ސޯޝަލް މީޑިއާގައި ނުފޫޒުގަދަ އެންޑްރޫ ޓޭޓަކީ އިންތިހާއަށް މުއްސަނދި މީހެއްގެ ގޮތުގައި އަމިއްލައަށް ދެއްކި ނަމަވެސް، އޭނާގެ އެކައުންޓްތަކުން ފެންނަ އަގުބޮޑު ކާރުތަކާއި ޔޮޓަކީ އޭނާގެ އަމިއްލަ ތަކެތި ނޫން ކަމަށާއި، އޭނާ އެފަދަ ދިރިއުޅުމެއް ދައްކާފައިވަނީ އާންމުންގެ ސަމާލުކަން ހޯދުމަށް ކަމަށް އޭނާގެ ވަކީލުން ބުނެފި އެވެ.
އެންޑްރޫ ޓޭޓާއި އޭނާގެ ކޮއްކޮ ޓްރިސްޓަން ޓޭޓް މިވަގުތު އެމެރިކާގެ ފްލޮރިޑާގެ ޖަލެއްގައި ބަންދުކޮށްފައި ތިބިއިރު، އެ މީހުން އިނގިރޭސިވިލާތާ ހަވާލުކުރުމުގެ މައްސަލަ ނިމެންދެން ކަފާލާތުގެ ދަށުން މިނިވަންވުމަށް ދަނީ މަސައްކަތް ކުރަމުންނެވެ.
މި ދެބެއިން ހައްޔަރުކޮށްފައިވަނީ، ޖިންސީ ގޯނާގެ ތުހުމަތުތައް ހިމެނޭހެން އިނގިރޭސިވިލާތުގެ ޕްރޮސިކިއުޓަރުން އެ މީހުންގެ މައްޗަށް އާ ދައުވާތަކެއް އުފުލުމާ ގުޅިގެން މިދިޔަ މަހުގެ ތެރޭގަ އެވެ. ނަމަވެސް އެ ދެބެއިން ވެސް ވަނީ އެ ތުހުމަތުތަކަށް އިންކާރުކޮށްފަ އެވެ.
ޕްރޮސިކިއުޓަރުން ކޯޓުގައި ބުނެފައިވަނީ، ޓޭޓްގެ ދެބެއިންނަކީ ފިލައިގެން ދިއުމުގެ ފުރުސަތު އޮތް ބައެއް ކަމަށެވެ.
ކޯޓަށް ހުށަހެޅި ލިޔެކިޔުންތަކުގައި އެ ދެބެއިންގެ ވަކީލުން ބުނެފައިވަނީ، ޓޭޓްގެ ދެބެއިންގެ ވިޔަފާރި ބިނާވެފައިވަނީ "އިންޓަނެޓްގެ ސަމާލުކަން" ހޯދުމުގެ މައްޗަށް ކަމަށެވެ.
"އެ މީހުން ކުރާ ޕޯސްޓްތަކާއި އެ މީހުންނާ ބެހޭގޮތުން ކުރާ ޕޯސްޓްތަކަކީ އާންމުން ހައިރާންކޮށްލުމަށް ކުރާ ކަންކަން. ޕޯސްޓްތައް ކިތަންމެ ބޮޑުކޮށްލައިގެންނާއި ހަގީގަތާ ހިލާފަށް ގެނެސްދިން ވަރަކަށް، އެއަށް ލިބޭ ވިއުސް އާއި ލައިކްސް އިތުރުވެ، އާމްދަނީ ވެސް އިތުރުވޭ. ކުރުކޮށް ބުނާނަމަ، އެ މީހުން އެ ކުޅެނީ ރޯލެއް،" ވަކީލުން ހުށަހެޅި ލިޔުމުގައި ބުނެފައިވެ އެވެ.
މީގެ އިތުރުން، ބައެއް ފަހަރު އެންޑްރޫ ޓޭޓް ކަންކަން ބޮޑުކޮށްލައިގެން ދައްކަނީ "މަޖާ ކުރުމުގެ" ގޮތުން ކަމަށާއި، އެއީ ސީރިއަސްކޮށް ދައްކާ ވާހަކަތަކެއް ނޫން ކަމަށް ވެސް ވަކީލުން ވަނީ ބުނެފަ އެވެ.
"ސަރުކާރުން ތުހުމަތު ކުރަނީ އެ މީހުންނަކީ އަމިއްލައަށް ބިލިއަނަރުން ކަމަށް ދައުވާކުރާ، އަދި އަގުބޮޑު ކާރުތަކާއި ޕްރައިވެޓް ޖެޓްތަކުގެ އިތުރުން 50 މިލިއަން ޑޮލަރުގެ ސުޕަޔޮޓެއް އޮންނަ ކަމަށް ބުނާ ބައެއް ކަމަށްވާތީ ފިލައިގެން ގޮސްފާނެ ކަމަށް. އަދި ކްރިޕްޓޯކަރަންސީ އާއި ބިޓްކޮއިން ފަދަ ފައިސާގެ ވަސީލަތްތައް އެ މީހުންގެ އަތުގައި ހުރި ކަމަށް ސޯޝަލް މީޑިއާގައި ބުނެފައިވާތީ އެއީ ފިލައިގެން ދިއުމުގެ ބިރު އޮތް ކަމެއްގެ ގޮތުގައި ސަރުކާރުން ފާހަގަކުރޭ،" ވަކީލުން ބުންޏެވެ.
