ބޭރުގެ ވިޔަފާރިވެރިންނަށް ރާއްޖޭގައި ކުރުން މަނާ ވިޔަފާރިތައް އޮކްޓޫބަރު، 8 ގެ ކުރިން ހުއްޓާލަން އަންގައިފި އެވެ.
އިކޮނޮމިކް މިނިސްޓްރީން މިއަދު ކުރި އިއުލާނެއްގައި ބުނީ ބޭރުގެ ވިޔަފާރިވެރިންނަށް ރާއްޖޭގައި ވިޔަފާރިކުރުން މަނާކޮށްފައިވާ ދާއިރާތަކުގައި ހިންގާ ވިޔަފާރިތައް އެ މިނިސްޓްރީން އިއުލާނުކޮށްފައިވާ ފޮރިން އިންވެސްޓްމެންޓް އެންޓްރީ ރިކުއާމެންޓްސްްްގައި ބަޔާންކޮށްފައިވާ ގޮތުގެ މަތިން އޮކްޓޫބަރު 8، ގެ ކުރިން ހުއްޓާލަންޖެހޭނެ ކަމަށެވެ.
ރާއްޖޭގައި ބޭރު މީހުންނަށް ނުކުރެވޭނެކަމަށް ކަނޑައަޅާފައި ވަނީ ހޯލްސޭލް އަދި ރީޓެއިލް ވިޔަފާރި އާއި ކާގޯ ސޭލްސް އޭޖެންޓް، ޖެނރަލް ސޭލްސް އޭޖެންޓް އަދި ޕެސެންޖާ ސޭލްސް އޭޖެންޓުގެ ވިޔަފާރި އެވެ.
ބޭރުގެ ވިޔަފާރިވެރިންނަށް ރާއްޖޭގައި އިންވެސްޓުކުރެވޭނެ ދާއިރާތައް އިސްލާހުކޮށްފި
މިއަދު ގެޒެޓުކުރި އިއުލާނުގައި ބޭރުގެ އިންވެސްޓަރުންނަށް އިންވެސްޓު ކުރެވޭނެ ދާއިރާތަކާއި އިންވެސްޓު ނުކުރެވޭނެ ދާއިރާތަކުގެ އިތުރުން ވަކި ޝަރުތުތަކަކާއެކު އިންވެސްޓު ކުރެވޭނެ ދާއިރާތައް ވެސް ކަނޑައަޅާފައިވެ އެެވެ.
އެ ދާއިރާތަކުގައި ވިޔަފާރި ކުރާ ކުންފުނިތަކުގެ ތެރެއިން، މިހައިތަނަށް އިކޮނޮމިކް މިނިސްޓްރީއަށް ނުގުޅޭ އަށް ކުންފުންޏެއްގެ ނަން ވެސް އެ އިއުލާނުގައި ބަޔާންކޮށްފައިވެ އެވެ.
މިނިސްޓްރީއަށް ނުގުޅޭ ކުންފުނިތައް
- މެގަ ސްޕީޑްލައިނާސް (މޯލްޑިވްސް)
- އެސްލިޓް މޯލްޑިވްސް
- އިސޯލާ ކްރިއޭޝަން (މޯލްޑިވްސް)
- ދީނަމް މޯލްޑިވްސް
- ލެމިންޓަންސް ޖުވެލްސް (މޯލްޑިވްސް)
- އެމްޔޫކޭ އެޕެރެލްސް (މޯލްޑިވްސް)
- ލެކްޖެމްސް (މޯލްޑިވްސް)
- އޯޝަން ވެލް ގާމެންޓްސް
މިނިސްޓްރީގެ އިއުލާނުގައި ބުނީ އެ ހުރިހާ ކުންފުންޏަކީ ވެސް ބޭރު މީހުންނަށް ރާއްޖޭގައި ވިޔަފާރިކުރުން މަނާކަމަށް ކަނޑައަޅާފައިވާ ދާއިރާތަކުގައި ވިޔަފާރި ކުރާ ކުންފުނިތަކެއް ކަމަށެވެ.
އިކޮނޮމިކް މިނިސްޓްރީން ވަނީ އެ ކުންފުނިތަކުން ވީހައިވެސް އަވަހަކަށް އިންވެސްޓް މޯލްޑިވްސް އަށް ގުޅައި ކަނޑައަޅާފައިވާ މުއްދަތުގެ ތެރޭގައި ކޮމްޕައިވުމަށް ކުރަންޖެހޭ ކަންކަން ކުރިއަށް ގެންދިޔުމަށް އެދިފަ އެވެ.
