ފޮސިލައިޒްޑް ދަތްތަކެއް ބޭނުންކޮށްގެން ޓައިރަނޯސޯރަސް ރެކްސް (ޓީ-ރެކްސް) ގެ ހަށިގަނޑުގެ ހޫނުމިން ދެނެގަނެފި އެވެ. މި ދިރާސާއިން ދައްކާ ގޮތުގައި އޭގެ ހަށިގަނޑުގެ ހޫނުމިން އިންސާނުންގެ ހަށިގަނޑުގެ ހޫނުމިނާ މާ ބޮޑު ތަފާތެއް ނެތެވެ.
ކުރީގެ ދިރާސާތަކުގައި ސައިންސްވެރިން ގަބޫލުކުރި ގޮތުގައި ޑައިނަސޯތަކަކީ ހަރަކާތްތެރިކަން ކުޑަ، ފިނި ލޭ ހުންނަ މަހްލޫގުތަކެކެވެ. ނަމަވެސް ފަހުގެ ހޯދުންތަކުން އެކަން ބަދަލުވެ، ކުރީގެ ޑައިނަސޯތަކަކީ ހޫނު ލޭ ހުންނަ އަދި އަމިއްލައަށް ހަށިގަނޑުގެ ހޫނުމިން ކޮންޓްރޯލް ކުރެވޭ ފަދަ ދިރުންތަކެއްކަން ވަނީ ހާމަވެފަ އެވެ.
ޓީ-ރެކްސް އަކީ މިފަދަ އެއްޗެއް ކަމަށް ގިނަ ސައިންސްވެރިން އެއްބަސްވި ނަމަވެސް، ދުނިޔެއިން ނެތިގޮސްފައިވާ މަހްލޫގެއްގެ ހަށިގަނޑުގެ ސީދާ ހޫނުމިން ދެނެގަތުމަކީ އުނދަގޫ ކަމެކެވެ.
ޓީ-ރެކްސް ބޮޑުވި ގޮތް ދިރާސާކޮށްގެންނާއި އޭގެ ކަށިތަކުން ފެންނަން ހުރި ނިޝާންތައް ބޭނުންކޮށްގެން ސައިންސްވެރިން މީގެ ކުރިން ތަފާތު ގޮތްގޮތަށް މަސައްކަތް ކުރި ނަމަވެސް، ޔަގީންކަމާއެކު އޭގެ ހަށިގަނޑުގެ ފިނިހޫނުމިން މިހާތަނަށް ހޯދިފައެއް ނުވެ އެވެ.
އަލަށް ކުރި ދިރާސާގައި ސައިންސްވެރިން ވަނީ މި ނުރައްކާތެރި ޝިކާރަވެރިޔާގެ ދަތްތަކުން ކެމިކަލް ނިޝާންތަކެއް ހޯދާފަ އެވެ. އެގޮތުން ދަތުގެ އެނަމަލްގައި ހުންނަ އެޓަމްތައް އެކުލެވިގެންވާ ގޮތް ބަދަލުވަނީ އެ އެއްޗެއްގެ ހަށިގަނޑުގެ ހޫނުމިނަށް ބިނާކޮށްކަން ވަނީ އެނގިފަ އެވެ.
ޔުނިވާސިޓީ އޮފް ކެލިފޯނިއާ، ލޮސް އެންޖެލިސްގެ ޖިއޯކެމިސްޓެއް ކަމަށްވާ އަދި މި ދިރާސާގެ އެއް މުސައްނިފު އަރާދްނާ ތުރިޕާތީ ވިދާޅުވި ގޮތުގައި ޓީ-ރެކްސްގެ ހަށިގަނޑު ހޫނު މިން މިހާރު ވަނީ ދެނެގަނެވިފަ އެވެ.
ތިން ދަތަކުން ލިބުނު މައުލޫމާތަށް ބަލާއިރު، ޓީ-ރެކްސްގެ ހަށިގަނޑުގެ އެވްރެޖް ހޫނުމިނަކީ ގާތްގަނޑަކަށް 97 ޑިގްރީ ފަރަންހައިޓް (36 ޑިގްރީ ސެލްސިއަސް) އެވެ. މިއީ މިހާރުގެ އެތްތަކުގެ ހޫނުމިނާ އެއްވަރުގެ މިންވަރެކެވެ. އަދި މިއީ އިންސާނުންގެ ހަށިގަނޑުގެ އެވްރެޖް ހޫނުމިން ކަމަށްވާ 97 އާއި 99 ޑިގްރީ ފަރަންހައިޓް (36 އާއި 37 ޑިގްރީ ސެލްސިއަސް) އާ ވެސް ވަރަށް ގާތް އަދަދެކެވެ.
މި ހޯދުންތައް ވަނީ "ސައިންސް އެޑްވާންސަސް" ޖާނަލްގައި ޝާއިއުކޮށްފަ އެވެ.
ސައިންސްވެރިން ބުނާ ގޮތުގައި އެހެން ޑައިނަސޯތަކުގެ ހޫނުމިން ހުންނަ ގޮތް ބެލުމަށް މި އުސޫލުތައް ބޭނުންކުރުމަކީ މުހިންމު ކަމެކެވެ. ޑައިނަސޯގެ ޒަމާނުގައި އެންމެ ނުފޫޒުގަދަ ޝިކާރަވެރިއެއްގެ ގޮތުގައި ޓީ-ރެކްސް އޮތުމުގެ އެއް ސިއްރަކީ އޭގެ ހަށިގަނޑުގެ ހޫނުމިން ކަމަށް ވުމަކީ އެކަށީގެންވާ ކަމެކެވެ.
