މަޝްހޫރު ލަވަކިޔުންތެރިޔާ ރިއާނާ އާއި އޭނާގެ ބައިވެރިޔާ އޭސެޕް ރޮކީ ދިރިއުޅޭ ގޭގެ ތެރޭގައި ހުރި ޓްރެއިލަރަކަށާއި އެ ދެމަފިރިންގެ ދަރިން ތިބި ކޮޓަރިއަށް އަމާޒުކޮށް ބަޑިޖެހި ކަމަށް ތުހުމަތުކުރެވޭ އަންހެންމީހާގެ މައްޗަށް ޝަރީއަތް ހިންގޭނެ ކަމަށް ފަނޑިޔާރަކު އަންގާރަ ދުވަހު ކަނޑައަޅައިފި އެވެ.
ފްލޮރިޑާގެ އޯލެންޑޯއަށް ނިސްބަތްވާ އުމުރުން 36 އަހަރުގެ އިވާނާ ލިސެޓް އޯޓިޒްގެ މައްޗަށް ވަނީ މިދިޔަ މާޗް މަހު ހިނގި ބަޑިޖެހުމުގެ ހާދިސާއާ ގުޅިގެން ރިއާނާ މަރާލަން އުޅުމުގެ ދައުވާގެ އިތުރުން ޖިނާއީ ބޮޑު 12 ދައުވާއެއް އުފުލާފަ އެވެ. ނަމަވެސް އޭނާ ވަނީ އެ ހުރިހާ ދައުވާތަކަށް އިންކާރުކޮށްފަ އެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވި ނަމަވެސް، ރިއާނާ އާއި އޭސެޕް ރޮކީ ތިބި އެއާސްޓްރީމް ޓްރެއިލަރަށް ވަޒަންތައް އަރައި ވަނީ ބޮޑެތި ގެއްލުންތަކެއް ވެފަ އެވެ. އަދި އެ ވަގުތު އެ ދެމަފިރިންގެ ކުޑަ ދަރިން ތިބި ކޮޓަރީގެ ފާރަށް ވެސް ވަޒަންތައް އަރާފައިވެ އެވެ.
މަސްތަކެއް ވަންދެން ހެދި ނަފްސާނީ ތަހުލީލުތަކަށް ފަހު، ލޮސް އެންޖެލިސް ކައުންޓީ ކޯޓުގައި ބޭއްވި ކުރު އަޑުއެހުމެއްގައި ފަނޑިޔާރު މާރިއާ ކަވަލޫޒީ ވިދާޅުވީ، މެދުކަނޑާލާފައިވާ ޖިނާއީ އިޖުރާއަތްތައް އަލުން ކުރިއަށް ގެންދަން ނިންމާފައިވާ ކަމަށެވެ.
ކޯޓުގެ ބަންދުކޮށްފައިވާ ސަރަހައްދެއްގައި ބިއްލޫރިގަނޑެއްގެ ފަހަތުގައި އޯޓިޒް ހުރިއިރު، އޭނާ ހުރީ ޖަލު ހެދުމުގައި ބިޑި އަޅުވާފަ އެވެ. މުޅި އަޑުއެހުމުގައި ވެސް އޭނާ އެއްވެސް ވާހަކައެއް ނުދައްކަ އެވެ. އޭނާގެ މައްޗަށް އުފުލާފައިވާ ހުރިހާ ދައުވާތަކެއް ސާބިތުވެއްޖެ ނަމަ، އުމުރުދުވަހުގެ ޖަލު ހުކުމެއް އައުމުގެ ފުރުސަތު އެބައޮތެވެ.
