ރަސްމާލެ ހޯދި ޔުނައިޓެޑް އެރަބް އެމިރޭޓްސްގެ އީގަލް ހިލްސް ކުންފުނިން އެ ޕްރޮޖެކްޓާ ގުޅޭ ގޮތުން ނެރުނު ނޫސް ބަޔާން ބަދަލުކޮށްފި އެވެ.
ސަރުކާރުން ބުނަނީ ރަސްމާލެ ދެނީ ކުއްޔަށް ކަމަށާއި ދެނީ 99 އަހަރަށް ކަމަށެވެ. ނަމަވެސް ރަސްމާލޭގެ ހުރިހާ ޕްރޮޕަޓީއެއް ޓްރާންސްފާ އަދި ވާރުތަ ކުރެވޭނެ ކަމަށާއި އެއިން ކޮންމެ ފަހަރަކު 99 އަހަރުގެ އާ ލީސް މުއްދަތެއް ފެށޭނެ ކަމަށް އީގަލް ހިލްސް އިން ވެސް ބުނެ އެވެ.
އީގަލް ހިލްސް އިން މިއަދު ބަދަލު ކުރީ ރަސްމާލެ ޕްރޮޖެކްޓުގައި ސޮއި ކުރި ދުވަހު ސެޕްޓެމްބަރު 21، ގައި ނެރުނު ނޫސް ބަޔާނެވެ. ބަދަލު ކުރީ 99 އަހަރަށް ބިން ލިބުމާއި ކޮންމެ ޓްރާންސްފާއަކާއެކު 99 އަހަރުގެ އާ ކުލީގެ މުއްދަތެއް ފެށޭނެ ކަމަށް ބުނާ ބަޔެވެ.
"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ،" އީގަލް ހިލްސް އިން އިނގިރޭސި ބަހުން ނެރުނު ބަޔާނުގައި ކުރި ބުނެފައިވެ އެވެ.
ނަމަވެސް ނޫސް ބަޔާނުގެ އެ ބައި އީގަލް ހިލްސް އިން ފަހުން ވަނީ ބަދަލުކޮށްފަ އެވެ. ރަސްމާލޭގެ ޕްރޮޕަޓީއެއް ވިއްކާލައިފި ނަމަ ނުވަތަ ވާރުތައިން ދީފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށް ބުނާ ބައި މިހާރު ނޫސް ބަޔާނުން ވަނީ އުނިކޮށްފަ އެވެ.
ނޫސް ބަޔާނުން އެބައި އުނިކޮށްފައި މި ވަނީ ދިވެހިންނަށް ދުވަހަކު ވެސް ރަސްމާލެ ނުލިބޭ ގޮތަށް އެގްރިމެންޓު ހެދިކަން ހާމަވެ، އެކަމާ ދެކޮޅަށް ވަރަށް ގިނަ ބަޔަކު އަޑު އުފުލަން ފެށުމުންނެވެ. އަދި އާންމުންގެ ކަންބޮޑުވުންތައް ފާޅުކުރަން ފެށުމުން މރަސްމާލެ ދޫކޮށްލުމުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއި ކުރެއްވި މިނިސްޓަރު މުއްތަލިބު ވަނީ އެކަމާ ގުޅޭ ގޮތުން ވާހަކަ ދައްކަވައިފަ އެވެ.
"ރަސްމާލޭން ޕްރޮޕަޓީ ގަންނަ ފަރާތުގެ މިލްކަކީ އެ ޕްރޮޕަޓީއެކެވެ. އެ ޕްރޮޕަޓީ ހިމެނޭ ބިމަކީ ދިވެހި ދައުލަތުގެ މިލްކެއް. އެ ޕްރޮޕަޓީއެއް ވިއްކާލާ ނަމަ، ނުވަތަ އެފަރާތެއް މަރުވުމުން ވާރުތަވާ ނަމަ، ވާރުތަވާނީ ދިވެހި ސަރުކާރުން ބަލަންޖެހޭ ކަންކަން ބެލުމަށްފަހު ހުއްދަކުރާނަމަ،" މުއްތަލިބު ވިދާޅުވި އެވެ.
