އަމްސްޓެޑަމް، ނެދަލެންޑްސް (އޮގަސްޓް 13) - ހުސްވެފައިވާ ނެދަލެންޑްސް ގައުމީ ފުޓްބޯޅަ ޓީމުގެ ކޯޗަކަށް ސްޕެއިނުގެ ޒަވީ ހެނާންޑޭޒް ހަމަޖައްސައިފި އެވެ.
ނެދަލެންޑްސްގެ ފުޓްބޯޅަ ފެޑެރޭޝަނުން އިއުލާނުކުރި ގޮތުގައި، ޒަވީ އަށް ދީފައިވަނީ، 2030 ވަނަ އަހަރުގެ ފީފާ ވޯލްޑް ކަޕްގެ ނިޔަލަށް އޮތް ކޮންޓްރެކްޓެކެވެ.
އެމެރިކާ، މެކްސިކޯ އަދި ކެނަޑާގައި މި އަހަރުގެ ޖޫން/ޖުލައި މަހު ކުރިއަށްދިޔަ ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 32 ޓީމު ކުޅުނު ބުުރުގައި މޮރޮކޯ އަތުން ބަލިވެ، ނެދަލެންޑްސް ކެޓި ހިސާބުން އެ ޓީމުގެ ކޯޗުކަމުން ރޮނާލްޑް ކޫމަން ވަނީ ވަކިވެފަ އެވެ.
އާ ކޯޗެއް ހޯދުމަށް ނެދަލެންޑްސް އިން ކުރަމުން އަންނަ މަސައްކަތުގައި އެ ގައުމުން އެންމެ ފުރަތަމަ ބެލި ކޯޗަކީ، ދެ ސީޒަނަށް ފަަހު ލިވަޕޫލުން ވަކިކުރި، ފެޔަނޫޑްގެ ކުރީގެ ކޯޗު އާނާ ސްލޮޓް އެވެ. އެކަމަކު، އޭނާ ކްލަބް ކޯޗިންގައި ކުރިއަށްދާން ނިންމިއިރު، ދެން، ނެދަލެންޑްސް އިން ވާހަކަ ދެއްކި އެއް ކޯޗަކީ މި ފަހަރުގެ ވޯލްޑް ކަޕަށް ފަހު، ޕޯޗުގަލް އިން ވަކިވި ރޮބާޓޯ މާޓިނޭޒްއާ އެވެ.
ސްލޮޓް ނޫނެކޭ ބުނުމުން މާޓިނޭޒަށް ނެދަލެންޑްސް ކޯޗުކަން ހުށަހަޅައިފި
ނެދަލެންޑްސްގެ ކޯޗުކަމާ ހަވާލުވުމަށް އާނާ ސްލޮޓަށް ހުށަހެޅި ފުރުސަތު އޭނާ ދޫކޮށްލުމުން، އެ މަގާމަށް ރޮބާޓޯ މާޓިނޭޒް އައްޔަންކުރުމުގެ މަޝްވަރާތައް ފަށައިފި. ސްލޮޓް މި ހުށަހެޅުން ގަބޫލުނުކުރީ ކްލަބް ފުޓްބޯޅައިގެ ޕްރޮޖެކްޓެއްގައި މަސައްކަތްކުރަން ބޭނުންވާތީ ކަމަށް އޭނާ ވަނީ ބުނެފައި. ނެދަލެންޑްސް އިން ދަނީ މާޓިނޭޒާ އެކު މަޝްވަރާ ކުރަމުން
އެކަމަކު، މާޓިނޭޒަށް ވެސް ފުރުސަތު ނުދީ ނެދަލެންޑްސް އިން ޒަވީއާ ޒިންމާ ހަވާލުކުރީ އެވެ.
މިއީ، ކޯޗިން ކެރިއަރުގައި ޒަވީ، ކޫމަން އަށް ފަހު ޓީމަކާ ހަވާލުވި ދެ ވަނަ ފަަހަރެެވެ. އެ ގޮތުން، 2021 ވަނަ އަހަރު ކޫމަން، ބާސެލޯނާ ދޫކޮށްލިއިރު، އެ ފަހުން އެ ޓީމާ ހަވާލުވީ ޒަވީ އެވެ.
ސްޕެއިނާ އެކު، 2010 ވަނަ އަހަރުގެ ފީފާ ވޯލްޑް ކަޕް ޗެމްޕިއަންކަން ހޯދި ޒަވީ، އޭނާގެ ކޯޗިން ކެރިއަރު ފެށީ، ގަތަރުގެ އަލް ސާދުންނެވެ. އެ ޓީމަށް ކުޅުނު ޒަވީ، އެ ކްލަބްގެ ކޯޗަކަށް ހުރެފައި، ދެން ހަވާލުވީ، 2021 ވަނަ އަހަރު ބާސެލޯނާއާ އެވެ. ކުޅުމުގެ ކެރިއަރުގެ ބޮޑުބައި ހޭދަކުރި ބާސެލޯނާގެ ކޯޗަކަށް ހުރިއިރު، ޒަވީ ވަނީ، ސްޕެނިޝް ލީގާއި ސްޕެނިޝް ސުޕަ ކަޕް ޗެމްޕިއަންކަން ހޯދައިފަ އެވެ.
ޒަވީގެ ކޯޗުކަމުގައި ނެދަލެންޑްސް ކުޅޭނެ ފުރަަތަމަ މެޗު އޮތީ، އަންނަ މަހުގެ 24 ވަނަ ދުވަހު، ޔުއެފާ ނޭޝަންސް ލީގުގައި ޖަރުމަނާ ދެކޮޅަށް ކުޅޭ މެޗެވެ. މިއީ، ޖަރުމަނުގެ ކޯޗުކަމާ ހަވާލުވި ޔާގަން ކްލޮޕް ވެސް އެ ޓީމަށް އިރުޝާދުދޭނެ ރަސްމީ ފުރަތަމަ މެޗެވެ. ޖަރުމަނު މެޗަށް ފަހު، ދެން ނެދަލެންޑްސް އަށް އޮތީ، ނޭޝަންސް ލީގުގައި ގްރީސް އާއި ސާބިއާއާ ދެކޮޅަށް ކުޅޭ މެޗުތަކެވެ.