އޯޓިޒްގެ ނަފްސާނީ ހާލަތާ ގުޅޭގޮތުން ކޯޓުގައި ސީދާ ބަހުސެއް ކޮށްފައި ނުވާއިރު، އެފަދަ ތަފްސީލުތައް ހިމެނޭ މައްސަލައިގެ ލިޔެކިޔުންތައް ވަނީ ސިއްރުކޮށްފަ އެވެ. މައްސަލަ ފެށުނުތާ ކުޑަދުވަސްކޮޅެއްގެ ތެރޭގައި މެދުކަނޑާލާފައި އޮތް ޖިނާއީ ޝަރީއަތުގެ މަރުހަލާ މިހާރު ވަނީ އަލުން ފަށާފަ އެވެ.
އަޑުއެހުމަށް ފަހު ކޯޓުން ބޭރުގައި ދެ ފަރާތުގެ ވަކީލުން ވެސް މީޑިއާއަށް މައުލޫމާތު ދިނުމަށް ވަނީ އިންކާރުކޮށްފަ އެވެ.
ފުލުހުންނާއި ޕްރޮސިކިއުޓަރުން ތުހުމަތުކުރާ ގޮތުގައި، މާޗް މަހުގެ 8 ވަނަ ދުވަހު އޯޓިޒް ވަނީ ޓެސްލާ ކާރެއްގައި ރިއާނާ އާއި އޭނާގެ ބައިވެރިޔާ ދިރިއުޅޭ ބެވަަލީ ހިލްސް ސަރަހައްދުގެ ގެއަށް ގޮސް، ކާރުގެ ކުޑަދޮރުން އޭއާރު-15 މާކުގެ ބަޑިއަކުން އެ ގެއަށާއި ޖެހިގެން ހުރި ގެއަކަށް އަމާޒުކޮށް މަދުވެގެން 20 ވަޒަން ފޮނުވާލާފަ އެވެ.
ހާދިސާ ހިނގި ދުވަހުގެ ވަގުތެއްގައި އޯޓިޒް ހައްޔަރުކުރުމުން، އޭނާ ބުނެފައިވަނީ "އަހަރެން މީހަކު މަރާލަން މަސައްކަތެއް ނުކުރަން" ކަމަށް ތަހުގީގު ކުރާ ފަރާތްތަކުން ބުނެ އެވެ.
ކަމާބެހޭ ފަރާތްތަކުން ބުނި ގޮތުގައި އޯޓިޒްއަކީ މީގެ ކުރިން ކުށުގެ ރެކޯޑެއް އޮތް މީހެއް ނޫނެވެ. އާންމު ރެކޯޑުތަކުން ދައްކާ ގޮތުގައި އޭނާއަކީ ވޭތުވެދިޔަ 10 އަހަރަށް ވުރެ ގިނަ ދުވަހު ލައިސަންސް ލިބިގެން މަސައްކަތް ކުރަމުން އައި ސްޕީޗް ޕެތޮލޮޖިސްޓެކެވެ.
މި ހަމަލާ ދޭން މެދުވެރިވި ސަބަބެއް ނުވަތަ އޯޓިޒް އާއި ރިއާނާއާ ދެމެދު އެއްވެސް ގުޅުމެއް އޮތް ކަމެއް ކަމާބެހޭ ފަރާތްތަކުން ހާމަކޮށްފައެއް ނުވެ އެވެ. އަދި އޭނާގެ ވަކީލުން ވެސް، ދައުވާއަށް އިންކާރުކުރުމާއި އިޖުރާއީ ކަންކަން ފިޔަވައި އިތުރު ވާހަކައެއް ދައްކާފައެއް ނުވެ އެވެ.
ނުވަ ފަހަރު ގްރެމީ އެވޯޑް ހޯދާފައިވާ ރިއާނާގެ 14 ލަވައެއް ވަނީ ބިލްބޯޑް ހޮޓް 100 ޗާޓުގެ އެއްވަނަ ހޯދާފަ އެވެ. އޭގެ ތެރޭގައި "ވީ ފައުންޑް ލަވް"، "ވޯކް"، "އަމްބްރެއްލާ" އަދި "ޑިސްޓާބިއާ" ފަދަ މަޝްހޫރު ލަވަތައް ހިމެނެ އެވެ.
