ފުރަތަމާ ދަތުރެއްގައި ރޭ ދިވެހިރާއްޖެ ވަޑައިގެންނެވި މެލޭޝިޔާގެ ބޮޑުވަޒީރު އަންވަރު އިބްރާހިމް މިއަދު މެންދުރު ފަހު ރާއްޖެއިން ފުރާވަޑައިގެންފި އެވެ.
އަންވަރުގެ ދަތުރުގައި ރާއްޖެ އާއި މެލޭޝިޔާއާ ދެމެދު ދެ އެމްއޯޔޫއެއްގައި ވަނީ ސޮއިކޮށްފަ އެވެ. އެއީ ދީނީ ގޮތުން އަދި ދިފާއީ ގޮތުން އެއްބާރުލުން ދިނުމުގެ ދެ އެމްއޯޔޫ އެވެ.
އޭގެ އިތުރުން، 100 މިލިއަން ޑޮލަރުގެ ކަރަންސީ ސްވޮޕް އެގްރީމެންޓެއްގައި ސޮއި ކުރަން ވެސް މެލޭޝިޔާއިން ވަނީ އެއްބަސްވެފަ އެވެ. އަދި ޕްރިފްރެންޝަލް ޓްރޭޑް އެގްރީމެންޓެއް ހެދުމަށް ވާހަކަ ދައްކަން ވެސް ދެ ގައުމުން އެއްބަސްވި އެވެ.
ބޮޑުވަޒީރު އަންވަރުގެ ދަތުރުގައި، ރާއްޖެއިން ތެލާއި މައުދަން ހޯދަން މަސައްކަތް ކުރަން މެލޭޝިޔާގެ ޕެޓްރޯނާސްއަށް ރައީސް މުހައްމަދު މުއިއްޒު ވަނީ ދައުވަތު ދެއްވައިފަ އެވެ.
އިއާދަކުރަނިވި ހަކަތައިގެ ދާއިރާއިންނާއި ފަތުރުވެރިކަމުގެ ދާއިރާއިންނާއި ޑިޖިޓަލް އިންފްރާސްޓްރަކްޗާގެ ދާއިރާއިން ގުޅުން ބަދަހި ކުރަން ވެސް ދެ ގައުމުން އެއްބަސްވި އެވެ. އަދި ކޮންސިއުލާ ހިދުމަތްތަކާއި ވިސާގެ ހިދުމަތްތައް ސްޓްރީމްލައިން ކުރަން ވެސް ދެ ގައުމުން މިއަދު މަޝްވަރާ ކުރި އެވެ.
މެލޭޝިޔާގެ ބޮޑުވަޒީރު ރާއްޖެއިން ފުރާވަޑައިގަތުމުގެ އެމަނިކުފާނުގެ ޝަރަފުގައި ރައީސް މުހައްމަދު މުއިއްޒުގެ ދެކަނބަލުން ވަނީ ފަރިއްކޮޅެއް ދެއްވައިފަ އެވެ.
