ރަސްމާލޭ ވޯޓާފްރަންޓް އެންޑް މެރީނާ މަޝްރޫއު ހިންގަން ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން ދިނުމަކީ ރާއްޖޭގެ ރަށްތަކާއި ފަޅުތައް ބޭރު މީހުންނަށް ވިއްކާލުމުގެ ފެށުން ކަމަށް މާލީ ދާއިރާގެ ތަޖުރިބާކާރު އިސްމާއީލް ޒަރިޔަންދު ވިދާޅުވެއްޖެ އެވެ.
އަދަދު ނޫހުގެ އެތެރެފުށް ޕްރޮގްރާމުގައި ވާހަކަދައްކަވަމުން ޒަރިޔަންދު ވިދާޅުވީ ރަސްމާލޭގެ ބިމުން ބައެއް އީގަލް ހިލްސް ކުންފުންޏަށް ދޭން ނިންމުމަކީ އަދި، ދެން އަންނާން އޮތް ބޮޑު މައްސަލައެއްގެ ފެށުން ކަމަށެވެ.
"މިއީ ދިވެހިރާއްޖޭގެ ވެރިކަމުގައި މިހާރު ތިއްބެވި ބޭފުޅުން ހަމަ ދުރާލައި ރާވައިގެން ރާއްޖޭގެ ބިންތައް، ފަރުތައް، ރާއްޖޭގެ ބައެއް މުހިންމު އޭރިއާތައް ބޭރުގެ ފަރާތްތަކަށާއި އަދި، ކައުންސިލްތަކުގެ ގާނޫނުތައް ބަދަލުކޮށްގެން އެފަރާތްތަކަށް އެއްބާރުލުންދޭ ފަރާތްތަކަށް ރާއްޖޭގެ އެކި ސަރަހައްދުތައް ވިއްކާލުމުގެ.. ވިއްކާލުމުގެ ހަމަ ރޭވުންތެރި ރޭވުމެއްކަމަށް އަޅުގަނޑަށް ފެންނަނީ،" ޒަރިޔަންދު ވިދާޅުވި އެވެ.
ޒަރިޔަންދު ވިދާޅުވީ ޕީއެންސީގެ ސުޕަ މެޖޯރިޓީ އޮތް ރައްޔިތުންގެ މަޖިލީހުން ގާނޫނުތަކަށް ބަދަލުގެނެސްފައި ަވނީ މިފަދަ ކަންކަން ކުރެވޭ ގޮތަށް ކަމަށެވެ. އަދި، ގާނޫނުތައް ބަދަލުކޮށްފައި ވަނީ ދިގު މުއްދަތަށް މި ސަރުކާރުން ކުއްޔަށްދޭ ތަންތަން އަތުލުމަށް ދަތިވާނެ ގޮތަށް ކަމަށެވެ.
އޭގެ އިތުރުން، އީގަލް ހިލްސް އާއި އެ ކުންފުންޏާއެކު މަސައްކަތް ކުރާ ކުންފުނިތަކަކީ ޒަޔޮނިސްޓުންނާ ވަރަށް ގާތް ގުޅުން އޮންނަ ފަރާތްތަކެއް ކަމަށް ޒަރިޔަންދު ތުހުމަތުކުރެއްވި އެވެ.
ރަސްމާލޭގެ ބޮޑުބައެއް އީގަލް ހިލްސް ކުންފުންޏަށް ދީފިނަމަ، އެ ތަނުގައި ދެ ޕާސްޕޯޓު ގެންގުޅޭ ޒަޔޮނިސްޓުން އާބާދުވުމުގެ ފުރުސަތު ވަރަށް ބޮޑުކަމަށް އޭނާ ވިދާޅުވި އެވެ.
"ރާއްޖޭގައި އިޒުރޭލު ޕާސްޕޯޓު ގެންގުޅޭ މީހުން މަނައޭ، އެކަމަކު ޑުއެލް ޕާސްޕޯޓު ގެންގުޅޭ މީހަކަށް ރާއްޖޭގައި މި ތަނުން ގެއެއް ގަނެވިދާނެ،" ޒަރިޔަންދު ވިދާޅުވި އެވެ.
ރަސްމާލޭގައި އީގަލް ހިލްސްއިން ތަރައްގީކުރާ ޕްރޮޕާޓީތައް ގަންނަ މީހުންނަށް 99 އަހަރަށް ވިސާ ވެސް ދޭންޖެހޭނެކަން ފާހަގަކުރައްވައި ޒަރިޔަންދު ވިދާޅުވީ އެހެން އެކަންވެއްޖެ ނަމަ، ޑުއެލް ޕާސްޕޯޓެއް ގެންގުޅޭ ޒަޔޮނިސްޓަކަށް ވެސް 99 އަހަރަށް ރާއްޖޭގައި އުޅުމުގެ ފުރުސަތު ލިބޭނެ ކަމަށެވެ.
