ޕެންޝަން އޮފީހުގެ ޗީފް އޮޕަރޭޓިން އޮފިސަރު (ސީއޯއޯ) މަރްޔަމް ޝިއުނާ މަގާމުން ސަސްޕެންޑުކޮށްފި އެވެ.
އިތުބާރު ހުރި މަސްދަރަކުން ބުނި ގޮތުގައި ޝިއުނާ އިއްޔެ ސަސްޕެންޑްކުރީ ޝިއުނާއާމެދު ޕެންޝަން ބޯޑުގެ ބައެއް މެންބަރުންގެ ހިތްހަމަނުޖެހުންތަކެއް ހުރުމުން ކަމަށެވެ. .
"ޝިއުނާ މަސައްކަތް ކުރަމުން ދިޔައީ ޕްރޮފެޝަނަލްކޮށް. އެންމެ ބޮޑު ހިތްހަމަ ނުޖެހުމެއް އޮތީ ޗެއާމަންގެ،" އޭނާ ވިދާޅުވި އެވެ.
މި ހަބަރަށް ކޮމެންޓެއް ހޯދަން ޕެންޝަން އޮފީހަށް ގުޅުމުން އެތަނުގެ މީޑިއާ އޮފިޝަލަކު ބުނީ ވަކިވަކި މުވައްޒަފުންނާ ގުޅޭ ކަންކަމުގައި އެ އޮފީހުން މައުލޫމާތު ހާމަނުކުރާ ކަމަށެވެ.
"ވަކިވަކި މުވައްޒަފުންނާއި ގުޅޭ އިދާރީ ކަންކަމާ މެދު ޕެންޝަން އޮފީހުން މީޑިއާތަކަށް މައުލޫމާތު ހިއްސާކުރުމަށް ހަމަޖެހިފައެއް ނުވޭ،" އޭނާ ބުންޏެވެ.
ޝިއުނާ ޕެންޝަން އޮފީހާ ގުޅިވަޑައިގަތީ އެޕްރީލް، 2023، ގަ އެވެ. އޭގެ ކުރިން ޝިއުނާ ހުންނެވީ އޭސީސީގެ ރައީސްގެ މަގާމުގަ އެވެ. އަދި ޓްރާންސްޕޭރެންސީ މޯލްޑިވްސްގެ އެގްޒެކެޓިވް ޑިރެކްޓަރުކަން ވެސް އޭނާ ކުރެއްވި އެވެ.
ޔުނިވާސިޓީ އޮފް ލަންޑަންގެ ސްކޫލް އޮފް އޮރިއެންޓަލް އެންޑް އެފްރިކަން ސްޓަޑީޒްއިން އިންޓަރނޭޝަނަލް ޑިވެލޮޕްމަންޓް ދާއިރާއިން މާސްޓާސް ޑިގްރީ އަދި ލަންޑަން މެޓްރޮޕޮލިޓަން ޔުނިވަސިޓީން ބެޗްލާ އޮފް އާޓްސް އިން ހިސްޓްރީ ޝިއުނާ ހާސިލްކުރައްވާފައިވެ އެވެ.
