރުން ހެދޭ އެއްބަސްވުންތަކާ ދެކޮޅު ކަމަށެވެ. އެގޮތުން އެފަދަ އެއްބަސްވުމެއްގެ ދަށުން ކުރިއަށްގެންދާ މަޝްރޫއަކަށް އެމްޑީޕީ ސަރުކާރެއްގައި ޖާގަ ދީގެން ނުވާނެ ކަމަށް އެމަނިކުފާނު ވިދާޅުވި އެވެ.
"އަޅުގަނޑުމެން ފޮރިން އިންވެސްޓްމަންޓާ ދެކޮޅު ހަދަނީއެއް ނޫން. އަދި ރެޒިޑެންސް އިންވެސްޓްމަން ވިސާވެސް އުސޫލުތަކުގެ މަތިން ދިނުމަކީ އަޅުގަނޑުމެން ނުރުހޭ ކަމެއް ނޫން. އެހެން ނަމަވެސް ސުވާލަކީ ނޭނގޭ ކަންތައްތަކެއް މީގެ ތެރޭގައި އޮތީމަ. މި ކޮންގްރެސްއިން މި ސަރުކާރަށާއި އީގަލް ހިލްސްއަށް ގޮވާލަން ޖެހޭނެ މައުލޫމާތު ހާމަކުރުމަށް،" ސޯލިހު ވިދާޅުވި އެވެ.
"ސިއްރު އެއްބަސްވުމަކުން ހިނގާ އެއްވެސް ކަމަކަށް އަޅުގަނޑުމެން އާނއެކޭ ބުނެގެން ނުވާނެ. އަދި އެފަދަ މަސައްކަތެއް އަޅުގަނޑުމެންގެ ސަރުކާރެއްގައި ކުރިއަށް ގެންދިޔުމަށް ޖާގަވެސް ދީގެން ނުވާނެ."
ސޯލިހު ވިދާޅުވީ ރައްޔިތުންގެ ފައިސާއިން 700 މިލިއަން ޑޮލަރު ހަރަދުކޮށްގެން ފުށިދިއްގަރު ފަޅު ހިއްކައިގެން އެތަނުން 500 ހެކްޓަރު ބޭރު ބަޔަކަށް ދޭއިރު އެތަނުން ރައްޔިތުންނަށާއި ސަރުކާރަށް ލިބޭ އެއްޗެއްވެސް ސާފުވާން ޖެހޭނެ ކަމަށެވެ.
"ފުށިދިއްގަރު ފަޅު 1،150 ހެކްޓަރުގެ ބިން މި ހިއްކަނީ ދިވެހި ރައްޔިތުންގެ ފައިސާއިން. ގާތްގަނޑަކަށް 700 މިލިއަން ޑޮލަރު ރައްޔިތުން އެތަނަށް އެބަ ހޭދަކުރޭ. އޭގެ ތެރެއިން 500 ހެކްޓަރު، މުޅި މާލޭގެ ދެ މާލެއަށްވުރެ ބޮޑު ބިމެއް ހިލޭ ބޭރުގެ ބަޔަކަށް ދޭ ވާހަކަ މިއަދު މި އަޑު އިވެނީ. ސުވާލަކީ ރައްޔިތުންނަށް މީގެއިން ވަނީ ކޮން ފައިދާއެއްތޯ. ސަރުކާރަށް މީގެއިން ލިބެނީ ކޯއްޗެއްތޯ،" ސޯލިހު ވިދާޅުވި އެވެ.
އީގަލް ހިލްސްއަށް ރަސްމާލެ ދޭން ސިއްރު އެގްރިމެންޓެއްގައި ސޮއި ކުރީ މިދިޔަ ހަފްތާގެ ހޯމަ ދުވަހެވެ. އެ އެގްރިމެންޓު ހާމަނުކޮށް ސަރުކާރުން ބުނަމުން އައީ ރަސްމާލެ ދިނީ 99 އަހަރަށް ކަމަށެވެ. އެތަން ދިނީ، ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލެ އެވެ.
މިދިޔަ އެމްޑީޕީ ވެރިކަމުގައި ވ. އަތޮޅު ފޮއްތެޔޮ ފަޅު ބޭރު ބަޔަކަށް ދީގެން ސަރުކާރަށް 43 މިލިއަން ޑޮލަރު ވަތްކަން ފާހަގަކުރައްވާ ސޯލިހު ވިދާޅުވީ އެ ފަޅުގައި ބޭރު މީހުންގެ ފައިސާއިން ބިން ހިއްކައިގެން ޑޮމެސްޓިކް އެއާޕޯޓެއް އެޅުމަށްޓަކައި ހަވާލުކުރި ކަމަށެވެ.
މީގެއިތުރުން މިދިޔަ އެމްޑީޕީ ވެރިކަމުގައި ނ. އަތޮޅުން 27 މިލިއަން ޑޮލަރު އެޑްވާންސް ފައިސާގެ ގޮތުގައި ނަގައި ދިން ފަޅު އެސްސީޒެޑްގެ ތެރެއަށް މި ސަރުކާރުން ލުމުގެ ސަބަބުން ޓޫރިޒަމް ގާނޫނުގެ ދަށުން ކުރިން އެތަނުން ލިބެން އޮތް އެތައް ފައިސާއެއްވެސް ގެއްލިގެން ގޮސްފައިވާ ކަމަށް ސޯލިހު ވިދާޅުވި އެވެ.
އެމްޑީޕީގެ ކޮންގްރެސް މިރޭ ހުޅުވުމަށްފަހު މާދަމާ މެންދުރުފަހުން ފެށިގެން ރޭގަނޑަށް ބޭއްވުމަށް ހަމަޖެހިފައިވަނީ އިންވެސްޓްމަންޓް ފޯރަމެވެ. އެއަށްފަހު ހޮނިހިރު ދުވަހު ހެނދުނުން ފެށިގެން ކޮންގްރެސްގެ ރަސްމީ މަސައްކަތްތައް ފެށުމަށް ވަނީ ހަމަޖެހިފަ އެވެ.
