ދައުލަތުން އިއުލާން ކުރާ ހުދުމުހުތާރު ސިޔާސަތަކުން ޑޮލަރުގެ ތާށިކަން ހައްލުނުވާނެ ކަމަށް ވެސް ވިދާޅުވެ ޕެންޝަން އޮފީހުގެ ކުރީގެ ޗެއާމަން އަހުމަދު އިނާޒް ސަރުކާރަށް ފާޑުވިދާޅުވެއްޖެ އެވެ.
އިނާޒް ސަރުކާރަށް ފާޑުވިދާޅުވެފައި މި ވަނީ ޑޮލަރުގެ އަގު މައްޗަށްދާ ހަބަރު ލިޔުން މަނާ ކުރަން އަދި ރަސްމީ ރޭޓަށްވުރެ ބޮޑުކޮށް ޑޮލަރު ވިއްކާ ވިޔަފާރިތައް ހުއްޓުވަން ސަރުކާރުން ގާނޫނު ބަދަލު ކުރަން މަސައްކަތް ފެށުމުންނެވެ.
ބުދަ ދުވަހު އެކްސްގައި ކުރެއްވި ޕޯސްޓެއްގައި އިނާޒް ވިދާޅުވީ، ބޭރު ފައިސާ ގަނެވިއްކުމަކީ އިގްތިސާދުގެ ތެރޭގައި ހިނގާ ބާޒާރެއް ކަމަށާއި ހުދުމުހުތާރު ސިޔާސަތަކުން ނުވަތަ ގާނޫނަކުން އެކަން ކޮންޓްރޯލް ނުކުރެވޭނެ ކަމަށެވެ.
"ހުދުމުހުތާރު ސިޔާސަތުތަކާއި، ގާނޫނުތަކަކުން އިގްތިސާދުގެ ތެރޭގަ ރޭވި ހިނގާ ބާޒާރެއް [ބޭރު ފައިސާ ގަނެ ވިއްކުން] ކޮންޓްރޯލް ނުކުރެވޭނެ. އަދި އެ ބާޒާރުގައި މިވަގުތު އޮތް އުދާސް ކަމަށް ހައްލެއް ވެސް ނުލިބޭނެ،" އިނާޒް ވިދާޅުވެފައިވެ އެވެ. "އިގްތިސާދީ އަސާސްތަކަށް ގޮން ނުޖައްސަވާ."
އިނާޒް އިސްތިއުފާ ދެއްވީ ސަރުކާރުން ދިވެހި ރުފިޔާ ޗާޕު ކުރަން އުޅޭ މައްސަލައިގައި ފެބްރުއަރީ 1، ގަ އެވެ. އޭނާ ވިދާޅުވީ ފައިސާ ޗާޕު ކުރުން ވާނީ އިގްތިސާދަށް ލިބޭ ބޮޑު ގެއްލުމަކަށް ކަމަށެވެ.
"އެމްއެމްއޭ މެދުވެރިކޮށް މި މުއާމަލާތަށް ފައިސާ ހޯދުމަކީ އިގްތިސާދަށް މިހާލަތުގައި ގެއްލުން ބޮޑު ނިންމުމެއްކަމަށް ޓެކްނިކަލީ ގަބޫލްކުރެވޭތީ ޕެންޝަން އެޑްމިނިސްޓްރޭޝަން އޮފީހުގެ ބޯޑު ގެ ޗެއާޕާސަން ކަމުން މިއަދުން ފެށިގެން އަޅުގަނޑު އިސްތިއުފާ ދީފިން،" ކުރިން ފިނޭންސް މިނިސްޓަރަކަށް ވެސް ހުންނެވި އިނާޒް ވިދާޅުވެފައިވެ އެވެ.
ސަރުކާރުން މިހާރު ވަނީ 2.4 ބިލިއަން ރުފިޔާ ޗާޕުކޮށް، އެ ފައިސާ އިގްތިސާދުގެ ތެރެއަށް ވައްދައިފަ އެވެ. އެއީ ގާތްގަނޑަކަށް ޖީޑީޕީގެ އެއް ޕަސެންޓެވެ. ތަކެއްޗާއި ޑޮލަރުގެ އަގު މިހާ ބޮޑަށް އުފުލުނީ ދިވެހި ރުފިޔާ ޗާޕު ކުރި ފަހުންނެވެ.
ޑޮލަރު އަގުބޮޑުވާ ވާހަކަ ނޫސްތަކުގައި ލިޔުން މަނާ ކުރަން އުޅޭތީ އިދިކޮޅުން އަންނަނީ އެކަމަށް ވަރަށް ބޮޑަށް ފާޑުވިދާޅުވަމުންނެވެ. އެކަމަށް ފާޑުވިދާޅުވި އެއް ބޭފުޅަކީ ކުރީގެ ރައީސް އިބްރާހިމް މުހައްމަދު ސޯލިހެވެ.
"ޑޮލަރުގެ އަގު ބޮޑުވާނަމަ އެކަން ހާމަކުރަން ޖެހޭ. ޑޮލަރުގެ އަގު ދަށްވާނަމަ އެކަން ވެސް ހާމަކުރަންޖެހޭ. ނޫސްވެރިކަމަށް ހުރަސްއެޅޭނެ ގާނޫނެއް ފާސްކޮށްގެން ލިބޭނެ އެއްވެސް ފައިދާއެއް ނޯންނާނެ،" ސޯލިހު ކުރެއްވި ޕޯސްޓުގައި ލިޔުއްވާފައިވެ އެވެ.
ޑޮލަރުގެ އަގު އުފުލޭ ވާހަކަ ނޫސްތަކުގައި ލިޔުން މަނާ ކުރަން ސަރުކާރުން މި އުޅެނީ، ޑޮލަރުގެ އަގު މައްޗަށް ދަނީ ދެ ނޫހެއްގައި އެ ވާހަކަ ޖަހާތީ ކަމަށް އިގްތިސާދީ މިނިސްޓަރު މުހައްމަދު ސައީދު ވިދާޅުވިތާ ކުޑަ ދުވަސްކޮޅެއް ފަހުންނެވެ.
ޑޮލަރެއް ގަންނަން މިހާރު ލިބެނީ 22.85 ރުފިޔާއަށެވެ. މިހެންވުމުގެ މައިގަނޑު ސަބަބަކީ ޑޮލަރުން ކުރާ ހަރަދު އިތުރުވުމާއި ޑޮލަރުގެ އިންވެސްޓްމަންޓެއް ގައުމަށް ނުވަނުމާއި އިގްތިސާދުގައި އެނބުރު ފައިސާއިން 500 މިލިއަން ޑޮލަރުގެ ސުކޫކު ދައްކަން މަޖުބޫރުވުމާއި އިސްރާފު އިތުރުވުމުން ކަމަށް މާހިރުން ގަބޫލު ކުރެ އެވެ.
