މެލޭޝިއާގެ ސްކޫލެއްގައި ކިޔަވަމުންދިޔަ އަންހެން ދަރިވަރަކު މަރާލި ކަމުގެ ދައުވާ އުފުލާފައިވާ ފިރިހެން ކުއްޖާ، އެ ހާދިސާ ހިނގި ވަގުތު ހުރީ ނަފްސާނީ ގޮތުން ބަލިކަށި ހާލަތެއްގައި ކަމަށް ފަނޑިޔާރު ކަނޑައެޅުއްވުމުން، އެ ކުއްޖާ ސަލާމަތްވެއްޖެ އެވެ.
ވެރިރަށް ކުއާލަލަމްޕޫރުގެ ރަށުބޭރުގައި ހުންނަ ސެކަންޑަރީ ސުކޫލެއްގެ ފާޚާނާއެއްގެ ތެރޭގައި އެ ކުއްޖާ ވަނީ ޔެޕް ޝިންގް ޒުއެން ނަމަކަށް ކިޔާ އަންހެން ކުއްޖަކަށް ވަޅިން ހަމަލާދީ މަރާލާފަ އެވެ.
އުމުރުން 16 އަހަރުގެ އެ އަންހެން ކުއްޖާ މަރާލި ހާދިސާއާ ގުޅިގެން މެލޭޝިއާއަށް ބޮޑު ސިހުމެއް ލިބިފައިވާއިރު، މި ހާދިސާއާއެކު ސޯޝަލް މީޑިއާގެ ސަބަބުން ކުޑަކުދިންނަށް ކުރާ ނޭދެވޭ އަސަރުތަކާ މެދު ބޮޑެތި ބަހުސްތަކެއް ވަނީ އުފެދިފަ އެވެ.
މި ހާދިސާ ހިނގިއިރު އުމުރުން 14 އަހަރުގެ އެ ފިރިހެން ކުއްޖާއަށް ސޯޝަލް މީޑިއާގެ ނުފޫޒު ފޯރާފައިވާ ކަމަށް ބެލެވޭ ކަމަށް ފުލުހުން މީގެ ކުރިން ބުނެފައިވެ އެވެ. މި މައްސަލައާ ގުޅިގެން، ކުޑަކުދިން ސޯޝަލް މީޑިއާ ބޭނުންކުރުން ހަނިކުރުމަށް މެލޭޝިއާގެ ކަމާބެހޭ ފަރާތްތަކުން ވަނީ މި އަހަރުގެ ކުރީކޮޅުން ފެށިގެން ފިޔަވަޅުތަކެއް އަޅަން ފަށާފަ އެވެ.
މެލޭޝިއާގެ ގާނޫނުތައް ބުނާގޮތުން އެ ކުއްޖާއަކީ ކުޑަކުއްޖަކަށް ވާތީ އޭނާގެ ނަން ހާމަކޮށްފައެއް ނުވެ އެވެ. އަދި މަރުގެ ދައުވާއަށް އެ ކުއްޖާ ވަނީ އިންކާރުކޮށްފަ އެވެ.
ޝަރީއަތުގެ މަޖިލީހުގައި ދިފާއީ ވަކީލުން އެ ކުއްޖާ އަންހެން ކުއްޖާ މަރާލި ކަމަކަށް އިންކާރެއް ނުކުރެ އެވެ. ނަމަވެސް، ވަކީލުން ވަނީ އެ ކުއްޖާއަކީ ގިނަ އަހަރުތަކެއް ވަންދެން ނަފްސާނީ ބަލިތަކެއް ތަހައްމަލު ކުރަމުންދިޔަ ކުއްޖެއްކަން ފާހަގަކޮށް، ބުއްދި ސަލާމަތުން ނެތް ހާލަތެއްގައި ކުރެވުނު ކަމެއްގެ ގޮތުގައި ބަލައި އޭނާ ދޫކޮށްލުމަށް އެދިފަ އެވެ.
މި މައްސަލައިގައި ހެކިބަސް ދިން ނަފްސާނީ ބަލިތަކާ ބެހޭ މާހިރަކު ބުނި ގޮތުގައި، އެ ކުއްޖާއަކީ "ޝިޒޮފްރީނިއާ" ބަލި ހުންނަ ކުއްޖެކެވެ. އަދި އުމުރުން ނުވަ އަހަރުން ފެށިގެން އޭނާ ދިޔައީ ނަފްސާނީ ބަލިތައް ތަހައްމަލު ކުރަމުންނެވެ.
ކޮވިޑް-19 ގެ ބަލިމަޑުކަމުގެ ތެރޭގައާއި އަލުން ސުކޫލަށް ދާން ފެށި ދުވަސްވަރު އެ ކުއްޖާގެ ހާލަތު އިތުރަށް ގޯސްވި ކަމަށް ބުނެފައިވެ އެވެ. ވަކީލުން ބުނި ގޮތުގައި، ބަލީގެ އަލާމާތްތައް ކޮންޓްރޯލް ކުރުމަށްޓަކައި އެ ކުއްޖާ މުޅި އުމުރަށް ބޭސް ބޭނުންކުރަން ޖެހޭނެ އެވެ.
