އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އޮކްޓޯބަރު 1، ގައި މާލެ ސިޓީ ހޯލްގައި ފަށާ އެ ޕާޓީގެ ކޮންގްރެސް ކުރިއަށްގެންދާނީ އާންމުންނަށް ހުޅުވާލައިގެން ކަމަށް ބުނެފި އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޑެޕިއުޓީ ޗެއާޕާސަން މާލީ މުހައްމަދު ޝިފާޒު ވިދާޅުވީ އެމްޑީޕީގެ ކޮންގްރެސް ކުރިއަށްގެންދާނީ އާންމުންނަށް ހުޅުވާލައިގެން ކަމުން، ޖާގަ އޮތް މިންވަރަކުން ހާޒިރުވާ އެންމެންނަށް ކޮންގްރެސްގައި ބައިވެރިވުމުގެ ފުރުސަތު ލިބޭނެ ކަމަށެވެ.
"މި ކޮންގްރެސް ބެލުމަށާއި އަޑުއެހުމަށާއި އެނގޭތޯ އަދި ކޮންގްރަސްމަނުން ނޫނަސް އެމްޑީޕީގެ އާންމު މެންބަރުންނަށް އަދި ޝައުގުވެރިކަން ހުރި ހުރިހާ ފަރާތްތަކަށްވެސް އަޅުގަނޑުމެން ހަމަ ހުޅުވާލެވިފައި މިވަނީ. އެހެންވީމަ މި ކޮންގްރެސްއަކީ ބަންދުކޮށްގެން ބާއްވާ ކޮންގްރެސްއެއް ނޫން. ހަމަ އޯޕަން ހުރިހާ ބޭފުޅުންނަށް އަޑުއެހުމަށް ނުވަތަ އެ މަންޒަރުތައް ބެލުމަށް އެތަނަށް ވަޑައިގެންނެވޭނެ،" ޝިފާޒް ވިދާޅުވި އެވެ.
އެމްޑީޕީގެ ކޮންގްރަސްމަނުންގެ ގޮތުގައި 986 ބޭފުޅުން ތިބި ކަމަށާއި ރަޖިސްޓްރޭޝަނަށް ހުޅުވާލި ފުރަތަމަ 24 ގަޑިއިރު ނުނިމެނީސް އޭގެ ތެރެއިން 500 އަށްވުރެ ގިނަ މީހުން ރަޖިސްޓްރީ ކޮށްފައިވާ ކަމަށް ޝިފާޒް ވިދާޅުވި އެވެ.
އޮކްޓޯބަރު 1، ވަނަ ދުވަހުގެ ރޭ އެމްޑީޕީގެ ކޮންގްރެސްގެ ހުޅުވުމުގެ ރަސްމިއްޔާތު ބޭއްވުމަށް ވަނީ ހަމަޖެހިފަ އެވެ. އޮކްޓޯބަރު 2، ވަނަ ދުވަހު މެންދުރު ފަހުން ފެށިގެން ރޭގަނޑަަށް އިންވެސްޓްމަންޓް ފޯރަމް ބޭއްވުމަށް ހަމަޖެހިފައިވާއިރު، އޮކްޓޯބަރު 3، ވަނަ ދުވަހު ހެނދުނުން ފެށިގެން ކޮންގްރެސްގެ ރަސްމީ މަސައްކަތްތައް ފެށުމަށް ވަނީ ހަމަޖެހިފަ އެވެ.
މިގޮތުން އޮކްޓޯބަރު 3، ވަނަ ދުވަހު އަސާސީ ގަވާއިދަށް ގެންނަ ބަދަލުތަކާ ގުޅޭގޮތުން ބަހުސްކޮށް، އަސާސީ ގަވާއިދަށް ގެންނަ އިސްލާހުތައް ފާސްކުރުމަށް ވަނީ ހަމަޖެހިފަ އެވެ.
އެމްޑީޕީގެ ކޮންގްރެސް ބޭއްވުމަށް ސަރުކާރުން އެއްވެސް ތަނެއް ހަމަޖައްސައިދީފައި ނުވާތީ އެކަމުގެ ކަންބޮޑުވުން އެމްޑީޕީން ފާޅުކުރި އެވެ. އޭގެއިތުރުން ޕީއެސްއެމްއިން ކޮންގްރެސްގެ ކަވަރޭޖް ގެނެސްނުދޭތީވެސް އެ ޕާޓީން ކަންބޮޑުވުން ފާޅުކުރި އެވެ.
