މެލޭޝިއާގެ ވެރިކަންކުރާ ކޯލިޝަންގައި ހިމެނޭ އެންމެ ބޮޑު ޕާޓީ، ޑިމޮކްރެޓިކް އެކްޝަން ޕާޓީ (ޑީއޭޕީ) ގެ ލީޑަރު އަދި އެ ގައުމުގެ ޓްރާންސްޕޯޓް މިނިސްޓަރު އެންތަނީ ލޯކް، މަގާމުން އިސްތިއުފާ ދެއްވުމަށް ހުށަހަޅުއްވައިފި އެވެ.
އޭނާ އިސްތިއުފާ ދެއްވަން ނިންމެވީ، ކުރީގެ ބޮޑުވަޒީރު ނަޖީބު ރައްޒާގު ގޭބަންދަށް ބަދަލުކުރުމަށް އެ ގައުމުގެ "ޕާޑަންސް ބޯޑު" ނުވަތަ މައާފު ދޭ ބޯޑުން ނިންމި ނިންމުމާ ގުޅިގެންނެވެ.
"އަޅުގަނޑު މިހާރު ވާނީ ޓްރާންސްޕޯޓް މިނިސްޓަރުގެ މަގާމުން އިސްތިއުފާ ދިނުމަށް ބޮޑުވަޒީރަށް ހުށަހަޅާފައި. ނަމަވެސް، މި އިސްތިއުފާއަކީ ހަމައެކަނި ކެބިނެޓް މެންބަރެއްގެ ހައިސިއްޔަތުން އަޅުގަނޑު އަމިއްލައަށް ނިންމި ނިންމުމެއް،" ޑީއޭޕީގެ ސެކްރެޓަރީ ޖެނެރަލްގެ މަގާމުވެސް ފުރުއްވާ އެންތަނީ ލޯކް ވިދާޅުވި އެވެ.
މި ނިންމުން އިއުލާންކޮށްފައި މިވަނީ، އެތައް ބިލިއަން ޑޮލަރުގެ ކޮރަޕްޝަންގެ މައްސަލައެއްގައި ކުށް ސާބިތުވެ ޖަލަށްލާފައިވާ ކުރީގެ ބޮޑުވަޒީރު ނަޖީބު ރައްޒާގުގެ ހުކުމުގެ ބާކީ އޮތް ބައި ގޭބަންދުގައި ފުރިހަމަކުރުމުގެ ހުއްދަ ދިނުމަށް، ރަސްގެފާނު ރިޔާސަތު ބަލަހައްޓަވާ މެލޭޝިއާގެ ޕާޑަންސް ބޯޑުން ނިންމިތާ އެއްދުވަސް ފަހުންނެވެ. ނަޖީބު ރައްޒާގުގެ މައްޗަށް ކޮރަޕްޝަންގެ ކުށް ސާބިތުވީ މީގެ ހަތަރު އަހަރު ކުރިންނެވެ.
މެލޭޝިއާގެ ބޮޑުވަޒީރުކަން 2009 އިން 2018 އަށް ކުރެއްވި ނަޖީބު ރައްޒާގުގެ މައްޗަށް ކޮރަޕްޝަންގެ ކުށް ސާބިތުވީ، އޭނާގެ ވެރިކަމުގައި އުފެއްދެވި ދައުލަތުގެ އިންވެސްޓްމަންޓް ފަންޑު، "ވަން މެލޭޝިއާ ޑިވެލޮޕްމަންޓް ބާހާދު" (1އެމްޑީބީ) އިން އެތައް ބިލިއަން ޑޮލަރަކަށް ހިޔާނާތްތެރިވި މައްސަލައިގަ އެވެ. ނަމަވެސް، އޭނާ އަބަދުވެސް ގެންދަވަނީ އެއްވެސް ގޯސް ކަމެއް ކުރައްވާފައި ނުވާނެ ކަމަށް ވިދާޅުވެ އެ ތުހުމަތުތަކަށް އިންކާރު ކުރައްވަމުންނެވެ.
އެންތަނީ ލޯކް އިތުރަށް ވިދާޅުވީ، އޭނާ އިސްތިއުފާ ހުށަހެޅުއްވި ނަމަވެސް، ސަރުކާރުގެ ސިޔާސީ ހަމަޖެހުން ދެމެހެއްޓުމަށްޓަކައި ޑީއޭޕީގެ ކެބިނެޓްގެ އެހެން މިނިސްޓަރުން މަގާމުތަކުގައި ދެމިތިއްބަވާނެ ކަމަށެވެ.
މެލޭޝިއާގެ މަދު ނަސްލުތަކާއި ކުރިއަރާފައިވާ ވިސްނުމުގެ ވޯޓުލާ މީހުންގެ މެދުގައި ޑީއޭޕީއަށް ބޮޑު ތާއީދެއް އޮތް ނަމަވެސް، ކޮރަޕްޝަންގެ މައްސަލަތަކާއި، ނަސްލީ އަދި ދީނީ ކަންކަމުގައި ސަރުކާރުން އަމަލުކުރާ ގޮތުގެ ސަބަބުންނާއި، ވައުދުވި އިސްލާހުތައް ގެނައުމުގައި ލަސްވަމުންދާތީ އެ ޕާޓީއަށް އޮތް ތާއީދު ވަނީ ކުޑަވާން ފަށާފަ އެވެ.
ބޮޑުވަޒީރު އަންވަރު އިބްރާހީމްގެ ގިނަ ޕާޓީ ހިމެނޭ ކޯލިޝަން ސަރުކާރުގައި ޑީއޭޕީގެ އިތުރުން ނަޖީބު ރައްޒާގު ނިސްބަތްވާ ޔޫއެމްއެންއޯ (އުމްނޯ) ވެސް ހިމެނެ އެވެ. ނަމަވެސް، ކޮރަޕްޝަންގެ މައްސަލަތަކާ މެދު ސަރުކާރުން ގެންގުޅޭ ސިޔާސަތުތަކާ ގުޅިގެން ކޯލިޝަންގެ ތެރޭގައި އޮތް ހިޔާލުތަފާތުވުންތައް މިހާރު ވަނީ އިތުރުވެފަ އެވެ.
