ރަސްމާލެއިން ބައެއް ބޭރު ބަޔަކަށް ދިނުމަކީ އަންނަން އޮތް ޖީލަށް ދެވޭ ނިކަމެތިކަމެއް ކަމަށް ވެލިދޫ ދާއިރާގެ އެމްޑީއޭ މެންބަރު މުހައްމަދު އައްބާސް މިއަދު ވިދާޅުވެއްޖެ އެވެ.
ރަސްމާލެއިން ހިއްކާ 1010 ހެކްޓަރުގެ ތެރެއިން 500 ހެކްޓަރު ދިނީ އީގަލް ހިލްސްއަށެވެ. ބިދޭސީ މަހުޖަނުންނަށް ދާއިމަށް ދިރިއުޅެވޭ ގޮތަށް ހަދާ އެ ރަށުގެ އެޕާޓްމަންޓްތައް ވިއްކުމުގެ މަސައްކަތް މިހާރު އެ ކުންފުނިން ވަނީ ފަށައިފަ އެވެ.
އައްބާސް ވިދާޅުވީ ބޮޑު ހޭދައެއް ކޮށްގެން ރަސްމާލެ ހިއްކުމުގެ މަގްސަދު ސަރުކާރުން އޮޅުވާލައި، ރަސްމާލެއިން 550 ހެކްޓަރު 99 އަހަރަށް ބޭރު ބަޔަކަށް ދިނުމަކީ ގައުމުގެ ރައްޔިތުންނާއި އަންނަން އޮތް ޖީލަށް ދެވޭ ވަރަށް ބޮޑު ނިކަމެތި ކަމެއް ކަމަށެވެ.
"ރައްޔިތުންގެ ޓެކުސް ފައިސާއިން ބޮޑުހޭދައެއްކޮށް ރަސްމާލެ ބިން ހިއްކުމުގެ މަގުސަދު ސަރުކާރުން އޮޅުވާލައިފި. ރަސްމާލެއިން ހިއްކަން ކިޔާ 1150 ހެކްޓަރުގެ ތެރެއިން ހިއްކިފާ އޮތް 550 ހެކްޓަރު ބިން 99 އަހަރަށް ސަރުކާރުން ބޭރުބަޔަކަށް ދިނުމަކީ ކަޑައެޅިގެން މި ގައުމުގެ ރައްޔިތުންނަށް، އަންނާންއޮތް ޖީލަށް ދެވޭ ވަރަށްވެސްބޮޑު ނިކަމެތިކަމެއް،" އައްބާސް ވިދާޅުވި އެވެ.
އައްބާސް ވިދާޅުވީ ރައްޔިތުންގެ ޓެކްސްފައިސާއިން 750 މިލިއަން ޑޮލަރު ހޭދަކޮށްގެން ހިއްކާފައޮތް ބިމުން ބޭރުބަޔަކަށް ވަޒަންވެރިވޭ ގޮތަށް އިމާރާތް އަމިއްލަ ކުރެވޭނެހެން 99 އަހަރަށް ސަަރުކާރުން ދިނުމަކީ ރާއްޖޭގެ ވަޒަންވެރީންގެ ގޮތުގައި އެހެން ދީންތަކުގެ މީހުން އާބާދުވުމަށް ދެވޭ ފުރުސަތެއް ކަމަށެވެ.
މީގެއިތުރުން ޔަހޫދީ އިޒުރާއީލްގެ އަނިޔާވެރި، އިންސާނިއްޔަތު ކަމެއް ނެތް ސިޔާސަތާއި، ފިކުރާ ހިޔާލަށް ތާއިދު ކުރާ، ޔަހޫދީ ދައުލަތަށް ފަންޑު ކުރަމުންދާ އީގަލް ހިލްސްއާއެކު މިފަދަ އެއްބަސްވުމަކަށް ދިއުމަކީ ކަންބޮޑުވާ ބިރުބޮޑު ކަމެއް ކަމަށްވެސް އައްބާސް ވިދާޅުވި އެވެ.
"ދިވެހި ދައުލަތުން ސޮއިކޮށް އަމަލުކުރަން ޖެހިފައިވާ ބޭރުގެ މުއާހަދާތަކުގެ ތެރެއިން ސަމާއޯ އެއްބަސްވުމަށް ބަލާނަމަ، އެހެންދީނެއްގެ ބަޔަކު މިތަނަުގައި ވަޒާންވެރިވެއްޖެނަމަ، އެބައެއްގެ އިންސާނީހައްގުތައް ކަށަވަރުވެފައި އޮންނާންޖެހޭނެ. އަދި އެމީހުންގެ ދީނީ މިނިވަންކަން ހޯދައި ދިނުމަކީ ދިވެހި ސަރުކާރަށް ލާޒިމް ކުރާކަމެއް،" އޭނާ ވިދާޅުވި އެވެ.
އީގަލް ހިލްސްއަށް ރަސްމާލެ ދޭން ސިއްރު އެގްރިމެންޓެއްގައި ސޮއި ކުރީ މިދިޔަ ހަފްތާގެ ހޯމަ ދުވަހެވެ. އެ އެގްރިމެންޓު ހާމަނުކޮށް ސަރުކާރުން ބުނަމުން އައީ ރަސްމާލެ ދިނީ 99 އަހަރަށް ކަމަށެވެ. އެތަން ދިނީ، ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލެ އެވެ.
މި މައްސަލައިގައި ސަރުކާރަށް އިންތިހާއަށް ފާޑުކިޔުން އަމާޒުވި ނަމަވެސް ސަރުކާރުން މަސައްކަތް ކުރަމުން އަންނަނީ މިއީ ރަނގަޅު މުއާމަލާތެއް ކަމުގައި ދައްކާށެވެ. އެ ގޮތުން މިއީ އާންމު އުސޫލުން ރިސޯޓުތައް ދޭ ގޮތަށް ދީފައިވާ ތަނެއް ކަމަށާއި މި އިންވެސްޓުމަންޓުން ރާއްޖެ ނުދެކޭ ވަރުގެ އާމްދަނީ ވަންނާނެ ކަމަށް އަންނަނީ ބުނަމުންނެވެ.