ޕްރޮސިކިއުޓަރުން ވަނީ މި ދެބެއިންގެ އަތުގައި ފައިސާގެ ގޮތުންނާއި ސޯޝަލް މީޑިއާގެ ނެޓްވޯކްތަކުގެ ގޮތުން ބޮޑެތި ވަސީލަތްތަކެއް ހުރިކަން ފާހަގަކޮށްފަ އެވެ. އަދި މައްސަލައިގައި ހިމެނޭ އަނިޔާ ލިބުނު މީހުންނަށް ބިރުދެއްކުމުގެ އަމަލުތަކެއް އެ މީހުންގެ ފަރާތުން ފެނިފައިވާ ކަމަށް ވެސް ޕްރޮސިކިއުޓަރުން ބުންޏެވެ.
މީގެ އިތުރުން، އެންޑްރޫ ޓޭޓް ސޯޝަލް މީޑިއާގައި ޕްރޮސިކިއުޓަރުންނަށް މަލާމާތްކޮށް، ހައްޔަރުވުމުން ސަލާމަތްވުމަށް އޭނާގެ އައިޑެންޓިޓީ ނުވަތަ އަމިއްލަ ވަނަވަރު ފޮރުވިދާނެ ކަމަށް ބުނެފައިވާ ޕޯސްޓްތަކެއް ވެސް ޕްރޮސިކިއުޓަރުން ވަނީ ހެކީގެ ގޮތުގައި ދައްކާފަ އެވެ.
ނަމަވެސް ވަކީލުން ބުނެފައިވަނީ، އެ މީހުން ދައްކާ 50 މިލިއަން ޑޮލަރުގެ ސުޕަޔޮޓަކީ ޓޭޓްގެ ދެބެއިންގެ އެއްޗެއް ނޫން ކަމަށާއި، އެއީ އެ ޔޮޓް އިޝްތިހާރު ކުރުމަށް އެ މީހުންނަށް ފައިސާ ދީގެން ކޮށްފައިވާ ކަމެއް ކަމަށެވެ.
އަދި އެސްޓަން މާޓިން އާއި ބުގާޓީ ފަދަ އަގުބޮޑު ކާރުތަކަކީ ވެސް ކުއްޔަށް ހިފައިގެން ގެންގުޅުނު ތަކެތި ކަމަށް ވަކީލުން ބުންޏެވެ.
އިނގިރޭސިވިލާތުގެ ކްރައުން ޕްރޮސިކިއުޝަން ސާވިސްއިން އެ ދެބެއިންގެ މައްޗަށް ރޭޕް ކުރުމާއި އިންސާނީ ވަގުފާރީގެ ތުހުމަތު ހިމެނޭހެން 38 އާ ދައުވާއެއް އުފުލުމާ ގުޅިގެން، ޔޫއެސް މާޝަލްސްއިން އެ މީހުން ހައްޔަރުކުރީ މިދިޔަ މަހު މިއާމީއިންނެވެ.
މިހާރު އެ މީހުންގެ މައްޗަށް ޖުމްލަ 59 ދައުވާއެއް އުފުލާފައިވާއިރު، މިއީ ޖުލައި 2010 އާއި އޮގަސްޓް 2017 އާ ދެމެދު ހިންގާފައިވާ ކަމަށް ބުނާ ކުށްތަކެކެވެ.
އުމުރުން 39 އަހަރުގެ އެންޑްރޫ އާއި 38 އަހަރުގެ ޓްރިސްޓަން އަކީ އިނގިރޭސިވިލާތާއި އެމެރިކާގެ ރައްޔިތުކަން އޮންނަ ދެ މީހުންނެވެ. އެ މީހުން މީގެ ކުރިން ވެސް ވަނީ އެއްވެސް ގޯސް ކަމެއް ކޮށްފައި ނުވާނެ ކަމަށް ބުނެފަ އެވެ.
އަމިއްލައަށް "އަންހެނުންދެކެ ރުޅިއަންނަ މީހެއް" ނުވަތަ މިސޮޖިނިސްޓެއްގެ ގޮތުގައި ސިފަކުރާ ޓޭޓް އެންމެ ފުރަތަމަ މަޝްހޫރުވީ 2016 ވަނަ އަހަރު އިނގިރޭސިވިލާތުގެ ރިއަލިޓީ ޝޯ "ބިގް ބްރަދާ" އިން ފެނުމަށްފަހު އެވެ.
ކުރީގެ ކިކްބޮކްސަރެއް ކަމަށްވާ ޓޭޓްގެ މިލިއަނުން ފޮލޯވަރުން ތިބިއިރު، އޭނާ ވަނީ އިންތިހާއަށް އަގުބޮޑު ދިރިއުޅުމެއް އުޅޭކަން ދައްކުވައިދޭ ގިނަ އަދަދެއްގެ ވީޑިއޯތައް އާންމުކޮށްފަ އެވެ.
