އަމްސްޓެޑަމް، ނެދަލެންޑްސް (ސެޕްޓެމްބަރު 22) - އެމެރިކާ، މެކްސިކޯ އަދި ކެނަޑާގައި މި ފަހަރު ބޭއްވި ފީފާ ވޯލްޑް ކަޕަށް ފަހު، ގައުމީ ޓީމުގެ ކެރިއަރު ނިންމާލުމުގެ ވިސްނުމުގައި ހުރި، ނެދަލެންޑްސްގެ ޑިފެންޑަރު، ވާޖިލް ވެން ޑައިކް، އެ ޓީމާ އެކު ކުރިއަށް ދިއުމަށް ނިންމައިފި އެވެ.
ވޯލްޑް ކަޕްގެ ގަދަ 32 ޓީމުގެ ބުރުން ނެދަލެންޑްސް ކެޓީ މޮރޮކޯ އަތުން ބަލިވުމުންނެވެ. އެ މެޗަށް ފަހު، ނެދަލެންޑްސްގެ ކޯޗުކަމުން ރޮނާލްޑް ކޫމަން ވަކިވިއިރު، އުމުރުން 35 އަހަރުގެ ވެން ޑައިކް، ގައުމީ ޓީމާ ދުރަށް ޖެހިލުމުގެ ވާހަކަތައް ދެކެވުނެވެ. އަދި، ގައުމީ ޓީމަށް 96 މެޗު ކުޅެފައިވާ ވެން ޑައިކް ވެސް އެކަން ޔަގީންކޮށްދިނެވެ.
އެކަމަކު، ނެދަލެންޑްސްގެ ކޯޗުކަމާ، 2010 ވަނަ އަހަރު ސްޕެއިނާ އެކު ވޯލްޑް ކަޕް ކާމިޔާބުކުރި މިޑްފީލްޑަރު، ޒަވީ ހެނާންޑޭޒް ހަވާލުވެ، އެ ޓީމުގެ ސީނިއާ ކުޅުންތެރިންނާ ބައްދަލުކުރި އެވެ. އެ ގޮތުން، ވެން ޑައިކާ އެކު ވެސް ޒަވީ ވަނީ ބައްދަލުވުމެއް ކުރިއަށްގެންގޮސްފަ އެެވެ. އެ ބައްދަލުވުމުގައި ޒަވީ ވަނީ ނެދަލެންޑްސްއާ އެކު، އޭނާގެ ޕްލޭންތައް ވެން ޑައިކަށް ހިއްސާކޮށްފަ އެވެ.
"މިއީ ވަރަށް މުހިންމު ނިންމުމެއް، އަހަންނަށް ބޭނުންވާ އިހުތިރާމާއި ޔަގީންކަން ލިބިގެންދިޔަ ބައްދަލުވުމެއް މިއީ. މިއީ، މާ ދިގު ކޮށް ދައްކަން ޖެހޭ ވާހަކައެއް ނޫން. އަހަންނަށް ލިބެންޖެހޭ އިތުބާރު ލިބިއްޖެ،" ވެން ޑައިކް ބުންޏެވެ.
"އަހަރެން ވަރަށް ގަޔާވެގެން މި ހުރީ ކުރިއަށް އޮތް ހަތަރު މެޗަށް. ދެން، ކުރިއަށް އޮތް ދެ އަހަރު ތެރޭ ގިނަ ކަންކަން ރަނގަޅަށް ގެންދަން ބޭނުން،"
ނެދަލެންޑްސްގެ މީޑިއާ ރިޕޯޓްތައް ބުނާގޮތުން، ނެދަލެންޑްސް ގައުމީ ކެރިއަރު ކުރިއަށްގެންދަން ނިންމީ 2028 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ނިޔަލަށެވެ. މި ފަހަރުގެ އިންޓަނޭޝަަނަލް ބްރޭކުގައި ނެދަލެންޑްސް އިން ޔުއެފާ ނޭޝަންސް ލީގުގެ ހަތަރު މެޗު ކުޅޭނެ އެވެ. އެއީ، ބުރާސްފަތި ދުވަހުގެރޭ، ޖަރުމަނާ ދެކޮޅަށް ކުޅޭ މެޗުގެ އިތުރުން، ސާބިއާއާ ދެކޮޅަށް ކުޅޭ ދެ މެޗު އަދި ގްރީސްއާ ބައްދަލުކުރާ މެޗެވެ.
ޒަވީ އަށް ނެދަލެންޑްސް ފުޓްބޯޅަ ފެޑެރޭޝަނުން ދީފައިވަނީ، 2030 ވަނަ އަހަރުގެ ފީފާ ވޯލްޑް ކަޕްގެ ނިޔަލަށް އޮތް ކޮންޓްރެކްޓެކެވެ. ޒަވީ ފުރަަތަމަ މެޗުގައި ނުކުންނަ ޖަރުމަނުގެ ކޯޗަކަށް ހުރީ ލިވަޕޫލާއި ބޮރޫޝިއާ ޑޯޓްމަންޑްގެ ކުރީގެ ކޯޗު، ޔާގަން ކްލޮޕް އެވެ.
