މަޝްހޫރު އިނގިރޭސި އެކްޓަރު ޓިމް ކަރީ މަރުވީ ހިތުގެ ބައްޔެއް ކަމަށްވާ "ކޮރޮނަރީ އާޓަރީ ޑިޒީޒް" ގެ ސަބަބުން ކަމަށް އޭނާގެ ތަރުޖަމާނު ބުނެފި އެވެ.
"ދަ ރޮކީ ހޮރޯ ޕިކްޗާ ޝޯ" އިން ބޮޑު މަގުބޫލުކަމެއް ހޯދި މި އެކްޓަރު މަރުވީ އޯގަސްޓް 25 ވަނަ ދުވަހު، ލޮސް އެންޖެލިސްގައި ހުންނަ އޭނާގެ ގޭގަ އެވެ. މަރުވިއިރު އުމުރަކީ 80 އަހަރެވެ.
ލޮސް އެންޖެލިސް ކައުންޓީއަށް ހުށަހަޅާފައިވާ މަރުގެ ސެޓިފިކެޓާ ހަވާލާދީ އޭނާގެ ތަރުޖަމާނު ބުނި ގޮތުގައި، ހިތުގެ ބަލީގެ އިތުރުން ކަރީއަކީ މީގެ ކުރިން ސްޓްރޯކެއް ޖެހިފައިވާ އަދި ކިޑްނީ ކެންސަރަށް ފަރުވާ ހޯދަމުންދިޔަ މީހެކެވެ. މިއީ އޭނާ މަރުވުމަށް މެދުވެރިވި ސަބަބުތަކެއްގެ ގޮތުގައި ވަނީ ފާހަގަކޮށްފަ އެވެ.
ކަލްޓް ކްލެސިކް ފިލްމެއް ކަމަށްވާ 1975 ވަނަ އަހަރުގެ "ދަ ރޮކީ ހޮރޯ ޝޯ" ގައި ޑރ. ފްރޭންކް-އެން-ފާޓާގެ ރޯލުން މަޝްހޫރުވި ކަރީގެ ވަކިވުމާ ގުޅިގެން، ފިލްމީ ދާއިރާގެ ގިނަ ފަންނާނުން ވަނީ ހިތާމަފާޅުކޮށްފަ އެވެ.
މީގެ ކުރިން 2012 ވަނަ އަހަރު ޖެހުނު ނުރައްކާތެރި ސްޓްރޯކަކަށް ފަހު، ކަރީ އުޅެމުންދިޔައީ ފުރޮޅުލީ ގޮނޑީގަ އެވެ. އެ ހާދިސާއަށް ފަހު އޭނާގެ މަސައްކަތްތައް ހަމައެކަނި ވޮއިސް އެކްޓިންއަށް ބަދަލުކުރި އެވެ. ސްޓްރޯކުގެ ސަބަބުން ހަށިގަނޑުގެ އެއްބައި ވާގިނެތުނު ނަމަވެސް، ވާހަކަ ދެއްކުމުގެ ގާބިލުކަން ގެއްލިގެން ނުދިޔުމަކީ އޭނާ އުފާކުރި ކަމެކެވެ.
ބަލިހާލަތުގައި ވެސް އޭނާ ވަނީ ފިލްމީ އެކި ހަރަކާތްތަކުން ފެނިފަ އެވެ. އަދި މިދިޔަ އަހަރު އޭނާ ވަނީ "ވެގަބޮންޑް" ގެ ނަމުގައި އަމިއްލަ ހަޔާތުގެ މައްޗަށް ފޮތެއް ނެރެފަ އެވެ. އެ ފޮތުގައި އޭނާއަށް ދިމާވި ސިއްހީ މައްސަލަތަކާއި، ބަލިން އަރައިގަތުމަށް ކުރި ދިގު ދަތުރުގެ ވާހަކަތައް ހިއްސާކޮށްފައިވެ އެވެ.
"ޕީޕަލް" މެގަޒިންގައި ރިޕޯޓްކޮށްފައިވާ ގޮތުގައި، އެ ހާދިސާއަށް ފަހު ކަރީ ބުނެފައިވަނީ އޭނާ އަދިވެސް ދުނިޔޭގައި ހުރިކަމީ ގަބޫލުކުރަން ދަތި، އާދަޔާ ހިލާފު ކަމެއް ކަމަށެވެ.
އިނގިރޭސިވިލާތުގެ ހުޅަނގު އުތުރުގެ ރަށެއް ކަމަށްވާ ވޮރިންގްޓަނަށް 1946 ވަނަ އަހަރު އުފަންވި ކަރީ، ފިލްމީ ދާއިރާއަށް ވަނީ ޔުނިވާސިޓީ ނިންމުމަށްފަހު 1968 ވަނަ އަހަރު ލަންޑަނުގައި އުފެއްދި މިއުޒިކަލް "ހެއާ" އިންނެވެ.
އޭނާއާއެކު މަސައްކަތްކުރި ރިޗަޑް އޯބްރަޔަންގެ އެދުމުގެ މަތިން 1973 ވަނަ އަހަރު "ދަ ރޮކީ ހޮރޯ ޝޯ" ގެ އޮޑިޝަންގައި ބައިވެރިވެ، އެ މަޝްހޫރު ރޯލު ކަރީއަށް ލިބުނެވެ.
ކަރީ ކުޅެފައިވާ ފާހަގަކޮށްލެވޭ އެހެން ރޯލުތަކުގެ ތެރޭގައި 1990 ވަނަ އަހަރުގެ "އިޓް" ގައި ކުޅުނު ޕެނީވައިޒް ކްލައުންގެ ރޯލާއި، "ސްޕަމަލޮޓް" ގެ ސްޓޭޖް ޝޯގައި ކުޅުނު ކިންގް އާތާގެ ރޯލުގެ އިތުރުން "އެނީ"، "ހޯމް އެލޯން 2"، "ދަ ހަންޓް ފޯ ރެޑް އޮކްޓޯބާ" އަދި "ސްކޭރީ މޫވީ 2" ފަދަ ފިލްމުތައް ހިމެނެ އެވެ.