މިދިޔަ ހޯމަ ދުވަހު ފަނޑިޔާރު ކުރެއްވި ހުކުމުގައި، އެ ކުއްޖާގެ މައްޗަށް ކުށް ސާބިތުނުވާ ކަމަށް ކަނޑައެޅުއްވި ނަމަވެސް، އޭނާ ބަންދުގައި ބަހައްޓައިގެން ނަފްސާނީ ބަލިތަކަށް ފަރުވާދޭ ހޮސްޕިޓަލެއްގައި ފަރުވާ ދިނުމަށް ވަނީ އަމުރުކޮށްފަ އެވެ.
އެ ކުއްޖާ އަނބުރާ މުޖުތަމައަށް ދޫކޮށްލުމަކީ ރައްކާތެރި ކަމެއް ކަމަށް ފެންނަންދެން އޭނާ ހުންނާނީ ހޮސްޕިޓަލުގަ އެވެ. އަދި ކޮންމެ އަހަރަކު އެއްފަހަރު އޭނާގެ ހާލަތު ވަޒަންކުރަމުން ގެންދާނެ އެވެ.
ދިފާއީ ވަކީލަކު ހޯމަ ދުވަހު ނޫސްވެރިންނަށް މައުލޫމާތު ދެމުން ބުނީ، ހުކުމް އިއްވި ވަގުތު އެ ކުއްޖާގެ ފަރާތުން މާ ބޮޑު އިހުސާސްތަކެއް ފެނިފައި ނުވި ނަމަވެސް، މިއީ ވަރަށް ސީރިއަސް މައްސަލައެއްކަން އޭނާއަށް ފަހުމްވާ ކަމަށެވެ.
މި މައްސަލައިގެ ޝަރީއަތާއި ހުކުމް އިއްވުން ކުރިއަށް ގެންގޮސްފައިވަނީ ސިއްރުކޮށްގެން ކަމަށްވާތީ، އާންމުންނާއި މީޑިއާއަށް އެ އަޑުއެހުންތަކުގައި ބައިވެރިވުމުގެ ފުރުސަތެއް ނުލިބެ އެވެ.
ބައެއް ފަރާތްތަކުން މި ހާދިސާ ސިފަކޮށްފައިވަނީ ނެޓްފްލިކްސްގެ ސީރީޒްއެއް ކަމަށްވާ "އެޑޮލެސެންސް" އާ އެއްގޮތް ހާދިސާއެއްގެ ގޮތުގަ އެވެ. އެ ސީރީޒްގައި ދައްކުވައިދެނީ ކުޑަ ފިރިހެން ކުއްޖަކު އޭނާގެ ކުލާސް ކުއްޖަކު މަރާލާ ހާދިސާއަކާއި، އިންޓަނެޓްގެ ޒަރީއާއިން ކުދިން ހަރުކަށި ފިކުރަށް ލެނބޭ ގޮތުގެ ވާހަކަ އެވެ.
މިދިޔަ އަހަރު، މެލޭޝިއާގެ ބޮޑުވަޒީރު އަންވަރު އިބްރާހީމާ މި މައްސަލައާއި ސުކޫލުތަކުގައި ހިނގާ އަނިޔާވެރި އަމަލުތަކާ ގުޅޭގޮތުން ސުވާލު ކުރެވުނެވެ.
ލޯކަލް މީޑިއާތަކުން ރިޕޯޓްކޮށްފައިވާ ގޮތުގައި، ބޮޑުވަޒީރު ވިދާޅުވީ މިފަދަ ގިނަ މައްސަލަތައް ދިމާވަނީ މޯބައިލް ފޯނާއި ސޯޝަލް މީޑިއާ ބޭނުންކުރުމުގެ ސަބަބުން ކަމަށާއި، އެކަންކަން ހުއްޓުވުމަށް ހަރުކަށި ފިޔަވަޅުތަކެއް އަޅުއްވާނެ ކަމަށެވެ.
އޭގެ ފަހުން، ކަމާބެހޭ ފަރާތްތަކުން ވަނީ ކުޑަކުދިން ރައްކާތެރިކުރުމަށާއި އިންޓަނެޓުގައި ހުންނަ ގެއްލުންދެނިވި މައުލޫމާތުތަކަށް ކުދިން ހުށަހެޅޭ މިންވަރު މަދުކުރުމަށް އާ ގަވާއިދުތަކެއް އެކުލަވާލާފަ އެވެ.
މިދިޔަ ޖޫން މަހުން ފެށިގެން މެލޭޝިއާގައި ވަނީ އުމުރުން 16 އަހަރުން ދަށުގެ ކުދިން ސޯޝަލް މީޑިއާގެ މައިގަނޑު ޕްލެޓްފޯމްތަކުގައި އެކައުންޓް ހެދުން މަނާކޮށްފަ އެވެ.
